بۇگىن ۇكىمەت وتىرىسىندا عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ قازاقستاندا جوعارى ءبىلىمنىڭ قولجەتىمدىلىگى مەن ساپاسىن ارتتىرۋعا باعىتتالعان ستۋدەنتتەردى مەملەكەتتىك قولداۋ شارالارى تۋرالى باياندادى, دەپ جازادى Egemen.kz.
كەيىنگى 5 جىلدا قازاقستاندا گرانت سانى 1,4 ەسەگە وسكەن. 2024-2025 وقۋ جىلىندا 93 116 گرانت بولىنگەن. تالعات ەشەنقۇلوۆ جاڭا وقۋ جىلىنان باستاپ ءبىلىم الۋشىلاردىڭ ستيپەندياسى ارتاتىنىن مالىمدەدى.
«باكالاۆريات ءۇشىن ستيپەنديا - 52 372 تەڭگە, ماگيستراتۋرادا -117 098 تەڭگە جانە دوكتورانتتار ءۇشىن - 262 500 تەڭگەنى قۇرايتىن بولادى. ياعني, بيىل باكالاۆريات دەڭگەيىندە ستيپەنديا كولەمى 2020 جىلمەن سالىستىرعاندا 2 ەسەگە, ال ماگيستراتۋرا جانە دوكتورانتۋرا دەڭگەيىندە 1,75 ەسەگە ارتادى», دەدى ۆيتسە-مينيستر. سونداي-اق, ستۋدەنتتەردى جاتاقحانامەن قامتۋ جۇمىستارى دا بەلسەندى جۇرگىزىلىپ جاتىر. مينيسترلىك دەرەگىنشە, جاتاقحانالارداعى ورىن تاپشىلىعى 2019 جىلى 82 500-دەن 2024 جىلى 14 873-كە دەيىن ازايعان. ەرەكشە ءبىلىم بەرۋ قاجەتتىلىكتەرى بار بالالار ءۇشىن جاتاقحانالاردا ورىن بەرۋ جونىندەگى مەملەكەتتىك قىزمەت پرواكتيۆتى فورمات بويىنشا ۇسىنىلادى. ايتا كەتەيىك, بىلتىر دا جوعارى ءبىلىم الۋشىلار ستيپەندياسى 15-50 پايىزدىق شەكتە كوبەيگەن ەدى.