جاس ماماندار جەردە قالمايدى

جوبانى جۇزەگە اسىرۋ ماقساتىندا تالدىقورعان قالاسىندا «جۇ­مىسشى ماماندىقتار: جاڭا كەزەڭ, جاڭا مۇمكىندىكتەر» اتتى تاقى­رىپتا فورۋم ءوتتى. وعان جۇمىس بەرۋشى كاسىپورىندار, ءبىلىم مەكەمەلەرىنىڭ وكىلدەرى, ستۋدەنتتەر – جالپى سانى 150-دەن استام ادام قاتىستى. فورۋم اياسىندا وڭىردەگى كوللەدجدەر مەن ىرگەلى كاسىپورىندار اراسىندا كەلىسىم جاسالىپ, وسى جىلدان باستاپ ىسكە اساتىنى بەلگىلى بولدى.

«كوللەدج جوعارى وقۋ ورنى سانالمايدى, ديپلومى ءبىر ساتى تومەن. سوعان ساي بارعان جەردە جالاقى كورسەتكىشى وتە تومەن بولادى. وڭىردەن قاتار بىتىرگەن كوپتەگەن بالا ۇلكەن قالالارعا بارىپ, سوندا تاجىريبە جيناپ ءجۇر. بۇل مۇمكىندىك ءبىز سەكىلدى بولاشاق جاس ماماندارعا ۇلكەن سەرپىن بەرەدى. الداعى ۋاقىتتا «قاينار اكب» اككۋمۋلياتور زاۋىتىندا ءىس-تاجىريبەدەن وتسەم دەپ وتىرمىن. ءبارى جاقسى بولسا, سوندا قىزمەت ەتپەك ويىم بار. وڭىردە اكە-شەشەمنىڭ قاسىندا بولعانىم دۇرىس. باسقا جەرگە جۇمىس ىزدەپ بارمايمىن», دەيدى ستۋدەنت الماس قالقامان ۇلى.

مەموراندۋم ءوز كەزەگىندە تەحنيكالىق كوللەدج ستۋدەنتتەرىنىڭ تاجىريبەدەن وتۋىنە, بىتىرۋشىلەردىڭ جۇمىسقا ورنالاسۋىنا مۇمكىندىك بەرەدى. كەلىسىم جاسالعان كاسىپورىنداردىڭ اراسىندا «قاينار اكب» اككۋمۋلياتور زاۋىتى, «اقسۋ قانت» جشس, «JLC ءسۇت» جشس, «جاركەنت كراحمال-سىرنە زاۋىتى»  جشس, «قازسۋشار» رمك جەتىسۋ فيليالى بار.

فورۋمعا قاتىسۋشىلاردى قۇتتىقتاعان وبلىس اكىمىنىڭ ورىنباسارى مارلەن كولباەۆ وڭىردە جاستاردى جۇمىسشى ماماندىقتارىنا تارتۋعا, قاجەتتى كاسىپتەرگە دايارلاۋعا باعىتتالعان جۇمىستارعا قىسقاشا توقتالدى. وسى ماڭىزدى مىن­دەتتەردى الەۋمەتتىك سەرىكتەستەرمەن بىر­لەسىپ اتقارۋداعى جوس­پارلارىن دا اتاپ ءوتىپ, بىرلەسىپ جاسالعان جۇمىستىڭ ناتيجەلى بولاتىنىن جەتكىزدى.

«وڭىردەگى جاستار جۇمىسسىز قالماۋى كەرەك. بىلىكتى جاس كادرلاردىڭ ءوڭىر ەكونوميكاسىن دامىتۋىنا جول اشقان ابزال. بىزدە جۇزدەگەن كاسىپورىن مەن زاۋىتتار بار. ولاردا تاجىريبەدەن وتكەن جاس ماماندار ءوز ءىسىنىڭ شەبەرى بولادى. اگرارلى وڭىردە اۋىل شارۋاشىلىعى سالاسىنىڭ قىر-سىرىن بىلەتىن مامانداردى كوپتەپ شىعارۋىمىز قاجەت», دەدى م.كولباەۆ.

