ينتەرنەتتە وتىرىپ-اق حالىقتىڭ قالتاسىن قاعۋعا دانىككەن الاياقتارعا قارسى كۇرەس شارالارى كۇشەيگەنىنە قاراماستان وڭاي ولجاعا قۇنىققاندار ايىلىن جيار ەمەس. ايتسە دە قۇزىرلى ورگان قىزمەتكەرلەرى كيبەرالاياقتىقپەن كۇرەستى ءوز دەڭگەيىندە جالعاستىرىپ جاتىر.
جامبىل وبلىسىنىڭ پروكۋرورى نۇرعالىم ءابدىروۆتىڭ توراعالىعىمەن قۇقىق قورعاۋ ورگاندارىنىڭ, جەرگىلىكتى اتقارۋشى بيلىك وكىلدەرىنىڭ جانە قارجى نارىعى سۋبەكتىلەرىنىڭ قاتىسۋىمەن ينتەرنەت-الاياقتىقپەن كۇرەس جونىندە القا وتىرىسى ءوتتى. باسقوسۋ بارىسىندا الاياقتىقپەن كۇرەس جۇمىسىن كۇشەيتۋ ماسەلەسى, پروكۋراتۋرانىڭ باستاماسىمەن قۇرىلعان «Cyberpol» ۆەدومستۆوارالىق توبىنىڭ جانە «CyberShekteuTaraz» تەلەگرامم-بوتى جۇمىسىنىڭ مەجەلى مەرزىمدەگى ناتيجەلەرى قارالدى.
وبلىس پروكۋرورىنىڭ ايتۋىنشا, بىلتىر بىرلەسىپ قولعا العان جۇمىس ناتيجەسىندە قىلمىستى اشۋ كورسەتكىشى 33 پايىزعا ارتقان. سونداي-اق ۇلتتىق بانكتىڭ «Antifrod-Center» ورتالىعى ارقىلى 346 كۇدىكتىنىڭ بانك شوتتارى بۇعاتتالعان. بايلانىس وپەراتورلارىمەن جاسالعان مەموراندۋم ارقىلى قاشىقتان قوڭىراۋ شالۋ مۇمكىندىگىن تۋدىراتىن 2 «Sim-box» قۇرالى انىقتالعان.
وبلىستىق پروكۋراتۋرانىڭ ۇيىتقى بولۋىمەن پوليتسيا قىزمەتكەرلەرى «قازاقتەلەكوم» جانە «Kcell» اق-مەن بىرلەسىپ جەدەل-ىزدەستىرۋ جۇمىسىن قولعا العان. ناتيجەسىندە, اقپان ايىندا ينتەرنەت-الاياقتىقپەن اينالىسۋ ءۇشىن «Tele-2» وپەراتورىنىڭ 128 سيم-كارتاسى سالىنعان «Sim-box» قۇرالى انىقتالىپتى. سونداي-اق بۇل دەرەك بويىنشا رەسەي ازاماتى ۇستالعان. بۇعان قوسا «CyberShekteuTaraz» بوتىنىڭ كومەگىمەن 224 كۇماندى سىلتەمەلەر, جارناما, ۆەب سايتتار, تەلەفون نومىرلەرى بۇعاتتالعان.
جالپى العاندا, ينتەرنەت-الاياقتىقپەن كۇرەس جۇمىسى قۇزىرلى ورگاندار تاراپىنان ىلكى ساتكە دە توقتاعان ەمەس. جىل باسىندا وبلىستىق پروكۋراتۋرانىڭ مۇرىندىق بولۋىمەن وبلىستىق پوليتسيا دەپارتامەنتىنىڭ قىزمەتكەرلەرى 150 ازاماتقا قاتىستى الاياقتىق جاساپ, 80 ملن شاماسىندا شىعىن كەلتىرگەن ەل ازاماتىن كۇدىكتى رەتىندە قۇرىقتاعان. سونىمەن قاتار وبلىس پروكۋرورى الاياقتىقپەن بايلانىستى قىلمىستىڭ 76 دەرەگىن تەرىس باعالاپ وتىر. پوليتسيا قىزمەتكەرلەرىنە قاتىستى قىلمىستىق ىستەر دە تىركەلگەن.
جيىن بارىسىندا ينتەرنەت الاياقتىقتىڭ الدىن الۋ ماقساتىندا كومپيۋتەرلىك تەحنولوگيا جانە كريپتوۆاليۋتا سالاسىنداعى مامانداردى تارتۋ قاجەتتىلىگى زەردەلەندى. ناقتى دەرەككە سۇيەنسەك, شوتتاردى ۋاقتىلى بۇعاتتاماي, بەلگىلەنگەن تالاپتاردى بۇزىپ, نەسيە بەرگەنى ءۇشىن 3 قارجى ۇيىمىنىڭ جۇمىسشىلارىنا قاتىستى نەمقۇرايدىلىق دەرەگى بويىنشا سوتقا دەيىنگە تەرگەپ-تەكسەرۋ جۇرگىزىلىپ جاتىر ەكەن.
القا وتىرىسىندا الاياقتىقپەن بىرلەسىپ كۇرەسۋدىڭ ماڭىزدىلىعى جان-جاقتى تالقىلاندى. سونداي-اق ينتەرنەت-الاياقتىقپەن كۇرەسۋ شارالارىن كۇشەيتۋ بويىنشا ناقتى نۇسقاۋلار بەرىلدى.
تاراز