مەملەكەتتىك كەڭەسشى ەرلان قاريننىڭ توراعالىعىمەن قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ كەزەكتى وتىرىسى ءوتتى.
ءىس-شاراعا ءتيىستى مەكەمەلەردىڭ وكىلدەرى, سونداي-اق قازاقستانداعى يۋنەسكو كوميتەتتەرى مەن قاۋىمداستىقتارىنىڭ باسشىلارى قاتىستى.
جيىندا يۋنەسكو جانە يسەسكو ۇيىمدارىمەن اراداعى ىقپالداستىقتى دامىتۋعا قاتىستى باسىمدىقتار مەن جوسپارلار تالقىلاندى. ەرلان قارين مەملەكەت باسشىسىنىڭ يۋنەسكو-مەن ىنتىماقتاستىق ماسەلەلەرىنە ەرەكشە نازار اۋداراتىنىن ايتىپ, ونىڭ تاپسىرمالارىن ورىنداۋدىڭ ماڭىزىنا توقتالدى.
يۋنەسكو ۇيىمى وتكەن جىلدىڭ سوڭىندا قازاقتىڭ بىرەگەي سالتى – «بەتاشاردى» ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك (ۇلگىلى مۇرالار) تىزىمىنە ەنگىزگەن ەدى. وسى رەتتە ۇلتتىق كوميسسيا مۇشەلەرى ۇيىمنىڭ بۇل شەشىمىن ەرەكشە ىقىلاسپەن قابىلدادى. يۋنەسكو-نىڭ الماتىداعى وڭىرلىك كەڭسەسىنىڭ باسشىسى امير پيريچ مەملەكەتتىك كەڭەسشى ەرلان قارينگە «بەتاشاردىڭ» اتالعان تىزىمگە ەنگەنى تۋرالى تۇپنۇسقا سەرتيفيكاتتى تابىس ەتتى.
سونداي-اق وتىرىستا قازاقستاننىڭ مۇراعاتتىق جانە تاريحي-قۇجاتتىق ماتەريالدارىن يۋنەسكو-نىڭ «الەم جادى» اتتى حالىقارالىق تىزىمىنە ەنگىزۋگە قاتىستى جۇمىستاردى جانداندىرۋ قاجەتتىگىنە نازار اۋدارىلدى. مىسالى, 14 جىل ۇزىلىستەن كەيىن بيىل ءساۋىر ايىندا وسى تىزىمگە «حاندار شەجىرەسى» قولجازباسى ەنگىزىلدى.
باسقوسۋدا الداعى ءىس-شارالارعا قاتىستى ماسەلەلەر دە قاراستىرىلدى. اتاپ ايتقاندا, يۋنەسكو شتاب-پاتەرىندە نۇرعيسا تىلەنديەۆتىڭ 100 جىلدىق مەرەيتويىن اتاپ ءوتۋ جانە سامارقاند قالاسىندا وتەتىن يۋنەسكو-نىڭ 43-ءى باس كونفەرەنتسياسىنا دايىندىق جۇمىستارى تالقىلاندى.