پرەمەر-مينيستر ولجاس بەكتەنوۆ «تاتنەفت» جاق باس ديرەكتورى نايل ماگانوۆپەن كەزدەسۋ وتكىزدى. اتىراۋ وبلىسىندا بۋتاديەن جانە سينتەتيكالىق كاۋچۋك ءوندىرۋ بويىنشا ءىرى ينۆەستيتسيالىق جوبانى ىسكە اسىرۋ بارىسىن قوسا العاندا, مۇناي-گاز حيمياسى سالاسىنداعى ىنتىماقتاستىقتى دامىتۋ جونىندەگى جوسپارلار تالقىلاندى.
«تاتنەفت» جاق باس ديرەكتورى نايل ماگانوۆ جوبانىڭ قازىرگى جاعدايى تۋرالى حابارلادى. بۇگىنگى تاڭدا مەردىگەر – قىتايلىق «China Tianchen Engineering Corporation» ينجينيرينگتىك كومپانياسىمەن بەلسەندى جۇمىس جۇرگىزىپ جاتىر. رەزەڭكە-تەحنيكالىق ونەركاسىپتە, شينالار وندىرىسىندە پايدالانۋعا 60 مىڭ توننا ديۆينيلستيرول سينتەتيكالىق كاۋچۋك, جول جابىندارى مەن پلاستماسسالارعا قاجەتتى 40 مىڭ توننا ستيرول-بۋتاديەن-ستيرول كاۋچۋك, جىل سايىن جوعارى وكتاندى بەنزين رەتىندە 40 مىڭ توننا مەتيل-ترەت-بۋتيل ەفيرىن شىعارۋ جوسپارلانعان. ينۆەستيتسيالىق كەزەڭ وسى جىلدىڭ 1 شىلدەسىنەن ىسكە قوسىلادى.
كەزدەسۋ بارىسىندا «قازمۇنايگاز» ۇك» اق-مەن بىرلەسىپ جۇزەگە اسىرىلاتىن «قاراتون پودسولەۆوي» ۋچاسكەسىندە گەولوگيالىق بارلاۋ جۇمىستارى تالقىلاندى. قازىردە 5,5 مىڭ مەترگە تەرەڭ بارلاۋ ۇڭعىماسىن بۇرعىلاۋ ءجۇرىپ جاتىر. سونداي-اق تەرەفتال قىشقىلى, پوليەتيلەنتەرەفتالات ءوندىرۋ جوباسىنا نازار اۋدارىلدى.
پرەمەر-مينيستر ۇكىمەت بىرلەسكەن جوسپارلاردى ىسكە اسىرۋدا, ءوزارا ءتيىمدى ىنتىماقتاستىق ءۇشىن شەشىمدەر ىزدەۋدە سىندارلى ديالوگكە اشىق ەكەنىن ءمالىم ەتتى. ەلىمىزدىڭ وتاندىق ونەركاسىپكە «تاتنەفت» تەحنولوگيالارى مەن ساراپتاماسىن ەنگىزۋگە مۇددەلىلىگى اتاپ ءوتىلدى.