الماتى قالاسى جاستار ساياساتى باسقارماسىنىڭ قولداۋىمەن «الماتى ستۋدەنتتەر اليانسى» قق ۇيىمداستىرعان شاھاردىڭ شىعارماشىل جاستارى اراسىنداعى «Jas Gala» ستۋدەنتتىك كوكتەم بايقاۋى ءوز مارەسىنە جەتتى. جەڭىستىڭ 80 جىلدىعىنا, جۇمىسشى جاستار جىلىنا, قازاقستان حالقى اسسامبلەياسىنىڭ 30 جىلدىعىنا, ن.تىلەنديەۆتىڭ 100 جىلدىعىنا, ش.قالداياقوۆتىڭ 95 جىلدىعىنا ارنالعان ستۋدەنتتەر فەستيۆالىنىڭ سالتاناتتى ماراپاتتاۋ كەشى «Concordia» تەاترىندا ءوتتى.
جىل سايىن ءداستۇرلى تۇردە وتكىزىلەتىن ونەر سايىسى الماتى قالاسىنىڭ ەڭ دارىندى, كرەاتيۆتى جانە ونەرگە قۇشتار جاستارىن ءبىر الاڭدا توعىستىرادى. فەستيۆالعا شاھاردىڭ 27 جوعارى وقۋ ورنىنان, 25 كوللەدجدەن 608 ءوتىنىم تۇسكەن. جوباعا 297 مىڭنان اسا ستۋدەنت قاتىسۋعا نيەت بىلدىرگەن. ولار ۆوكال, حورەوگرافيا, موبيلوگرافيا, اسپاپتىق ورىنداۋ, تەاتر باعىتتارى بويىنشا باق سىنادى. بايقاۋدىڭ جۇلدە قورى – 7 500 000 تەڭگە.
بيىل اسپاپتا ورىنداۋ باعىتى قازاقتىڭ ءبىرتۋار كومپوزيتورى, كۇيشى-ديريجەر نۇرعيسا تىلەنديەۆتىڭ 100 جىلدىق مەرەيتويىنا ارنالدى. بۇل باعىت بويىنشا 122 قاتىسۋشى ءوزارا باق سىناستى. توپتىق ورىنداۋدا پ.چايكوۆسكي اتىنداعى الماتى مۋزىكالىق كوللەدجىنىڭ «جەلدىرمە» ءانسامبلى, جەكە ورىنداۋدا دا وسى مۋزىكالىق كوللەدجدىڭ ستۋدەنتى نۇردانا سكەندىر جۇلدەلى 1-ورىندى يەلەندى.
ۆوكال باعىتى بويىنشا 1-ورىننىڭ جۇلدەسى قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى رىسبەك اسقارعا, حورەوگرافيا باعىتى بويىنشا قازاق باس ساۋلەت قۇرىلىس اكادەمياسى كوللەدجىنىڭ «Dapamine» توبىنا, تەاتر باعىتى بويىنشا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ «Qaganat» تەاترىنا, موبيلوگرافيا باعىتى بويىنشا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتى ءمولدىر وتەپوۆاعا تابىستالدى.
جاستار ساياساتى باسقارماسىنىڭ باسشىسى ازيز قاجدەنبەك جىلدان-جىلعا دەڭگەيى جەتىلىپ كەلە جاتقان «Jas Gala» شىعارماشىلىق بايقاۋىنىڭ جاستارعا سەرپىن بەرەر ماڭىزى تۋرالى ايتا كەلىپ, بارشا قاتىسۋشىلار مەن كەش قوناقتارىنا ءوز العىسىن ءبىلدىردى.
«Jas Gala» بايقاۋى جاستار اراسىندا جىلدان-جىلعا ۇلكەن سۇرانىسقا يە بولىپ كەلەدى. بۇل تەك شىعارماشىلىق دودا عانا ەمەس, بولاشاقتا جاستار شىعارماشىلىعىنا جول اشاتىن ۇلكەن مۇمكىندىك دەپ سانايمىز. بيىلعى بايقاۋدىڭ ەرەكشەلىگى, جەڭىمپازدار جۇلدەلى سىيلىقتاردان بولەك, الماتى قالاسىنىڭ اكىمى ەربولات دوساەۆتىڭ قولداۋىمەن قالانىڭ اۋقىمدى ءارى ماڭىزدى ءىس-شارالارىندا ونەر كورسەتەتىن بولادى.
قالاداعى جاڭا تالانتتاردى تانىپ, ۇزدىك جاستاردى انىقتاۋعا مۇمكىندىك بەرەتىن بۇل جوبا ءبىر ايدان استام ۋاقىتقا سوزىلدى. فەستيۆالدىڭ جابىلۋ سالتاناتىنا بەلگىلى, ونەر جانە مادەنيەت قايراتكەرلەرى, تانىمال جۇلدىزدار, سونداي-اق قوعامدىق جانە شىعارماشىلىق ورتانىڭ بەلسەندى وكىلدەرى قاتىستى.
الماتى