سانكت-پەتەربۋرگتە تمد پارلامەنتارالىق اسسامبلەياسىنىڭ 58-ءشى پلەنارلىق وتىرىسى ءوتتى. وعان دوستاستىق ەلدەر پارلامەنتتەرى پالاتالارىنىڭ باسشىلارى مەن دەپۋتاتتارى قاتىستى. قازاقستاندىق دەلەگاتسيانى پارلامەنت سەناتىنىڭ توراعاسى ماۋلەن اشىمباەۆ باستاپ باردى. ساپار اياسىندا ول ۇلى جەڭىستىڭ 80 جىلدىعىنا ارنالعان تمد پاا-نىڭ سالتاناتتى وتىرىسىندا ءسوز سويلەدى جانە ماڭىزدى ەكىجاقتى كەزدەسۋلەر وتكىزدى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
ماۋلەن اشىمباەۆ سالتاناتتى كەزدەسۋگە قاتىسۋشىلارعا ءىلتيپات ءبىلدىرىپ, قازاقستاندىقتار ءۇشىن جەڭىس كۇنى ەرەكشە مانگە يە ەكەنىن اتاپ ءوتتى. قازاقستان جەڭىسكە ايتارلىقتاي ۇلەس قوسقان نەگىزگى يندۋستريالىق جانە گۋمانيتارلىق ورتالىقتاردىڭ ءبىرى بولدى. مايدانعا اتتانعان ميلليون ەكى ءجۇز مىڭ قازاقستاندىقتىڭ جارتىسىنان كوبى ەلگە ورالعان جوق. سونداي-اق 500-دەن استام وتانداسىمىزدىڭ كەڭەس وداعىنىڭ باتىرى اتانعانى ايتىلدى.
«قازاقستان پرەزيدەنتى قاسىم-جومارت كەمەل ۇلى توقاەۆ: ء«بىز ۇلتىمىزدىڭ قاھارمان ۇل-قىزدارىنىڭ ارقاسىندا الاڭسىز ەڭبەك ەتىپ, ۇرپاق ءوسىرىپ, جارقىن بولاشاققا قادام باسىپ كەلەمىز. سول ءۇشىن ولارعا ماڭگى قارىزدارمىز. ەشكىم دە ەشقاشان ۇمىتىلمايدى!», دەپ, ناقتى اتاپ ءوتتى. مەملەكەت باسشىسىنىڭ باستاماسىمەن بىلتىر «ايبىن» وردەنىنىڭ دارەجەلەرىنە اتى اڭىزعا اينالعان باتىرلار ساعادات نۇرماعامبەتوۆ, باۋىرجان مومىش ۇلى جانە راحىمجان قوشقارباەۆتىڭ ەسىمدەرى بەرىلدى. بيىل 7 مامىردا استانادا جەڭىستىڭ 80 جىلدىعى مەن وتان قورعاۋشىلار كۇنىنە ارنالعان اسكەري شەرۋ وتەدى. بۇكىل قازاقستان بويىنشا ۇلى جەڭىس كۇنىن اتاپ وتۋگە قاتىستى بەلسەندى جۇمىس جۇرگىزىلىپ جاتىر. ولاردىڭ قاتارىندا كونفەرەنتسيالار مەن كورمەلەر, كونتسەرتتەر مەن اسكەري-پاتريوتتىق اكتسيالار, سپورتتىق جارىستار مەن عىلىمي-اعارتۋشىلىق جوبالار بار. ەلدىمەكەندەرگە, كوشەلەرگە, مەكتەپتەرگە ارداگەرلەردىڭ ەسىمدەرى بەرىلۋدە. جەڭىستىڭ 80 جىلدىعىنا وراي قولداۋ شارالارىنا قوسىمشا ءاربىر ارداگەرگە 5 ملن تەڭگەدەن بىرجولعى تولەم بەرىلەدى. بۇل – تمد ەلدەرى اراسىنداعى ەڭ جوعارى كورسەتكىشتەردىڭ ءبىرى. مۇنىڭ ءبارى تاريحتى دارىپتەۋگە جانە قازاقستانداعى ۇرپاقتار ساباقتاستىعىن ساقتاۋعا دەگەن ۇمتىلىسىمىزدىڭ جارقىن كورىنىسى», دەدى سەنات سپيكەرى.
