مەملەكەت باسشىسى مادەنيەت جانە ونەر قىزمەتكەرلەرىن ماراپاتتاۋ راسىمىندە ەلىمىزدى كوركەيتۋ – بارشاعا ورتاق مىندەت ەكەنىن اتاپ ءوتىپ, «تازا قازاقستان» جالپىۇلتتىق اكتسياسىنىڭ ماقساتى دا وسىعان نەگىزدەلگەنىن ايتتى, دەپ جازادى Egemen.kz.
مەملەكەت باسشىسى ەلىمىزدە سوڭعى جىلدارى اۋقىمدى رەفورمالار جۇزەگە اسىرىلعانىن ەسكە سالىپ, بۇل ۇدەرىس ساياسات پەن ەكونوميكادان باستاپ, بارلىق سالاعا اسەرىن تيگىزگەنىنە توقتالدى.
«ۇلتتىق بولمىسىمىز زامانعا ساي وزگەرە باستادى. مۇنى رەفورمانىڭ تاعى ءبىر ماڭىزدى ناتيجەسى دەۋگە بولادى. مادەنيەت پەن ونەردىڭ اعارتۋشىلىق الەۋەتى وراسان زور. بۇل سالا ۇلت ساناسىن جاڭعىرتۋعا ەرەكشە ىقپال ەتەدى. وسكەلەڭ ۇرپاق سىزدەردىڭ تۋىندىلارىڭىزدان ءتالىم-تاربيە الادى. قوعامدا جاڭا ەتيكا مەن قۇندىلىقتار قالىپتاسادى. ونەر-ءبىلىم ارقىلى جاستارىمىز جاسامپاز, جاڭاشىل ءارى ەڭبەكقور بولىپ وسەدى. سوندا ءبىز شىن مانىندە ادىلەتتى, قاۋىپسىز, تازا جانە وركەنيەتتى مەملەكەت بولامىز. مادەنيەت جانە ونەر قىزمەتكەرلەرى وسى ماڭىزدى جۇمىسقا زور ۇلەس قوسا بەرەدى دەپ سەنەمىن», دەدى قاسىم-جومارت توقاەۆ.