ۇلتتىق مەكتەپ ليگاسى – قازاقستانداعى بالالار اراسىنداعى ەڭ ءىرى سپورتتىق جوبا. بۇگىن استانادا 7–8 سىنىپ وقۋشىلارىنا ارنالعان وسى جوبانىڭ رەسپۋبليكالىق فينالى باستالدى. قورىتىندى كەزەڭگە ىرىكتەۋ كەزەڭىنەن ۇزدىك شىققان 5000-نان استام وقۋشى قاتىسىپ جاتىر, دەپ جازادى Egemen.kz.
سپورت سۇيەر وقۋشىلار مەكتەپ باعدارلاماسىنا ەنگىزىلگەن 10 سپورت ءتۇرى: توعىزقۇمالاق, شاحمات, جەڭىل اتلەتيكالىق كروسس, «بىلعارى دوپ» فۋتبولى, ۇستەل تەننيسى, «شۇبار دوپ» ۆولەيبولى, «التىن دوپ» باسكەتبولى, اسىق اتۋ (ۇلدار ءۇشىن), بەس اسىق (قىزدار ءۇشىن) جانە «ۇشقىر دوپ» گاندبولى بويىنشا جۇلدەگە تالاسادى.
«بيىل جارىستار العاش رەت رەسپۋبليكالىق دەڭگەيدەگى كاسىبي سپورت كەشەندەرىندە ءوتىپ جاتىر. ويىندارعا ءتيىستى سپورت فەدەراتسيالارىنان شاقىرىلعان تورەشىلەر تورەلىك ەتەدى.
ليگا ءتورت كەزەڭنەن تۇرادى: مەكتەپىشىلىك, اۋداندىق/قالالىق, وبلىستىق جانە رەسپۋبليكالىق فينال. قاتىسۋ شارتى – كوماندا تەك ءبىر مەكتەپتىڭ وقۋشىلارىنان قۇرالۋى ءتيىس. سپورت مەكتەپتەرى, ينتەرناتتار مەن اكادەميا كوماندالارى جارىسقا قاتىستىرىلمايدى. بۇل ليگانىڭ ءادىل ءارى بارلىق وقۋشى ءۇشىن قولجەتىمدى بولۋىن قامتاماسىز ەتەدى», دەلىنگەن وقۋ-اعارتۋ مينيسترلىگىنىڭ حابارلاماسىندا.
وقۋ جىلى بويى بۇل ليگاعا قالالار مەن اۋىلداردان بارلىعى 3,5 ميلليوننان استام وقۋشى قاتىستى.