مەملەكەت قولداۋىمەن كاسىپ اشىپ, تىنىمسىز تىرلىكتىڭ ارقاسىندا جۇمىسىن جۇيەلەپ, ۇلكەن ىسكە جالعاستىرىپ جاتقاندار كوپ. دەمەۋ ارقىلى باستاعان بيزنەسىن ورىستەتىپ, جەكە برەند قالىپتاستىرۋعا قادام جاساعاندار دا بار. سولاردىڭ ءبىرى – قىزىلوردالىق جانار پرەكەەۆا. «باستاۋ بيزنەس» جوباسىنىڭ اياسىندا كاسىپكەرلىك نەگىزدەرىن وقىتۋدىڭ ونلاين كۋرسىن اياقتاپ, مەملەكەتتىك گرانت جەڭىپ العان كاسىپكەر «كەرىم سۇلۋ-قىزىلوردا» كاسىپورنىنىڭ جۇمىسىن ورىستەتىپ وتىر.
العاشقى ءونىمىن نارىققا وسىدان سەگىز جىل بۇرىن شىعارعان كاسىپورىن جۇمىسى بىردەن داڭعىل جولعا ءتۇسىپ كەتە قويعان جوق. ون جەتى جىل ءبىلىم سالاسىندا ەڭبەك ەتكەن جانار باستاپقىدا جۇمىس پەن كاسىپتى قاتار الىپ ءجۇردى. بىلتىردان باستاپ بەسىك جابدىعىنان باستاپ, سۇندەت توي, قىز ۇزاتۋ, تۇساۋ كەسۋ, قۇدالىق راسىمىنە قاتىستى بارلىق كادەسىي مەن ۇلتتىق بۇيىمداردى ەرەكشە ويۋ-ورنەكپەن ازىرلەيتىن كاسىبىن كەڭەيتۋ ماقساتىندا «مانساپ» ورتالىعىمەن مەموراندۋمعا وتىردى. وسى ارقىلى قازىر جۇمىسسىز ازاماتتاردى وقىتىپ, ولاردى جۇمىسپەن قامتىپ جاتىر. بۇگىندە مۇندا 17 تىگىنشى جۇمىس ىستەيدى.
ء«بىز تەك قىز جاساۋى عانا ەمەس, كورپە-جاستىقتار, ءساندى جيىنتىقتاردى تىگەمىز. سانعا ەمەس, ساپاعا باسا ءمان بەرەمىز. سونىڭ ارقاسىندا سۇرانىس تا كوپ. مەملەكەتتىك گرانت قارجىسىنا اقشا قوسىپ, كوپتەن بەرى كوزدەپ جۇرگەن لازەر الدىم. وعان دەيىن 30-40 ملن تەڭگەنىڭ قۇرىلعىلارى بولعان. بىراق گرانت اقشاسىنا العان لازەردىڭ ورنى بولەك. قۇرىلعى ۇزىن ماتانى قيماي, قالاعانىڭىزداي ويۋ-ورنەك سالىپ بەرەدى. الەۋمەتتىك جەلىدەگى جارنامامىزدى كورگەندەر ءار وڭىردەن تاپسىرىس بەرىپ جاتىر. شەتەلدەگى قانداستارىمىزدىڭ دا تاپسىرىسىن ءجيى ورىندايمىز. بۇل – ۇلكەن ماقتانىش», دەيدى كاسىپكەر.
مەملەكەتتىك قولداۋ ارقىلى كاسىبىن كەڭەيتىپ وتىرعان جاننىڭ ءبىرى – گۇلفيرا شاماحانوۆا. باستاپقىدا ۇيىندە كونديتەرلىك ونىمدەر پىسىرگەن ول مەملەكەتتەن العان قايتارىمسىز گرانتقا قاجەتتى قۇرال-جابدىقتار ساتىپ الدى. بۇگىندە قالانىڭ ەسكى بازار اۋماعىنداعى ساۋدا نۇكتەسىنىڭ تۇراقتى تۇتىنۋشىلارى بار. پىسىرگەن تورتتارى مەن تاتتىلەرى سورەدە كوپ تۇرماي, تەز ساتىلىپ كەتەدى.
مەملەكەتتىك قولداۋعا يە بولعان جوبالار اراسىندا ەرەكشە بيزنەس تۇرلەرى دە كەزدەسەدى. كوپبالالى انا رەتىندە گرانت كونكۋرسىنا قاتىسقان اسەم ءالىموۆا «اكۆا الەم» دەگەن جوبا ازىرلەپتى. باستاماسى قولداۋ تاۋىپ, حوببي رەتىندە باستالعان ءىستى كاسىپكە اينالدىرىپ وتىر. قازىر اكۆاريۋمدار دايىنداپ, وعان بالىق وسىرەدى. اينەكتەردى كەسىپ, ءبىر-بىرىنە جەلىمدەپ جاساعان اكۆاريۋمدارىن سۇراۋشىلار كوپ. اي سايىن تاپقان تابىسى دا ارتىپ كەلەدى.
«اۋەلگىدە ۇيدە بالىق ءوسىرىپ, زوودۇكەندەرگە وتكىزىپ جۇردىك. وتكەن جىلى 1 476 800 تەڭگە كولەمىندە مەملەكەتتىك گرانت جەڭىپ الىپ, كاسىپ باستاپ كەتتىك. قازىر تايلاند پەن يندونەزيادان كەلگەن بالىقتىڭ وتىزشاقتى ءتۇرىن وسىرەمىز. ارقايسىسىنىڭ كۇتىمىن ەسكەرىپ, قاجەتتى دارىلەرىن بەرىپ وتىرامىز. وسى ىسكە قىزىعاتىن جەكە ادامداردان بولەك مەكتەپتەر مەن بالاباقشالاردان سۇرانىس كوپ تۇسەدى. باسقا وڭىرلەردەن تۇسكەن تاپسىرىستاردى دا ورىندايمىز. «WhatsApp» ارقىلى تۇتىنۋشىلارعا كەڭەس بەرىپ وتىرامىز», دەيدى اسەم ءالىموۆا.
«مانساپ» ورتالىعىنىڭ قىزىلوردا قالالىق فيليالى ديرەكتورى جاقسىلىق تولەگەنوۆتىڭ ايتۋىنشا, بىلتىر 520 ادامعا مەملەكەتتىك گرانت بولىنگەن.
بىراق ولاردىڭ اراسىنان 97 ازاماتتىڭ قارجىنى ماقساتسىز پايدالانعانى انىقتالىپ, قۇجاتتارى سوتقا جولدانىپتى. بيىل 476 جوبانى قارجىلاندىرۋ جوسپارلانىپ وتىر.
قىزىلوردا