دەنساۋلىق ساقتاۋ مينيسترلىگى دارىلىك زاتتارعا باعا قالىپتاستىرۋ جۇيەسىن اۋقىمدى تۇردە قايتا قاراپ جاتىر. باستى ماقسات – پرەپاراتتاردىڭ باعاسىن تومەندەتۋ, ولاردىڭ قولجەتىمدىلىگىن ارتتىرۋ جانە پاتسيەنتتەردىڭ قارجىلىق جۇكتەمەسىن ازايتۋ. بۇگىندە قازاقستاندا شامامەن 6 مىڭ دارىلىك زات تىركەلگەن, دەپ حابارلايدى Egemen.kz.
شەكتى باعانى رەتتەۋدىڭ جاڭا تەتىگى مەملەكەت ەسەبىنەن تەگىن بەرىلەتىن دارىلەرگە – تمككك مەن ءمامس شەڭبەرىندە, سونداي-اق كوتەرمە جانە بولشەك ساۋدا ارقىلى ساتىلاتىن پرەپاراتتارعا قاتىستى قولدانىلادى.
امبۋلاتوريالىق جانە ستاتسيونارلىق ەمدەۋگە ارنالعان تەگىن دارىلەردىڭ تىزبەسىندە باعالار 19%-عا دەيىن, ال بولشەك ساۋدا دارىحانالارىنداعى باعالار 30%-عا دەيىن تومەندەيدى.
سالا مينيسترلىگىنىڭ ءباسپاسوز قىزمەتىنىڭ مالىمدەۋىنشە جاڭارتىلعان تىزبە مىنالاردى قامتيدى: – 3475 ءدارى-دارمەكتىڭ جانە 2917 مەديتسينالىق بۇيىمنىڭ اتاۋى (تمككك جانە ءمامس شەڭبەرىندە), – 5936 پرەپارات – كوتەرمە جانە بولشەك ساۋداعا ارنالعان.
باعا تومەندەۋىنىڭ ورتاشا كورسەتكىشتەرى: – 2222 ءدارى اتاۋى بويىنشا – 18%-عا دەيىن, – 1847 مەديتسينالىق بۇيىم بويىنشا – 14%-عا دەيىن, – ءدارىحانالاردا 5492 ءدارىنىڭ اتاۋى – 30%-عا دەيىن.
سونىمەن قاتار, دارىلىك زاتتىڭ ساۋدا اتاۋىنا بەلگىلەنگەن شەكتى باعا سول پرەپاراتقا بەكىتىلگەن كوتەرمە شەكتى باعادان اسپايدى. شەكتى باعا دارىلىك زاتتىڭ شىعارۋ ءتۇرى, دوزاسى, كونتسەنتراتسياسى, كولەمى مەن قاپتاماسى, سونداي-اق ولشەم بىرلىگى ەسكەرىلە وتىرىپ ەسەپتەلەدى.
كوتەرمە جانە بولشەك ساۋداعا ارنالعان دارىلىك زاتتاردىڭ باعاسى ون رەفەرەنتتى ەلدەگى (ازەربايجان, بەلارۋس, بولگاريا, ۆەنگريا, قىرعىزستان, پولشا, رەسەي, سلوۆەنيا, تۇركيا, وزبەكستان) وندىرۋشىلەردىڭ شەكتى باعا كورسەتكىشتەرىنىڭ ورتاشا ءمانى نەگىزىندە ەسەپتەلدى. بۇل ءۇشىن Navlin Price & Access Data حالىقارالىق بازاسىنىڭ دەرەكتەرى پايدالانىلدى.
قازاقستاندا وندىرىلەتىن دارىلىك زاتتارعا شەكتى باعا بەلگىلەگەندە, قۇرامىندا بىردەي حالىقارالىق پاتەنتتەلمەگەن اتاۋى, شىعارۋ ءتۇرى, دوزاسى, كونتسەنتراتسياسى جانە كولەمى بار يمپورتتىق بالامالارعا تىركەلگەن باعالار ەسكەرىلەدى.
جاڭا تەتىك شەڭبەرىندە باعاعا تۇراقتى مونيتورينگ جۇرگىزىلىپ, نارىقتاعى ناقتى جاعدايعا سايكەستىگى تەكسەرىلىپ وتىرادى. بۇل – باعالاردىڭ سەبەپسىز وسۋىنە جول بەرىلمەيتىنىن جانە كەز كەلگەن الىپساتارلىق نەمەسە نەگىزسىز باعا كوتەرۋ ارەكەتتەرى جەدەل انىقتالىپ, جويىلاتىنىن بىلدىرەدى.
جاڭا باعا رەتتەۋ تەتىگى ەلدەگى ءدارى-دارمەك نارىعىن اشىق ءارى ءتيىمدى ەتىپ, مەديتسينالىق كومەكتى وتانداستارىمىز ءۇشىن بۇرىنعىدان دا قولجەتىمدى ەتەدى.