ەلدەگى اقشا ماسساسى مەن ينفلياتسيا اراسىنداعى بايلانىس تۋرالى ساراپشىلار ءارتۇرلى پىكىر ايتادى. ناقتىلىققا جاقىن پىكىر جوقتىڭ قاسى. ەكونوميكاداعى ارتىق اقشا ماسساسىن رەتتەۋ ماسەلەسىن جاۋاپتى مەملەكەتتىك ورىندار دا ءجيى كوتەرەدى. قازىردىڭ وزىندە داعدارىسقا قارسى شارالاردىڭ ناتيجەسىندە ەكونوميكادا 6,3 ترلن تەڭگە شەكتەن تىس اقشا ماسساسى قالىپتاسقان.
الماتىدا وتكەن «جاھاندىق جانە ىشكى شوكتار جاعدايىندا اقشا-كرەديت ساياساتى مەن قارجى تۇراقتىلىعى» اتتى V عىلىمي-پراكتيكالىق كونفەرەنتسيادا ماماندار وسى تاقىرىپقا نازار اۋداردى. ۇلتتىق بانك توراعاسىنىڭ ورىنباسارى ۆيتالي تۋتۋشكيننىڭ ايتۋىنشا, اقشا ماسساسىن باقىلاۋ – ۇلتتىق بانكتىڭ مىندەتى. ۇلتتىق بانك اقشا باسىپ شىعارماۋ ءۇشىن تۇراقتى اقشا ماسساسىن قالىپتاستىرۋعا, اقشا ەكونوميكادا باقىلاۋسىز, بەيبەرەكەت جۇرمەۋى ءۇشىن ارتىق فيسكالدىق ىنتالاندىرۋ بولماۋىن قاداعالاۋعا ءتيىس.
«ەكونوميكا جۇيەسىندە اقشاعا ساي تاۋار بولماسا ينفلياتسيا تۋىندايدى. مۇندايدا ەكونوميكاداعى ءوسىمنىڭ عۇمىرى ۇزاق بولمايدى. وسىنداي كۇردەلى قۇبىلىسقا اكادەميالىق ورتانىڭ قىزىعۋشىلىق تانىتۋى ماڭىزدى. بۇل جاعدايدى دۇرىس تانۋعا جانە دۇرىس شەشىم قابىلداۋعا اسەر ەتەدى. بۇگىن ءبىز ازەربايجان مەن وزبەكستاننان كەلگەن ارىپتەستەرىمىزدى مونەتارلىق ساياسات سالاسىنداعى عىلىمي ىزدەنىستەرىمەن ءبولىسۋ ءۇشىن قۋانا قارسى الامىز», دەدى.
كونفەرەنتسياداعى سەسسيالاردىڭ ءبىرى باعا كۇيزەلىستەرى مەن قۇرىلىمدىق تەڭگەرىمسىزدىكتەر جاعدايىنداعى ماكروەكونوميكاداعى ۇردىستەرگە ارنالدى. قاتىسۋشىلار ەل ەكونوميكاسىنىڭ شيكىزاتتىق تاۋەلدىلىگىنىڭ ساقتالۋى كەزىندەگى ەكونوميكالىق ءوسۋ فاكتورلارى مەن تاۋەكەلدەرى, تومەن ينۆەستيتسيالىق بەلسەندىلىك جانە مەملەكەتتىك قولداۋ شارالارى تۋرالى تالقىلادى.
2024 جىلعى جەلتوقساننىڭ قورىتىندىسى بويىنشا, اقشا بازاسى 16,4%-عا, 14,6 ترلن تەڭگەگە دەيىن ۇلعايعان. اقشا ماسساسىنىڭ 10%-عا كوبەيۋى ينفلياتسيا مولشەرىن 1 جىلدا 0,8%-عا دەيىن كوتەرىپ جىبەرەدى. ال ۇزاقمەرزىمدى پەرسپەكتيۆادا اقشا ماسساسىنىڭ 10%-عا كوبەيۋى ينفلياتسيانى 1,8%-عا دەيىن ءوسىپ كەتۋىنە اسەر ەتەدى ەكەن. حالىقارالىق تاجىريبەدە باسى ارتىق قاراجاتتىڭ كەرى قايتارىلمايتىنى بەلگىلى. قىتاي نەمەسە تۇركيادا مۇنداي قارجى بيزنەسكە باعىتتالادى. بيزنەستىڭ باسى ارتىق قارجىنى ءسىڭىرىپ الۋىنا مۇمكىندىك بار. ال بىزدەگى جاعداي باسقاشا. نارىق سەنىمدى ەمەس, بيزنەستىڭ تəۋەكەلى جوعارى.
ۇلتتىق بانك وكىلى ادام جۇزباەۆ اتاپ وتكەندەي, قازىر تەڭگەدەگى اقشا ماسساسىنىڭ دەڭگەيىنە اسەر ەتەتىن نەگىزگى فاكتورلار نەسيەلەۋدىڭ ءوسۋى مەن بيۋدجەتتىك-فيسكالدىق ارنا بولىپ وتىر.
الماتى