بۇگىن وسكەمەننىڭ ورتالىق الاڭىندا مەملەكەتتىك مەكەمەلەر مەن جەكەلەگەن كومپانيالار وقۋ ورنىن ءتامامداپ جاتقان تۇلەكتەرگە, جۇمىسسىز ازاماتتارعا جۇمىس ورىندارىن ۇسىندى. سونىمەن قاتار, جاستارعا باسپاناعا قول جەتكىزۋگە دە باعىت-باعدار بەرىلدى.
بۇل كۇنى «شىعىس مامانى» اتتى بوس جۇمىس ورىندار جارمەڭكەسىنە 2 مىڭنان استام ادام قاتىسىپ, وزدەرىنە لايىق دەپ تاپقان جۇمىس بەرۋشىلەرمەن تىلدەستى. ۇلتتىق ستاتيستيكا بيۋروسىنىڭ مالىمەتىنە سۇيەنسەك, بىلتىر ەلىمىزدە جۇمىسسىزدار سانى 448,2 ادام بولعان. بۇل 2023 جىلمەن سالىستىرعاندا 0,5%-عا كوپ. ال, بۇگىنگى جارمەڭكە تۇلەكتەر ءۇشىن تاپتىرماس مۇمكىندىك. مامان تاپپاي جۇرگەن مەكەمەلەرگە دە وتە ءتيىمدى.
– بۇل جولى جارمەڭكەگە اۋداندار مەن قالالاردان 113 جۇمىس بەرۋشى 2 مىڭنان استام بوس جۇمىس ورنىن ۇسىندى. جەرگىلىكتى وقۋ ورىندارىنان 2300-گە جۋىق ستۋدەنت كەلىپ قاتىسىپ جاتىر. تۇلەكتەر ديپلوم العاننان كەيىن بىردەن جۇمىسقا ورنالاسىپ, الىس اۋداندارعا بارىپ جۇمىس ىزدەمەۋ ءۇشىن بارلىعىن ءبىر الاڭدا جينادىق. قازىر وبلىستا مۇعالىم, دارىگەر, مەدبيكە, قۇرىلىسشى ماماندىقتارىنا سۇرانىس ارتقانىن بايقاپ وتىرمىز. بۇل جاستاردىڭ ماماندىقپەن جۇمىسقا ورنالاسۋىنا جاقسى مۇمكىندىك دەپ ويلايمىن, – دەدى مانساپ ورتالىعىنىڭ ديرەكتورى ارايلىم ەسىمبەكوۆا.
شەكارا شەبىندەگى مارقاكول اۋدانى اكىمدىگىنىڭ وكىلدەرى دە بۇگىنگى شاراعا ارنايى كەلگەن. ولار مەملەكەتتىك قىزمەتكە قىزىعۋشىلىق بىلدىرگەن جاس مامانداردى جاڭا اۋدانعا جۇمىسقا شاقىرىپ ءجۇر.
– قازىر بىزدە دەربەس بولىمدەردە, اكىم اپپاراتىندا, الەۋمەتتىك جۇمىسپەن اينالىساتىن 28 بوس جۇمىس ورنى بار. قىزىعۋشىلىق بىلدىرگەندەر ايتارلىقتاي كوپ دەپ ايتا المايمىز, بىراق كەلىپ جاتىر. اۋىلدا جۇمىس ىستەۋگە نيەتتى جاستارعا قازىر مۇمكىندىك كوپ. «ديپلوممەن اۋىلعا» باعدارلاماسى ارقىلى باسپانا ساتىپ الۋعا نەمەسە سالۋعا نەسيە جانە كوتەرمە جاردەماقى بەرىلەدى, – دەدى مارقاكول اۋدانى اكىمى اپپاراتى جالپى ءبولىمىنىڭ باسشىسى اسەم بولىسوۆا.
سونداي-اق, كاتونقاراعاي اۋدانىندا سالىنىپ جاتقان اۋەجايعا دا مامانداردىڭ قاجەت ەكەندىگى ايتىلدى. اسىرەسە, اۋە قوزعالىس قىزمەتىنە ديسپەتچەر, مەتەورولوگيالىق قىزمەتكە سينوپتيكتەر جانە راديوتەحنيكالىق جابدىقتارعا قىزمەت كورسەتۋ ينجەنەرلەرى قاجەت.
ودان بولەك پوليتسيا قىزمەتىنە, توتەنشە جاعدايلار دەپارتامەنتىنە دە ماماندار ىزدەستىرىلىپ جاتتى.
شىعىس قازاقستان وبلىسى