كيريلل گەراسيمەنكو ۇستەل تەننيسىنەن دوحادا ءوتىپ جاتقان الەم چەمپيوناتىنىڭ 1/16 فينالىندا جەڭىلىس تاپتى. العاشقى ەكى اينالىمدا سينگاپۋرلىق ك چيۋ مەن جاپونيالىق حيروكو شينوزۋتاعا شاڭ قاپتىرعان وتانداسىمىز 1/16 فينالدا برازيليانىڭ بەتكەۇستار ويىنشىسى ۋگو كالدەرانوعا 2:4 ەسەبىمەن ەسە جىبەردى.
باكۋدە شاعىن فۋتبولدان الەم كۋبوگى باستالدى. وعان الەمنىڭ ءار قيىرىنان جينالعان 32 كوماندا قاتىسۋدا. قازاقستان قۇراماسى F توبىنا ءتۇستى. تۇساۋكەسەر كەزدەسۋدى پولشاعا قارسى وتكىزگەن وتانداستارىمىز ويدا-جوقتا 1:2 ەسەبىمەن جەڭىلىس تاپتىق. ەندى بوسنيا مەن گەرتسەگوۆينا جانە اقش-پەن كۇش سىناسامىز. ءار توپتا العاشقى ەكى ورىندى يەلەنگەندەر 1/8 فينالعا جولداما الادى. پلەي-وفف باسەكەلەرى 27 مامىردا باستالادى. ودان كەيىن شيرەك فينال (29 مامىر), جارتىلاي فينال (30 مامىر) جانە قولا مەدال مەن باس جۇلدە (1 ماۋسىم) ءۇشىن تارتىستى تاماشالايمىز.
الەم چەمپيوناتىندا ءساتسىز ونەر كورسەتىپ, ءوز توبىندا سوڭعى ورىندا قالىپ قويعان قازاقستاننىڭ شايبالى حوككەيشىلەرى كەلەسى جىلى ءبىرىنشى ديۆيزيوندا وينايدى. پولشادا وتەتىن جارىستىڭ توپتىق تۋرنيرىندە ءبىزدىڭ كوماندا فرانتسيا, پولشا, ۋكراينا, جاپونيا جانە ليتۆا قۇرامالارىمەن كۇش سىناسادى.
تۇركىستاندا ترياتلوننان قازاقستان چەمپيوناتى اياقتالدى. ەرلەر سايىسىندا الماتىلىق ەگور كرۋپياكوۆ جەڭىمپاز اتانسا, شىمكەنتتىك دارىن قونىسباەۆ پەن الماتى قالاسىنىڭ تاعى ءبىر وكىلى الەكساندر تەن جۇلدەگەرلەر قاتارىنا قوسىلدى. ايەلدەردىڭ باسەكەسىندە ەلوردادان كەلگەن ديانا ەرجانوۆا التىننان القا تاقتى. الماتىلىق داريا مازۋر مەن استانالىق ايدا كيم ەكىنشى جانە ءۇشىنشى ورىنداردى ەنشىلەدى.
«الاش پرايد» پروموۋشەنىنىڭ مۇرىندىق بولۋىمەن 27 مامىردا استانادا جالاۋى جەلبىرەيتىن ءدۇبىرلى جارىستا قازاقتىڭ اتاقتى ارالاس جەكپە-جەك شەبەرى, كەزىندەگى ONE Championship ۇيىمىنىڭ التىن بەلبەۋى يەگەرى قايرات احمەتوۆ (24-3) جەڭىل سالماقتاعى UFC-ءدىڭ ەكس-چەمپيونى, امەريكالىق الدجامەين ستەرلينگپەن كۇش سىناسادى. قوس ساڭلاق گرەپپلينگتىڭ ەرەجەسى بويىنشا ايقاسادى.