سەنات توراعاسى ماۋلەن اشىمباەۆتىڭ قاتىسۋىمەن ء«بىر ەل – ءبىر مۇددە» دەپۋتاتتىق توبىنىڭ كەڭەيتىلگەن وتىرىسى ءوتتى. ءىس-شارا بەيبىتشىلىك پەن وركەندەۋ جولىندا تاقىرىبىنا ارنالدى.
ماۋلەن اشىمباەۆ قاتىسۋشىلارعا ءىلتيپات بىلدىرە كەلىپ, پرەزيدەنت قاسىم-جومارت توقاەۆتىڭ باستاماسىمەن جۇرگىزىلىپ جاتقان اۋقىمدى ساياسي رەفورمالاردىڭ ناتيجەسىندە قازاقستان حالقى اسسامبلەياسىنىڭ قىزمەتى تىڭ سەرپىن العانىن اتاپ ءوتتى. سونداي-اق پالاتا سپيكەرى ەلىمىزدە بەيبىتشىلىك پەن كەلىسىمدى نىعايتۋ ايرىقشا قوعامدىق-ساياسي ماڭىزعا يە ەكەنىن ايتتى. اسسامبلەيانىڭ جۇمىسى تابان تىرەيتىن «بىرلىگىمىز – ارالۋاندىقتا» قاعيداتى ينكليۋزيۆتى مەملەكەتتىك ساياساتتىڭ نەگىزگى ءمانىن كورسەتەدى.
– پرەزيدەنت قاسىم-جومارت توقاەۆ قازاقستان حالقى اسسامبلەياسىنىڭ سەسسياسىندا سويلەگەن سوزىندە اسسامبلەيانىڭ باستى مىندەتى قازاقستان حالقىنىڭ تاتۋلىعى مەن اۋىزبىرشىلىگىن, مەملەكەتىمىزدىڭ تۇتاستىعى مەن كيەلى تاۋەلسىزدىگىمىزدى نىعايتۋ ەكەنىن ايرىقشا اتاپ ءوتتى. مەملەكەت باسشىسى بەلگىلەپ بەرگەن ماقسات-مىندەتتەر قوعامدا كەلىسىم, سىيلاستىق جانە ىنتىماقتاستىق سياقتى قۇندىلىقتاردى بەرىك ورنىقتىرۋ جولىنداعى كۇن ءتارتىبىن ايقىندايدى. ەلىمىزدىڭ جان-جاقتى دامۋىن كوزدەيتىن وسى ستراتەگيالىق باعداردى قولداۋ اسا ماڭىزدى. ازاماتتىق قوعامنىڭ بەلسەندى قولداۋىنىڭ ناتيجەسىندە جانە اسسامبلەيانىڭ بارلىق ينستيتۋتتارىن, مەملەكەتتىك قۇرىلىمداردى, دەپۋتاتتىق كورپۋستى جۇمىلدىرا وتىرىپ, ءبىز تۇراقتى, ادىلەتتى, الەۋمەتتىك جانە ينكليۋزيۆتى قازاقستان قالىپتاستىرا الامىز, – دەدى م.اشىمباەۆ.
سەنات توراعاسى اتاپ وتكەندەي, قازاقستان حالقى اسسامبلەياسى قوعامدىق كەلىسىم مەن ەتنوسارالىق قاتىناستىڭ ۇلتتىق ۇلگىسىن كورسەتكەن ماڭىزدى ينستيتۋتقا اينالدى. سونىمەن قاتار ول قوعامدىق كەلىسىم مەن جالپىۇلتتىق بىرلىك سالاسىنداعى زاڭنامالىق قامتاماسىز ەتۋ جۇمىستارىن ۇيلەستىرۋدىڭ جانە ورتاق مۇددەگە كۇش جۇمىلدىرۋدىڭ ماڭىزىنا توقتالىپ, بۇل ء«بىر ەل – ءبىر مۇددە» دەپۋتاتتىق توبىنىڭ نەگىزگى مىندەتى ەكەنىن ايتتى. بۇعان قوسا سەنات توراعاسى اتالعان توپ قحا-نى 2030 جىلعا دەيىنگى دامىتۋ تۇجىرىمداماسىنىڭ نەگىزگى باسىمدىقتارىن تالقىلايتىن ماڭىزدى الاڭ بولا الاتىنىن تىلگە تيەك ەتتى.
– مەملەكەت باسشىسىنىڭ جۇيەلى رەفورمالارىن ىسكە اسىرۋدا اسسامبلەيانىڭ ءرولىن ءتۇسىنۋ جانە ونى تۇجىرىمداۋ اسا ماڭىزدى. قازىر ءبىزدىڭ الدىمىزدا ادىلەتتى, الەۋمەتتىك جانە ينكليۋزيۆتى قازاقستان قۇرۋ مىندەتى تۇر. بۇل ىستە اسسامبلەيا ۇلكەن ءرول اتقارۋعا ءتيىس. جاڭا تۇجىرىمدامادا وسى جۇمىستىڭ باعىت-باعدارىن ناقتى كورسەتىپ, جازۋعا بولادى. جالپى, ءبىزدىڭ حالقىمىزعا قوناقجايلىق, سانانىڭ اشىقتىعى, ۇتقىرلىق, قامقورلىق, جاۋاپكەرشىلىك سياقتى قاسيەتتەر ءتان. وسىنداي قۇندىلىقتار وزىق جانە تارتىمدى بولۋعا ۇمتىلعان ەلدىڭ جاڭا برەندتەرىنىڭ بىرىنە اينالۋى كەرەك. بۇل – ۇلتتىق مۇددەنى حالىقارالىق دەڭگەيدە دارىپتەۋدىڭ زاماناۋي تاسىلدەرىنىڭ ءبىرى. مۇندا دا قازاقستان حالقى اسسامبلەياسى ماڭىزدى ءرول اتقارا الادى. سونداي-اق اسسامبلەيا جاستارمەن بەلسەندى جۇمىس جۇرگىزۋى قاجەت. سول ارقىلى كەلىسىم مەن ديالوگ ساياساتىنىڭ ساباقتاستىعىن قامتاماسىز ەتۋگە جول اشىلادى. بۇل زاماناۋي جانە كرەاتيۆتى ءتاسىلدى تالاپ ەتەتىنى انىق, – دەپ پالاتا توراعاسى سەنات جاڭا تۇجىرىمدامانى ازىرلەۋ جۇمىستارىنا بەلسەندى قاتىساتىنىن ايتتى.
ماۋلەن اشىمباەۆ ءوز سوزىندە الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق بارىسىنا دا نازار اۋداردى. ول اتالعان فورۋم قحا سياقتى حالىقتىق ديپلوماتيا مەن ديالوگ جانە قۇرمەت پەن سەنىم مادەنيەتىن ىلگەرىلەتۋگە قىزمەت ەتەتىنىن جەتكىزدى.
وتىرىستا قوزعالعان ماسەلەلەردى تالقىلاۋعا پارلامەنتتىڭ جانە وبلىستىق ءماسليحاتتاردىڭ دەپۋتاتتارىمەن بىرگە قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ, «رودينا» اگروفيرماسى» جشس ديرەكتورى يۆان ساۋەر, قاراعاندى وبلىسى اكىمىنىڭ ورىنباسارى الىبەك الدەنەي, مەملەكەتتىك ورگاندار مەن ساياسي پارتيا فراكتسيالارىنىڭ وكىلدەرى, سەنات جانىنداعى ساراپشىلار كلۋبىنىڭ مۇشەلەرى جانە تاعى باسقا بەلسەندى ازاماتتار قاتىستى.