تۋريزم جانە سپورت مينيسترلىگىنىڭ مالىمەتىنشە, 2024 جىلى ەلىمىزگە ەڭ كوپ تۋريست قىتايدان كەلگەن. كەيىنگى ءورىنداردا ۇندىستان, تۇركيا, گەرمانيا, وڭتۇستىك كورەيا مەملەكەتى تۇر. بۇل تمد مەملەكەتتەرىن ەسەپكە الماعانداعى كورسەتكىش, دەپ جازادى Egemen.kz.
وتكەن جىلى قازاقستانعا جۇمىس بابىمەن نەمەسە تۇراقتى تۇرۋعا كەلگەندەردى ەسەپتەمەگەندە, تۋريست بولىپ 15,3 ملن شەتەلدىك قوناق كەلگەن. ونىڭ ىشىندە 10,4 ملن ادام ەلىمىزدە ءبىر كۇننەن كوپ ۋاقىتقا قالىپ, شەتەلدىك تۋريستەر ساناتىنا ەنگەن. رەسمي ستاتيستيكاعا ساي شەتەلدىك مەيمانداردىڭ ەلىمىزدە ورتاشا بولۋ مەرزىمى - 4 كۇن.
سانامالاساق, 2024 جىلى قازاقستانعا قىتايدان 655 مىڭ, ءۇندىستاننان 146 مىڭ, تۇركيادان 130 مىڭ ادام ساياحاتتاعان.
2024 جىلى ەلىمىزگە 92 مىڭ گەرمانيالىق تۋريست كەلگەن. ولار قازاقستاننىڭ ەتنوتۋريزم, تابيعي جانە مادەني نىساندارىنا ەرەكشە قىزىعۋشىلىق تانىتقان.
ال وڭتۇستىك كورەيادان 40 مىڭعا جۋىق تۋريست ەلىمىزدە بولعان. مينيسترلىك اتالعان ەلدەردەن تۋريستەردىڭ كوپ كەلۋىن ەكى ەل اراسىندا ۆيزاسىز رەجيمنىڭ ەنگىزىلىپ, اۋە قاتىناستارىنىڭ ارتقانىمەن بايلانىستىرىپ وتىر.