اتىراۋداعى س.مۇقاشەۆ اتىنداعى جوعارى پوليتەحنيكالىق كوللەدجىندە جاڭاشىل ستۋدەنتتەر وقيدى. ولار ونەرتاپقىشتىعىمەن تانىلىپ ءجۇر. ماسەلەن, 3-كۋرس ستۋدەنتى نۇرداۋلەت كەنجەباي اۋا تازارتاتىن قۇرىلعى ويلاپ تاپتى. قۇرىلعىنىڭ سىرتقى كورىنىسىن جاساندى ينتەللەكت ارقىلى بەينەلەگەن.
«ال سۇزگىسىنە بەلسەندىرىلگەن كومىردى پايدالانۋدى ۇيعاردىم. بۇل قۇرىلعىنى زەرتحانالارداعى سورعى شكافتاردا قولدانۋعا بولادى. ويتكەنى, حيميالىق زەرتتەۋ جۇرگىزۋ كەزىندە قۇرىلعى ۋلى گازدىڭ 60 پايىزىن تۇتىپ قالادى», دەيدى ن.كەنجەباي.
قازىر ول مۇناي جانە گازدى قايتا وڭدەۋ تەحنولوگياسى ماماندىعىندا وقيدى. زەرتتەۋ كەزىندە جاڭا قۇرىلعى بەلسەندىرىلگەن كومىردىڭ ۋلى گازىن جاقسى سىڭىرەتىنىن انىقتاپتى.
«كومىردى ماتاعا سالىپ وڭدەدىم. بۇل يدەيانى زەرتتەۋگە 2-3 اپتا, ال سۇزگىسىن دايىنداۋعا ءۇش اي جۇمسادىم. بولاشاقتا وسى زەرتتەۋىمدى جالعاستىرعىم كەلەدى», دەيدى نۇرداۋلەت كەنجەباي.
ال ەسەپتەۋ تەحنيكاسى جانە اقپاراتتىق جەلىلەر ماماندىعىندا ءبىلىم الىپ جۇرگەن شاديار جانداربەك, نۇريسلام وتەپبەرگەن, دامير قادىرعالي مەن ارتۋر ومىرعالي جاڭا قوسىمشا جاساپ شىعاردى. قوسىمشاعا «NeXa» اتاۋىن بەرىپتى. وندا بەس باعىتتى قامتىعان تەست تاپسىرمالارى جۇكتەلگەن.
«قوسىمشا – بەيىمدەلگەن كۋرس بازاسى بار ءبىلىم بەرۋ پلاتفورماسى. وسى ارقىلى ءبىلىم الۋشىلار ءوز دەڭگەيىن تەكسەرۋىنە بولادى. ازىرگە تەست تاپسىرمالارى ورىس تىلىندە جۇكتەلدى. الداعى ۋاقىتتا قازاق جانە اعىلشىن تىلىندەگى نۇسقاسى قوسىلادى. تەست تاپسىرمالارىنىڭ باعىتىن كوبەيتەمىز», دەيدى اۆتوردىڭ ءبىرى ش.جانداربەك.
جاڭاشىل ستۋدەنت بىلتىرعى جەلتوقساندا «تاۋەلسىزدىك ۇرپاقتارى» جوباسىندا «اقپاراتتىق تەحنولوگيا» باعىتى بويىنشا جەڭىمپاز اتانعان.
اتىراۋ وبلىسى