2024 جىلدىڭ قورىتىندىسى بويىنشا تالدىقورعان قالاسىندا الەۋمەتتىك قولداۋ شارالارى اياسىندا 8 357 ازاماتقا كومەك كورسەتىلدى. بۇل ساناتقا از قامتىلعان وتباسىلار, مۇمكىندىگى شەكتەۋلى جاندار, جالعىزباستى قارتتار جانە باسقا دا الەۋمەتتىك وسال توپتار كىرەدى. قالالىق اكىمدىكتىڭ باستاماسىمەن اتالعان ازاماتتارعا ناقتى قولداۋ كورسەتۋ باعىتىندا جۇيەلى جۇمىستار اتقارىلىپ كەلەدى.
«ازاماتتارعا ارنالعان ۇكىمەت» مەملەكەتتىك كورپوراتسياسى» كەاق ارقىلى تۇرعىندارعا جالپى سوماسى 1 391,0 ميلليون تەڭگە كولەمىندە الەۋمەتتىك تولەمدەر جۇرگىزىلدى. بۇل تولەمدەر زەينەتاقى, جاردەماقى, اتاۋلى الەۋمەتتىك كومەك جانە باسقا دا مەملەكەتتىك قولداۋ تۇرلەرىن قامتيدى.
تالدىقورعان قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ءمادي قايراتقالي ۇلى شاكەنوۆتىڭ ايتۋىنشا, الەۋمەتتىك ساياساتتى جۇزەگە اسىرۋدا مەملەكەتتىك ورگاندار مەن جەرگىلىكتى ءوزىن-ءوزى باسقارۋ قۇرىلىمدارىنىڭ ۇيلەسىمدى جۇمىسى ماڭىزدى ءرول اتقارىپ وتىر.
– مەملەكەتتىك قولداۋ شارالارىنىڭ نەگىزگى ماقساتى – حالىقتىڭ ءالسىز توبىنا قولداۋ كورسەتۋ ارقىلى ولاردىڭ ءومىر ءسۇرۋ ساپاسىن ارتتىرۋ. ءبىز تەك قارجىلاي كومەكتەن بولەك, پسيحولوگيالىق, قۇقىقتىق جانە الەۋمەتتىك بەيىمدەۋ قىزمەتتەرىن دە ۇسىنامىز, – دەدى ءبولىم باسشىسى.
بۇدان بولەك, جىل ىشىندە قالادا بىرقاتار جاڭا باستامالار قولعا الىنىپ, الەۋمەتتىك قىزمەت كورسەتۋ ورتالىقتارىنىڭ قىزمەتى كەڭەيتىلدى. سونىمەن قاتار, مۇمكىندىگى شەكتەۋلى ازاماتتارعا ارنالعان ينكليۋزيۆتى باعدارلامالار ىسكە اسىرىلىپ, ولارعا قاجەتتى قۇرال-جابدىقتارمەن قامتاماسىز ەتۋ جۇمىستارى جۇرگىزىلدى.
الەۋمەتتىك قولداۋ شارالارى الداعى ۋاقىتتا دا جالعاسىن تابادى. بيلىك وكىلدەرى بۇل باعىتتاعى جۇمىستاردىڭ ناتيجەلىلىگىن ارتتىرۋ ماقساتىندا تسيفرلاندىرۋ, پرواكتيۆتى قىزمەت كورسەتۋ جانە قوعاممەن كەرى بايلانىستى نىعايتۋ باعىتىندا جۇمىستاردى كۇشەيتۋدى جوسپارلاپ وتىر.