الماتىدا «ULY DALA ÚNI» حالىقارالىق ۆوكالدىق-حور فەستيۆالى باستالدى, دەپ حابارلايدى Egemen.kz.
اتالمىش ءىس-شارا قۇرمانعازى اتىنداعى قازاق ۇلتتىق كونسەرۆاتورياسىندا ءوتىپ جاتىر. وعان قازاقستان مەن رەسەيدەن كەلگەن 30-دان استام كاسىبي جانە اۋەسقوي حور ۇجىمى قاتىسۋدا.
ءۇش كۇندىك باعدارلامادا حور مۋزىكاسىنىڭ كونتسەرتتەرى, جەتەكشى ساراپشىلاردىڭ شەبەرلىك ساباقتارى, دوڭگەلەك ۇستەلدەر مەن شىعارماشىلىق كەزدەسۋلەر ۇيىمداستىرىلادى.
ارنايى شاقىرىلعان ماماندار اراسىندا قازاقستاننىڭ ەڭبەك سىڭىرگەن قايراتكەرى, ب.بايقاداموۆ اتىنداعى اكادەميالىق كاپەللانىڭ كوركەمدىك جەتەكشىسى – بەيىمبەت دەمەۋوۆ, پروفەسسور, قازاق ۇلتتىق كونسەرۆاتورياسىنىڭ ديريجەرلىك ءبولىمىنىڭ مەڭگەرۋشىسى – عالىمجان بەرەكەشەۆ, ماسكەۋ كونسەرۆاتورياسىنىڭ كامەرالىق حورىنىڭ كوركەمدىك جەتەكشىسى, پروفەسسور – الەكساندر سولوۆەۆ بار.
فەستيۆالدىڭ ماقساتى – ونەرپازداردىڭ ورىنداۋشىلىق شەبەرلىك دەڭگەيىن كوتەرۋ جانە حور ونەرىنىڭ قازاقستاننىڭ ماتەريالدىق ەمەس مادەني مۇراسىنىڭ ماڭىزدى بولىگى رەتىندەگى ءرولىن اتاپ ءوتۋ.
فەستيۆالدىڭ نەگىزگى ءىس-شاراسى – 18 ساۋىردە ە.راحماديەۆ اتىنداعى ۇلكەن زالدا وتەتىن گالا-كونتسەرت. كونتسەرتتە جەتەكشى اكادەميالىق جانە كوركەمونەرپازدار ۇجىمدارى, بالالار ۇجىمدارى مەن تانىمال انسامبلدەر ونەر كورسەتەدى. باعدارلامادا قازىرگى قازاق حور مەكتەبىنىڭ, سونداي-اق الەمدىك حور مۋزىكاسىنىڭ كلاسسيكتەرى شىعارمالارىنىڭ پرەمەرالارى ۇسىنىلادى.