بىرقاتار سپيكەر بىلىكتى جۇمىسشى كادر­لاردى دايارلاۋدىڭ نەگىزگى ماسەلەلەرى جايلى ءسوز قوزعادى. ستۋدەنتتەر دميتري سۋنچينيانوۆ پەن شىرىن بولاتبەكقىزى حا­لىقارالىق ستاندارتتاردىڭ ءبىلىم ۇدە­رى­سىنە ينتەگراتسيالانۋى تۋرالى وزدەرىنىڭ تاجىريبەلىك باقىلاۋلارى جونىندە باياندادى.

فورۋم بارىسىندا كوللەدج تۇلەكتەرىنە ولاردىڭ كاسىبي بىلىكتىلىگىن راستايتىن, جۇمىسقا ورنالاسۋدا باسىم قۇقىق بە­رەتىن «التىن كارتا» تاپسىرۋ ءراسىمى اتقا­رىلدى. تەكەلى كاسىپتىك كوللەدجىنىڭ «دانە­كەرلەۋشى», سارقان پوليتەحنيكالىق كوللەدجىنىڭ «ەلەكتر جابدىقتارى», باستوبە كوللەدجىنىڭ «اسپاز» ماماندىعى بويىنشا بىتىرگەن جاس ماماندارىن قابىلداعان جۇمىس بەرۋشىلەر قاتارىندا «كازمۇنايگازپرومسترويسەرۆيس» جشس كاسىپورىندارى, «يپ لي ا.د.», «تاتەك» اق بار.

ءىس-شارا بارىسىندا «WorldSkills Kazakhstan 2024» رەسپۋبليكالىق كاسىبي شەبەرلىك چەمپيوناتىنىڭ جەڭىمپازدارى مەن جۇلدەگەرلەرى ماراپاتتالدى. بۇل ءبىلىم مەكەمەلەرى مەن بيزنەس اراسىنداعى ءتيىمدى بايلانىستاردى نىعايتۋدا ماڭىزدى قادام بولدى, سونداي-اق جاستاردىڭ بولاشاعى بار جۇمىسشى ماماندىقتارىن تاڭداۋىنا قولداۋ كورسەتۋگە ىقپال ەتەدى.

جالپى, وبلىستا 27 كوللەدج بار, وندا 13 900-دەن استام ستۋدەنت وقيدى. 2024 جىلى مامانداردى دايارلاۋعا ارنالعان مەملەكەتتىك تاپسىرىس 4250 ورىن بولعان, بيۋدجەتتىك ورىنداردىڭ باسىم بولىگى ءىت, قۇرىلىس, ينجەنەريا, مەتاللۋرگيا سياقتى تەحنيكالىق ماماندىقتارعا تيەسىلى. ءبىلىم ساپاسىن ارتتىرۋ ءۇشىن وتكەن جىلى وڭىردە 13 جاڭا ماماندىق اشىلسا, بيىل 14 جاڭا ماماندىق اشۋ كوزدەلگەن. بۇل قاتاردا ءوندىرىستىڭ اۆتوماتتاندىرىلعان جۇيەلەرى, مەحاترونيكا, ساۋلەتتىك جوبالاۋ, ورمان جانە بالىق شارۋاشىلىعى سياقتى ماماندىقتار بار. 2025 جىلى وبلىستاعى كوللەدجدەرگە 4500 ادامدى قابىلداۋ جوس­پارلانعان.

ءوڭىر اكىمى ءباسپاسوز قىزمەتىنىڭ مالى­­مە­تىنشە, جۇمىسشى ماماندىقتارى جىلى اياسىندا وبلىستا 70-تەن استام ءىس-شارا وتەدى. سونىڭ ىشىندە «ZhetysuFest», «WorldSkills Zhetysu 2025», «AgroSkills-2024» چەم­پيوناتتارى, سونداي-اق ستۋدەنتتەرگە ارنالعان كاسىبي كون­كۋرستار ۇيىمداستىرىلادى. وبلىس اكىمىنىڭ قولداۋىمەن تالدىقورعان جوعارى پوليتەحنيكالىق كوللەدجىنىڭ بازاسىندا جۇمىسشى ماماندىقتار الاڭىنا اينالاتىن «Zhetysu Skills» ورتالىعى سالىنادى.

جەتىسۋ وبلىسى