حالىقارالىق تاەكۆوندو فەدەراتسياسى 2026 جىلعى گران-ءپريدىڭ فينالدىق كەزەڭى استانادا وتەدى دەگەن شەشىم قابىلدادى. ءسويتىپ, ەلىمىزدىڭ جانكۇيەرلەرىنە الەمنىڭ ءار قيىرىنان جينالعان ەڭ ۇزدىك دايان شەبەرلەرىنىڭ ونەرىن تاماشالاۋ باقىتى بۇيىرىپ وتىر. جارىس بارىسىندا 2028 جىلى لوس-اندجەلەستە الاۋى تۇتاناتىن جازعى وليمپيا ويىندارىنىڭ جولدامالارى ساراپقا سالىنادى.
16–21 قىركۇيەك ارالىعىندا قىتايدىڭ شەنچجەن قالاسىندا تەننيستەن بيللي دجين كينگ كۋبوگىنىڭ شيرەك فينالدىق سايىستارى وتەدى. اتالعان جارىستا ەلىمىزدىڭ ايەلدەر قۇراماسى اقش-پەن شەبەرلىك بايقاسادى. ولاردان بولەك, وسى مەجەدە جاپونيا مەن ۇلىبريتانيا, ۋكراينا مەن يسپانيا, يتاليا مەن قىتاي تەننيسشىلەر ءوزارا كۇش سىناسادى.
سەمسەرلەسۋدەن كولۋمبيانىڭ استاناسى – بوگاتودا ۇيىمداستىرىلعان گران-پري ءتۋرنيرىن رۋسلان قۇربانوۆ كۇمىس مەدالمەن قورىتىندىلادى. باستاپقى باسەكەلەردە قارسىلاس شىداتپاعان جەرلەسىمىز جارتىلاي فينالدا وزبەكستاندىق ۆاديم انوحيننەن 15:14 ەسەبىمەن ايلاسىن اسىردى. بىراق فينالدا پاريج وليمپياداسىنىڭ كۇمىس جۇلدەگەرى, ازيا ويىندارىنىڭ جەڭىمپازى, جاپونيالىق اكيرا كوماتاعا جول بەردى – 10:15.
كەزىندە UFC-دە ونەر كورسەتكەن 34 جاستاعى ايگىلى ارالاس جەكپە-جەك شەبەرى دامير يسماعۇلوۆ (26-3, 14 كو) كەلەسى كەزدەسۋىن 27 مامىردا استانادا وتكىزەدى. «الاش پرايد» پروموۋشەنى ۇيىمداستىرىپ وتىرعان تۋرنيردە قانداسىمىز 41 جاستاعى برازيليالىق الان پاتريكپەن (15-4, 6) كۇش سىناسادى. ول دا كەزىندە UFC-دە ايقاسقان ساقا سپورتشى.