بۋراباي كەنتىندەگى “وقجەتپەس” شيپاجايىندا “سىبايلاستىققا قارسى تۇرۋدىڭ حالىقارالىق مەحانيزمدەرى مەن تەتىكتەرى” تاقىرىبىندا ەكى كۇندىك كونفەرەنتسيا بولىپ ءوتتى. ونى قازاقستان رەسپۋبليكاسىنىڭ ەكونوميكالىق جانە سىبايلاس جەمقورلىقپەن كۇرەس اگەنتتىگى, ەقىۇ-دىڭ استانا قالاسىنداعى ورتالىعى, بۇۇ دامۋ باعدارلاماسى جانە “Transparency Kazacھstan” قوعامدىق قورى ۇيىمداستىردى. حالىقارالىق كونفەرەنتسياعا الەمنىڭ قىرىقتان استام ەلىنىڭ وكىلدەرى قاتىستى. دەلەگاتتار قاتارىندا گەرمانيا, ارمەنيا, بەلگيا, دانيا, يتاليا, كەنيا, كونگو, ماكەدونيا, يسپانيا, انگليا, تۇركيا جانە باسقا مەملەكەتتىك بەلگىلى قوعام قايراتكەرلەرى, بيزنەس-اسسوتسياتسيالاردىڭ, ۇكىمەتتىك ەمەس, حالىقارالىق جانە اكادەميالىق ۇيىمداردىڭ وكىلدەرى بولدى.
قر ەسجقا توراعاسى قايرات قوجامجاروۆ كونفەرەنتسيانى شاقىرۋعا تۇرتكى بولعان جاعداي حالىقارالىق قاۋىمداستىقتىڭ وسىناۋ كەسەلمەن كۇرەستەگى مۇددەلەستىگى مەن قازاقستاندىق تاجىريبەگە قىزىعۋشىلىقتان تۋىنداعانىن اتاپ ءوتتى. بىلتىرعى جىلدىڭ كۇزىندە رەسپۋبليكا پرەزيدەنتى ن.نازارباەۆتىڭ قاتىسۋىمەن شاقىرىلعان سىبايلاس جەمقورلىققا قارسى كونفەرەنتسيادا باعالى پىكىرلەر ورتاعا سالىندى. ەلباسى باستاماسىمەن ىسكە اسىرىلىپ جاتقان جاڭا مودەل ەۋروپارلامەنت دەپۋتاتتارىنىڭ نازارىنا ۇسىنىلدى. قازاقستاندا سىبايلاستىقپەن كۇرەستىڭ الەمدىك ستاندارتتارى قولدانىلاتىندىعىن بۇۇ-دىڭ ارنايى كونۆەنتسياسىن ماقۇلداعانىمىزبەن دالەلدەۋگە بولادى. سونداي-اق, بۇگىنگى كونفەرەنتسيا ورتاق كۇرەستەگى ىنتىماقتى بايلانىستارىمىز نىعايىپ, ونى تەجەۋدەگى تەگەۋىرىندى تاسىلدەر قولعا الىنعاندىعىن كورسەتەدى.
ەقىۇ استاناداعى وكىلدىگىنىڭ باسشىسى الەكساندر كەلچەۆسكي قازاقستان سوڭعى ون جىلدا ءوزىنىڭ سىبايلاستىقپەن كۇرەس زاڭدىلىقتارىن الەمدىك ستاندارتتارعا جاقىنداتقانىنا نازار اۋداردى. بۇل ءبىزدىڭ ورتالىق تاراپىنان ۇنەمى قولداۋ تاۋىپ كەلەدى. سىبايلاستىق مەملەكەتتىڭ بەدەلىنە نۇقسان كەلتىرەدى. حالىقارالىق قاۋىمداستىق قازاقستاندا سىبايلاس جەمقورلىققا قارسى تاۋەلسىز كەڭەستىڭ جۇمىس ىستەي باستاۋىن جاقسى تاجىريبە سانايدى. ونىڭ قۇرامىنا قازىردىڭ وزىندە 15 قوعامدىق ۇيىم ەنىپ وتىر.
بۇۇ دامۋ باعدارلاماسىنىڭ قازاقستانداعى تۇراقتى وكىلىنىڭ ورىنباسارى ستەليانا نەدەرا وسىناۋ باعدارلامانىڭ ءبىزدىڭ ەلىمىزدە تابىستى جۇزەگە اسىرىلىپ جاتقانىن ساراپتاما دەرەكتەرمەن اتاپ كورسەتتى. رەسپۋبليكامىزدا 2009 جىلى قۇرىلعان جۇمىس توبى كوپتەگەن قۇندى ۇسىنىستارعا جول اشقانى بەلگىلى بولدى.
“Transparency Kazacھstan” قوعامدىق قورىنىڭ اتقارۋشى ديرەكتورى سەرگەي زلوتنيكوۆ قولدانىلىپ جاتقان شارالاردىڭ قايتارىمىن كۇشەيتۋ قاجەتتىگىنە توقتالدى. تابيعي رەسۋرستارعا باي مەملەكەتتەردە سىبايلاستىق مۇمكىندىكتەرى دە مول. بۇگىنگى كونفەرەنتسيانىڭ قازاقستاندا شاقىرىلۋى بۇل ەلدىڭ سىبايلاستىقتىڭ تەرىس كورىنىستەرىمەن كۇرەسۋدە حالىقارالىق پروتسەستەردەن شەت قالماۋدى نىسانا سانايتىنىن بىلدىرەدى. كۇرەس ءاردايىم اشىقتىعىمەن جانە قوعام مۇشەلەرىنىڭ بەلسەندى ارالاسۋىمەن پارمەندى بولماق. بۇعان قوسا, ەكونوميكالىق تارتىمدى مەملەكەتتەرگە ەسىرتكى ترافيگى, ادامداردىڭ زاڭسىز كوشى-قونى جانە قارۋ ساۋداسى قاۋىپ تۋعىزادى. سوندىقتان, بۇگىنگى ديالوگتا وسى ماسەلەلەر ايرىقشا نازاردا ۇستالعانى ءجون.
كونفەرەنتسيانىڭ پلەنارلىق ماجىلىستەرى مەن سەمينارلاردى قازاقستاننىڭ جانە باسقا مەملەكەتتەردىڭ تاجىريبەسى تانىستىرىلىپ, پىكىر الماسۋلار قىزۋ تۇردە ورىستەدى.
باقبەرگەن امالبەك.
اقمولا وبلىسى.