اقتوبە قالاسىندا 110, ال ەلدى مەكەندەردە 56 دارىگەرلىك ورىن بوس تۇر. بىلتىر اۋىلدارعا جىبەرىلگەن 15 مامانعا 3 ملن تەڭگە, 25 مامانعا 8,5 ملن تەڭگە كولەمىندە الەۋمەتتىك كومەك كورسەتىلدى. بۇل جونىندە وبلىس اكىمى اسحات شاحاروۆتىڭ توراعالىعىمەن وتكەن جيىندا دەنساۋلىق ساقتاۋ باسقارماسىنىڭ باسشىسى ەرلان سۇلتانگەرەەۆ باياندادى, دەپ حابارلايدى Egemen.kz.
قازىرگى كەزدە وڭىردە مەملەكەتتىك 38 ەمدەۋ مەكەمەسى تىركەلسە, بيىل 761 مىڭنان استام تۇرعىن مەديتسينالىق ساقتاندىرۋ ارقىلى دارىگەرلىك كومەك الادى. جىل باسىندا ناۋقاستاردى تەگىن ءدارى-دارمەكپەن قامتاماسىز ەتۋگە رەسپۋبليكالىق بيۋدجەتتەن 9,2 ملرد تەڭگە, جەرگىلىكتى بيۋدجەتتەن 549 ملن تەڭگە ءبولىندى. جاعىمدى جاڭالىق –وسى جىلى پايدالانۋعا بەرىلەتىن 23 مەديتسينالىق نىساننىڭ 15-ءى جاڭادان سالىنىپ جاتسا, 8 نىسانعا كۇردەلى جوندەۋ جۇمىستارى جۇرگىزىلەدى. ءوڭىر باسشىسى وبلىس ورتالىعىنداعى كۇردەلى جوندەۋگە كەلمەيتىن, ابدەن توزعان عيماراتتاردا وتىرعان مەديتسينا مەكەمەلەرىنىڭ ورىندارىن اۋىستىرۋدى قولعا الۋدى تاپسىردى.