وڭتۇستىك كورەيا پرەزيدەنتىنىڭ مىندەتىن اتقارۋشى, پرەمەر-مينيستر حان دوك سۋ وتستاۆكاعا كەتكەنىن جاريالادى, دەپ حابارلايدى Egemen.kz euronews-كە سىلتەمە جاساپ.
وڭتۇستىك كورەيادا مەرزىمىنەن بۇرىن وتەتىن پرەزيدەنتتىك سايلاۋ 3 ماۋسىمعا بەلگىلەندى. بۇل سايلاۋ ەلدىڭ بۇرىنعى باسشىسى يۋن سوك يولگە جاريالانعان يمپيچمەنتكە بايلانىستى وتكىزىلمەك. وسىعان بايلانىستى پرەمەر-مينيستر ءارى پرەزيدەنتتىڭ مىندەتىن ۋاقىتشا اتقارۋشى حان دوك سۋ قىزمەتىنەن كەتىپ, سايلاۋعا قاتىساتىنىن مالىمدەمەك.
حان دوك سۋدىڭ ورنىنا ەلدىڭ قارجى ءمينيسترى جانە ەكونوميكالىق ماسەلەلەر بويىنشا پرەمەر-ءمينيستردىڭ ورىنباسارى چحۆە سان موك پرەزيدەنتتىڭ ۋاقىتشا مىندەتىن اتقارادى.
حان دوك سۋ بۇل شەشىمىن حالىققا ۇندەۋىندە مالىمدەپ, بىرنەشە اپتا بويى جالعاسقان الىپ-قاشپا سوزدەرگە نۇكتە قويدى. ول پرەزيدەنت يۋن سوك يول جەلتوقسان ايىندا اسكەري توتەنشە جاعداي ەنگىزگەنى ءۇشىن بيلىكتەن شەتتەتىلگەننەن كەيىن, حالىق بيلىگى پارتياسىنىڭ ىقتيمال كانديداتى رەتىندە قاراستىرىلعان ەدى.
«مەنىڭ الدىمدا ەكى جول تۇر. ءبىرى — قازىرگى مىندەتتەرىمدى سوڭىنا دەيىن اتقارۋ, ەكىنشىسى — قىزمەتتەن كەتىپ, ودان دا ۇلكەن جاۋاپكەرشىلىك الۋ. مەن شەشىم قابىلدادىم. قىزمەتىمدى تاستاپ, الدا تۇرعان داعدارىستى ەڭسەرۋگە بار كۇشىمدى سالۋعا بەل بۋدىم», دەپ قوستى حان دوك سۋ.
ەسكە سالا كەتەيىك, 4 ءساۋىر كۇنى وڭتۇستىك كورەيانىڭ كونستيتۋتسيالىق سوتى يۋن سوك يولگە قاتىستى يمپيچمەنتتى ماقۇلدادى.