سونداي-اق ماۋلەن اشىمباەۆ ارداگەرلەرگە قۇرمەت كورسەتۋ, حالىقارالىق فورۋمدار مەن عىلىمي كونفەرەنتسيالار جانە جەڭىستىڭ 80 جىلدىعى اياسىندا ءتۇرلى مەملەكەتتەردە ءوتىپ جاتقان پاتريوتتىق اكتسيالار ورتاق تاريحتى دارىپتەۋگە قوسىلعان ۇلەس جانە ۇرپاقتار ساباقتاستىعىنىڭ نەگىزى ەكەنىن ايتتى.
«ساعادات نۇرماعامبەتوۆ, تالعات بيگەلدينوۆ, قاسىم قايسەنوۆ, مانشۇك مامەتوۆا, ءاليا مولداعۇلوۆا, حيۋاز دوسپانوۆا جانە قازاق حالقىنىڭ مىڭداعان ۇل-قىزدارىنىڭ ەسىمدەرى ءبىزدىڭ ورتاق تاريحىمىزعا ماڭگىلىككە جازىلدى. الماتىدا قۇرىلعان, اتى اڭىزعا اينالعان 316-شى ديۆيزيا جاۋىنگەرلىك داڭق شەجىرەسىندە ايرىقشا ورىن الادى. گەنەرال يۆان پانفيلوۆتىڭ باسشىلىعىمەن ديۆيزيا جاۋىنگەرلەرى ماسكەۋ ءۇشىن شايقاستا ەرلىكتىڭ وزىق ۇلگىسىن كورسەتتى. پانفيلوۆشى باتىرلار تاباندىلىق پەن قايسارلىقتىڭ سيمۆولىنا اينالدى. ديۆيزيا قاتارىندا بەلگىلى اسكەري تاكتيك, كەڭەس وداعىنىڭ باتىرى باۋىرجان مومىش ۇلى دا شايقاستى. لەيتەنانت راحىمجان قوشقارباەۆ رەيحستاگقا العاشقىلاردىڭ ءبىرى بولىپ جەڭىس تۋىن تىكتى», دەپ, ماۋلەن اشىمباەۆ قازاق حالقىنىڭ جەڭىسكە قوسقان ۇلەسىنە نازار اۋداردى.
سونىمەن قاتار ماۋلەن اشىمباەۆ تمد پاا كەڭەسىنىڭ جۇمىسىنا جانە اسسامبلەيانىڭ پلەنارلىق وتىرىسىنا قاتىستى. ودان بولەك, پارلامەنت دەپۋتاتتارى نەگىزگى سالالارعا قاتىستى جانە ءوزارا مۇددەنى بىلدىرەتىن مودەلدى زاڭدار توپتاماسىن قارادى. بۇل نورمالار الداعى ۋاقىتتا زاڭ شىعارۋ قىزمەتىندە پايدالانۋعا ۇسىنىلادى.
وتىرىس الاڭىندا سەنات توراعاسى پارلامەنتتىك دەلەگاتسيالاردىڭ باسشىلارىمەن ماڭىزدى ەكىجاقتى كەزدەسۋلەر وتكىزدى.
سونداي-اق تمد پاا پارلامەنتتىك دەلەگاتسيالارىنىڭ باسشىلارى مەن مۇشەلەرى سوعىسقا قاتىسقان جاۋىنگەرلەردى ەسكە الۋعا ارنالعان مەموريالعا گۇل شوقتارىن قويدى.