پرەزيدەنتتىك جاستار كادر رەزەرۆىنە ىرىكتەۋ تالابى ءتۇسىندىرىلدى

ءىس-شاراعا 250-گە جۋىق ورتالىق مەملەكەتتىك ورگاندار مەن وعان قاراستى ۇيىمداردىڭ, جەرگىلىكتى اتقارۋشى ورگاننىڭ, كۆازيمەملەكەتتىك سەكتورداعى كومپانيالاردىڭ قىزمەتكەرلەرى, سونداي-اق پرەزيدەنتتىك جاستار كادر رەزەرۆىنىڭ مۇشەلەرى قاتىستى.

مقىا توراعاسى پرەزيدەنتتىك جاستار كادر رەزەرۆىنە كەزەكتى ىرىكتەۋىنىڭ باستالۋى, بيىلعى ىرىكتەۋدىڭ ەرەكشەلىگى مەن كەزەڭدەرى تۋرالى ايتتى. ول الدىڭعى جىلدارى وتكەن ىرىكتەۋ تاجىريبەسى جاستار اراسىندا جوعارى تانىمالدىلىققا يە بولعانىن اتاپ ءوتىپ, مەملەكەتتىك باسقارۋ جۇيەسىنە جاڭا كادرلار مەن تالانتتاردى تارتۋ ماڭىزدىلىعىنا توقتالدى.

«مەملەكەت باسشىسى اتاپ وتكەندەي, «جاستار كادر رەزەرۆى – مەملەكەتتىڭ رەزەرۆى». رەزەرۆتى قالىپتاستىرۋداعى باستى ماقسات – كوكىرەگى وياۋ, كوزى اشىق جاستاردى مەملەكەتتىك باسقارۋعا تارتۋ, مەملەكەتتىك اپپارات جۇمىسىنا جاڭا سەرپىن بەرۋ, جاستار ءۇشىن اشىق جانە ءتيىمدى الەۋمەتتىك ليفت قۇرۋ. بۇگىندە مەملەكەتتىك قىزمەتكە ءبىلىمدى, ەڭبەكقور, وتانعا قىزمەت ەتۋدى وزىنە پارىز سانايتىن جاستار قاجەت», دەدى دارحان جازىقباي.

اعىمداعى جىلى رەزەرۆكە ىرىكتەۋ الەۋمەتتىك ساياسات جانە ازاماتتىق قوعام, ينفراقۇرىلىمدى, ونەركاسىپتى دامىتۋ جانە ساۋدا ساياساتى, ەكونوميكالىق جانە قارجىلىق ساياسات, تسيفرلاندىرۋ, اگروونەركاسىپتىك كەشەن جانە قورشاعان ورتانى قورعاۋ, سىرتقى ساياسات جانە ينۆەستيتسيالار سىندى مەملەكەتتىك باسقارۋدىڭ 6 سالالىق باعىتى بويىنشا جۇرگىزىلەدى.

اگەنتتىك توراعاسىنىڭ ايتۋىنشا, بيىلعى ىرىكتەۋدىڭ باستى ەرەكشەلىگى – ءار باعىت بويىنشا كانديداتتاردىڭ بىركەلكى سانىن قامتاماسىز ەتۋ ماقساتىندا ءاربىر كەزەڭدە پروپورتسيونالدى ىرىكتەۋ وتكىزۋ. رەزەرۆتىڭ ءار سالالىق باعىتى بويىنشا كۆوتالار قاراستىرىلىپ, ىرىكتەۋ سول سالالىق باعىت بويىنشا عانا جۇرگىزىلەتىن بولادى. بۇل ءادىس سالالار اراسىنداعى تەڭگەرىمدى قامتاماسىز ەتىپ, ناقتى باعىتتار بويىنشا ۇمىتكەرلەردى ىرىكتەۋدى قامتاماسىز ەتەدى.

ىرىكتەۋگە جاسى 35-تەن اسپاعان, جوعارى ءبىلىمى جانە 5 جىل جالپى جۇمىس تاجىريبەسى بار, مەملەكەتتىك ءتىلدى ۆ1 دەڭگەيىنەن تومەن ەمەس مەڭگەرگەن قر-نىڭ ازاماتى قاتىسا الادى.

قۇجاتتاردى قابىلداۋ – 1-30 ماۋسىم ارالىعىندا pkrezerv.gov.kz رەسمي پلاتفورماسىندا ونلاين رەجيمدە جۇزەگە اسىرىلادى. ىرىكتەۋ 6 كەزەڭنەن تۇرادى, ونىڭ قورىتىندىسى بويىنشا 50 ادام رەزەرۆكە قابىلدانادى.

كەزدەسۋگە ارنايى كەلگەن پرەزيدەنتتىك جاستار كادر رەزەرۆىنىڭ مۇشەلەرى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى جاساندى ينتەللەكت جانە يننوۆاتسيالار دامىتۋ كوميتەتىنىڭ توراعاسى عيززات بايتۇرسىنوۆ, وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى يۋليا وۆەچكينا, حالىقارالىق باعدارلامالار ورتالىعىنىڭ باسقارما توراعاسى ءادىل قۇسمانوۆ جانە وزگە دە رەزەرۆشىلەر وزدەرىنىڭ ىرىكتەۋگە قاتىسۋ تاجىريبەلەرىمەن ءبولىسىپ, جوبا تالانتتى جاستار ءۇشىن الەۋمەتتىك ليفت جانە مەملەكەتتىك قىزمەتتە ءوز الەۋەتىن كورسەتۋگە زور مۇمكىندىك ەكەنىن اتاپ ءوتتى.

ءىس-شاراعا قاتىسقان جاس ماماندار ىرىكتەۋ ماسەلەلەرى, ىرىكتەۋدىڭ اشىقتىعى مەن وبەكتيۆتىلىگىن قامتاماسىز ەتۋ جونىندەگى شارالارعا قاتىستى سۇراقتار قويدى.

اتاپ ءوتۋ كەرەك, بۇعان دەيىن 2019, 2021 جانە 2023 جىلدارى وتكەن ىرىكتەۋلەرگە قاتىسۋعا جالپى 60 مىڭنان استام ادام قىزىعۋشىلىق تانىتتى. ىرىكتەۋلەر قورىتىندىسى بويىنشا رەزەرۆكە 400 ادام قابىلداندى. بۇگىندە ولاردىڭ 318-ءى جاۋاپتى قىزمەتتەرگە تاعايىندالىپ, ەكونوميكانىڭ ءتۇرلى سالالارىندا ەلىمىزدىڭ دامۋىنا ءوز ۇلەستەرىن قوسىپ جاتىر.

رەزەرۆشىلەردىڭ 167 - ورتالىق مەملەكەتتىك ورگانداردا, 37 - جەرگىلىكتى اتقارۋشى ورگانداردا, 62 - ۇلتتىق كومپانيالاردا, 52 - وزگە ۇيىمداردا قىزمەت اتقارىپ جاتىر. سونداي-اق 39 رەزەرۆشى ساياسي لاۋازىمداردا, 3 - «ا» كورپۋسىنىڭ لاۋازىمدارىندا, 2 - ءماجىلىس دەپۋتاتى, 1 - ءماسليحات دەپۋتاتى بولىپ قىزمەت ەتىپ ءجۇر.