قر پرەمەر-ءمينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا تۋريستىك سالانى دامىتۋ جانە تسيفرلاندىرۋ جونىندەگى شارالار قارالدى. مەملەكەت باسشىسىنىڭ بيىلعى ناۋرىز ايىندا ۇلتتىق قۇرىلتايدا ششۋچينسك-بۋراباي كۋرورتتىق ايماعىن دامىتۋ جونىندەگى تاپسىرماسىن ورىنداۋعا كوڭىل ءبولىندى, دەپ حابارلايدى Egemen.kz.
اقمولا وبلىسىنىڭ اكىمى مارات احمەتجانوۆ اتالعان كۋرورتتىق ايماقتى دامىتۋدىڭ 2025-2029 جىلدارعا ارنالعان كەشەندى جوسپارى بەكىتىلگەنىن جانە ىسكە اسىرىلىپ جاتقانىن مالىمدەدى. جوسپار ءوڭىردىڭ تۋريستىك, كولىكتىك جانە ينجەنەرلىك ينفراقۇرىلىمىن اۋقىمدى دامىتۋعا باعىتتالعان.
«جوسپارعا تۇجىرىمدامالىق تۇردە جاڭا ورىنداردى: «اقبۋرا» كۋرورتى, قاتاركول جانە جوكەي كولدەرىنىڭ اينالاسىنداعى تۋريزم ايماقتارىن دامىتۋ بويىنشا ءىس-شارالار ەنگىزىلگەن. 34 ينجەنەرلىك جانە كولىكتىك جوبالاردى جۇزەگە اسىرۋدىڭ باسىمدىعى ايقىندالدى. ناتيجەسىندە, 400 شاقىرىم سۋمەن جابدىقتاۋ, سۋ بۇرۋ جانە جىلۋمەن جابدىقتاۋ جۇيەلەرى, 116 شاقىرىم ەلەكتر جەلىلەرى جانە 80 شاقىرىم اۆتوموبيل جولدارى رەكونسترۋكتسيادان ءوتىپ, سالىناتىن بولادى», دەدى ايماق باسشىسى.
2025 جىلى بۋراباي كۋرورتىن ينفراقۇرىلىمدىق دامىتۋعا 3,5 ملرد تەڭگە بولىنگەن, ونىڭ ىشىندە:
0,7 ملرد تەڭگە – رەسپۋبليكالىق بيۋدجەتتەن; 2,8 ملرد تەڭگە – جەرگىلىكتى بيۋدجەتتەن.ايتا كەتەيىك, ششۋچينسك-بۋراباي كۋرورتتىق ايماعى ەلىمىزدەگى ءۇش تۋريزم ورتالىعىنىڭ ءبىرى بولىپ بەلگىلەندى جانە ءوڭىردىڭ نەگىزگى كۋرورتى بولىپ قالا بەرەدى.