ەلىمىزدە «باتىرلارعا تاعزىم» پورتالى ىسكە قوسىلعان العاشقى كۇندەرى-اق وڭىرلەردىڭ بەلسەندىلىگى بايقالدى. دەگەنمەن اقپاراتتار ءار وڭىردەن اركەلكى كەلدى. پورتالعا كەلگەن انكەتالاردىڭ سانى كۇن سايىن ارتىپ كەلەدى. ماسەلەن, العاشقى ايدا قاراعاندى وبلىسى مەن الماتى قالاسى تۇرعىندارى بەلسەندىلىك تانىتقان. بۇل وڭىرلەر – سوعىسقا قاتىسقان وتانداستارىمىزدىڭ ەڭ كوپ شوعىرلانعان ايماقتارىنىڭ ءبىرى.
25-30 ءساۋىر ارالىعىنداعى ەسەپ بويىنشا, ەڭ كوپ انكەتا اقمولا وبلىسىنان تۇسكەن – ءۇش كۇن ىشىندە بۇل وڭىردەن 276 ءوتىنىش كەلىپ ءتۇستى. جامبىل (108 انكەتا), الماتى (9 انكەتا), اقتوبە (42 انكەتا), اتىراۋ (21 انكەتا) جانە شىعىس قازاقستان وبلىسى (34 انكەتا) دا – بەلسەندىلىك تانىتقان وڭىرلەر قاتارىندا. ال شىمكەنت, اباي جانە ۇلىتاۋ وبلىستارىنان ازىرگە اقپارات كەلىپ تۇسپەگەن. سونىمەن قاتار رەسەي فەدەراتسياسىنان – 49, ۋكراينادان – 12, بەلارۋس پەن قىرعىزستاننان بىرنەشە انكەتا قابىلدانعان. جالپى ەسەپ بويىنشا پورتال ارقىلى 793 انكەتا تىركەلىپ, سايتقا ەنگىزىلىپتى.
ەستەرىڭىزگە سالا كەتسەك, جۋىردا مايدانگەرلەردى ەسكە الۋعا ارنالعان «باتىرلارعا تاعزىم» (batyrlarga-tagzym.kz) اتتى جاڭا پورتال جۇمىسىن باستاعان-دى. ياعني «باتىرلارعا تاعزىم» – ەكىنشى دۇنيەجۇزىلىك سوعىس ارداگەرلەرىنىڭ ەسىمىن ۇلىقتاۋ باعىتىندا ەلىمىزدىڭ كونتەنت كەڭىستىگىنە قوسىلعان جاڭا ونلاين-پلاتفورما. بۇل باستامانى مادەنيەت جانە اقپارات مينيسترلىگى جەڭىستىڭ 80 جىلدىعىنا وراي قولعا الىپ وتىر.
جوبانىڭ باستى ماقساتى – سوعىستا ەرلىكپەن شايقاسقان وتاندىق جاۋىنگەرلەر تۋرالى مالىمەتتەردى جيناقتاپ, جاس ۇرپاققا جەتكىزۋ. قازىرگى تاڭدا پورتال بازاسىندا 677 مىڭنان اسا ارداگەر تۋرالى دەرەك بار. ولاردىڭ ىشىندە 365 كەڭەس وداعىنىڭ باتىرى, 4 ەكى مارتە باتىر اتانعان جاۋىنگەر, 19 «داڭق» وردەنىنىڭ يەگەرى بار. ال مالىمەتتەر قورى كۇن ساناپ تولىعىپ كەلەدى.
ەلوردادا وتكەن اردەگەرلەر پلەنۋمىندا مادەنيەت جانە اقپارات ءمينيسترى ايدا بالاەۆا پورتال ماقساتىنا از-كەم توقتالىپ, پىكىر بىلدىرگەن ەدى.
– ەكىنشى دۇنيەجۇزىلىك سوعىسى ارداگەرلەرىنە قاتىستى مالىمەتتەردى بىرىزدەندىرۋ مەن حالىقتىڭ اقپاراتقا قولجەتىمدىلىگىن قامتاماسىز ەتۋ ماقساتىندا «باتىرلارعا تاعزىم» پورتالىنىڭ قىزمەتى كەڭەيتىلەدى. پورتالدا قازاقستاننىڭ جاۋىنگەرلەرى تۋرالى دەرەكتەر مەملەكەتتىك ارحيۆتەر مەن قورعانىس مينيسترلىگىنىڭ مالىمەتتەرى نەگىزىندە ورنالاستىرىلعان, – دەدى ا.بالاەۆا.
سونداي-اق مينيستر جۋىردا ءوزىنىڭ «Facebook»-تەگى پاراقشاسىندا دا اتالعان پلاتفورما تۋرالى تولىعىراق مالىمەت جاريالادى. ا.بالاەۆا پورتالدا كەڭ كولەمدى مالىمەتتەر بازاسى جيناقتالعانىن اتاپ ءوتتى.
«ينتەرفەيس قاجەتتى اقپاراتتى تابۋعا عانا ەمەس, سونىمەن قاتار ءوز ارداگەر تۋىستارى تۋرالى دەرەكتەردى قوسۋعا, جاڭالىقتارمەن تانىسۋعا مۇمكىندىك بەرەدى. وسىلايشا, بۇل پورتال تاريحتى بولاشاق ۇرپاق ءۇشىن ساقتاپ, باتىرلارعا تاعزىم ەتىپ, قۇرمەت كورسەتۋگە ارنالعان پلاتفورما قىزمەتىن اتقارادى», دەدى مينيستر.
جوبا اۆتورلارى سايتتىڭ ىڭعايلى ءارى ينتەراكتيۆتى بولۋىنا باسا ءمان بەرگەن. قولدانۋشىلار ءوز تۋىستارىنىڭ مايدان جولىن سيپاتتايتىن مالىمەتتەردى ەنگىزە الادى, فوتوسۋرەتتەر مەن قۇجاتتاردى جۇكتەيدى جانە باسقا ارداگەرلەر تۋرالى تولىق اقپاراتپەن تانىسا الادى. سونداي-اق جاڭالىقتار بولىمىنەن جەڭىس كۇنىنە وراي اتقارىلىپ جاتقان ءىس-شارالار تۋرالى وقي الادى.