پاۆلودار وبلىسىندا سۋعا ءتۇسۋ ماۋسىمىنا وراي 47 جاعاجاي جاساقتالادى. ولاردىڭ ينفراقۇرىلىمى جاقسارتىلىپ, سۋعا تۇسەتىن جەرلەرگە بارلاۋ جۇرگىزىلەدى, دەپ حابارلايدى Egemen.kz.
اشىلاتىن جاعاجايدىڭ 27-ءسى – كوممۋنالدىق, وزگەسى جەكە مەنشىك. ماماندار ەرتىس وزەنى ءوز ارناسىنا تۇسكەن سوڭ سۇڭگۋىرلەر سۋعا سۇڭگىپ, جاعاجايلاردى بارلاپ شىعاتىنىن ايتادى. سۋعا ءتۇسۋ ماۋسىمى شامامەن ماۋسىم ايىنىڭ باسىندا اشىلۋى ىقتيمال.
- قازىر قۇتقارۋ قىزمەتتەرى دەمالۋشىلاردىڭ قاۋىپسىزدىگىن قامتاماسىز ەتەتىن ارنايى مامانداردى دايارلاپ جاتىر. اسىرەسە بالالاردىڭ قاۋىپسىزدىگىن قامتاماسىز ەتۋ شارالارىنا ەرەكشە ءمان بەرىلەدى. وبلىس اۋماعىندا بيىل 123 كاركاستى-ءمودۋلدى باسسەين قىزمەت ەتەدى. ال سۋعا تۇسۋگە تىيىم سالىنعان ايماقتارداعى ەسكەرتۋ بەلگىلەرىنە قوسىمشا QR-كودتار ورناتىلادى. QR-كودتار ارقىلى دەمالۋشىلار جاعاجاي تۋرالى اقپارات الا الادى. ياعني ونىڭ تەرەڭدىگى, قانداي دا ءبىر وقىس وقيعا بولاتىن بولسا, وسى اقپاراتتا بەلگىلەنەدى. قازىرگى تاڭدا 45 QR-كود ورناتىلعان,-دەيدى وڭىرلىك توتەنشە جاعدايلار دەپارتامەنتى ازاماتتىق قورعانىس باسقارماسىنىڭ وفيتسەرى تەمىرلان جاپالباي.
وتكەن جىلى وبلىستا 8 ادام سۋعا كەتىپ, كوز جۇمعان. ونىڭ بىرەۋى بالا. توتەنشە جاعداي ماماندارى قايعىلى وقيعالاردىڭ الدىن الۋ ءۇشىن اتا-انالار بالالارىن سۋ ايدىندارىنا باقىلاۋسىز جىبەرمەۋ كەرەك ەكەنىن ەسكەرتەدى.
پاۆلودار وبلىسى