بۇگىن تاڭەرتەڭ سارىارقا اۋدانىنىڭ بۇلانتى كوشەسى بويىنداعى مانسارد ۇلگىسىندەگى جاتاقحانا عيماراتىنان ءورت شىقتى, دەپ حابارلايدى Egemen.kz.
توتەنشە جاعدايلار مينيسترلىگىنىڭ مالىمەتىنشە, العاشقى بولىمشەلەر وقيعا ورنىنا جەتكەن كەزدە ءورت 6-قاباتتاعى مانساردتان شىققانى بەلگىلى بولعان. قابات تۇگەلدەي وتقا ورانعان.
«دەرەۋ گاز-تۇتىننەن قورعاۋ قىزمەتىنىڭ بۋىندارى قۇرىلىپ, بارلاۋ جۇمىستارى باستالدى. تجم كۇشتەرىمەن سۋدى ۇزدىكسىز جەتكىزۋ قامتاماسىز ەتىلدى. بارلىعى 540 ادام, تجم كۇشىمەن 50 ادام, ونىڭ ىشىندە 7 بالا ەۆاكۋاتسيالاندى. ءورت 1600 شارشى مەتر الاڭدا تولىق ءسوندىرىلدى», دەلىنگەن حابارلامادا.
قازىرگى ۋاقىتتا وقيعا ورنىندا ءورت زەرتتەۋ سىناق زەرتحاناسى مەن تجد انىقتاۋ ءبولىمىنىڭ ماماندارى جۇمىس ىستەپ جاتىر. زارداپ شەككەندەر جوق. ءورتتىڭ شىعۋ سەبەبى انىقتالىپ جاتىر.