ەلىمىزدىڭ وڭىرلەرىندە وتاندىق كينونى ناسيحاتتاۋ جۇمىسى جالعاسۋدا. بۇل — اسا ماڭىزدى مىندەت, ونىڭ ورىندالۋى قازاقستاندىق كينويندۋستريانى جاڭا دەڭگەيگە كوتەرىپ, ءاربىر ءفيلمنىڭ ءوز كورەرمەنىن تابۋىنا مۇمكىندىك بەرەدى, دەپ جازادى Egemen.kz اقپارات اگەنتتىگى.
مەملەكەت باسشىسى بۇل باعىتتىڭ ماڭىزدىلىعىن ۇلتتىق قۇرىلتايدىڭ ءتورتىنشى وتىرىسىندا ەرەكشە اتاپ وتكەن بولاتىن.
4 ءساۋىر كۇنى سولتۇستىك قازاقستان وبلىسىندا قازاق كينوسىنىڭ كۇندەرى باستالدى.نەگىزگى ماقسات — جەرگىلىكتى تالانتتى رەجيسسەرلەر مەن ولاردىڭ تۋىندىلارىن حالىققا تانىستىرۋ. بۇل فيلمدەردە قازاق حالقىنىڭ مادەنيەتى مەن رۋحى, تاريحىمىزدىڭ ماڭىزدى كەزەڭدەرى, كورنەكتى مەملەكەت جانە قوعام قايراتكەرلەرىنىڭ ءومىرى مەن قىزمەتى كورىنىس تابادى.
قر مادەنيەت جانە اقپارات ءمينيسترى ايدا بالاەۆا قازىرگى ۋاقىتتا كينو سالاسىنىڭ دامۋىنا ەرەكشە كوڭىل ءبولىپ وتىر.
ء«بىز ورتالىقتىڭ قولداۋىمەن تۇسىرىلگەن بارلىق جوبالار ءاربىر كورەرمەنگە جەتۋىن قالايمىز. تەك وبلىس ورتالىقتارىندا عانا ەمەس, اۋداندار مەن اۋىلداردا دا كورسەتىلۋى ءتيىس. بۇل جۇمىستى تۇراقتى تۇردە جۇرگىزەمىز. ءبىر رەتتە 10–15 فيلم كورسەتىلسە, ارتىنان جاڭالارىن جىبەرەمىز», – دەدى «ۇلتتىق كينونى قولداۋ مەملەكەتتىك ورتالىعى» كەاق باسقارما توراعاسى قۇرمانبەك جۇماعالي.
كينونى ناسيحاتتاۋ جۇمىستارى رەسپۋبليكالىق عانا ەمەس, وڭىرلىك تەلەارنالارمەن دە بىرلەسىپ جۇرگىزىلۋدە. سولتۇستىك قازاقستان وبلىستىق تەلەارناسى بىرنەشە جىلدان بەرى وتاندىق فيلمدەردى كورسەتىپ كەلەدى.
قازاق كينوسى ونكۇندىگى اياسىندا «Qyzyljar Creative Center» شىعارماشىلىق ورتالىعىندا «ۇلتتىق كينونى قولداۋ مەملەكەتتىك ورتالىعى» مەن «Carat-پروگنوز» جشس («پەرۆىي سەۆەرنىي» تەلەارناسى) اراسىندا ءوزارا ىنتىماقتاستىق تۋرالى مەموراندۋمعا قول قويىلدى.
ونكۇندىكتىڭ العاشقى كۇنى كورەرمەندەرگە رەجيسسەر سەرىكبول وتەپبەرگەنوۆتىڭ «ۋاقىتى كەلگەن پاتريوتتار» ءفيلمى ۇسىنىلدى. بۇل — تەرروريزممەن كۇرەس پەن وتباسى قۇندىلىقتارى تۋرالى ساپالى ەكشن جانرىنداعى تۋىندى.
فيلم اسكەري قىزمەت اتقاراتىن ەكى باۋىر تۋرالى. ۇلكەنى – بارلاۋشى, كىشىسى – يسترەبيتەل ۇشقىشى. اكەلەرى شايقاستا قازا تاپقان. ارالارىندا تۇسىنىسپەۋشىلىك بولعانىمەن, ەل تاعدىرى تارازىعا تۇسكەن ساتتە ولار بىرىگىپ, حالىقتى قۇتقارۋعا اتسالىسادى.
«مورالدىق يدەيا – ءبىز قانداي جاعدايدا بولساق تا, ۇلتقا, دىنگە بولىنبەي, بىرلىك پەن ىنتىماقتا بولۋىمىز قاجەت. ءفيلمدى جاساۋعا ءبىر جىلداي ۋاقىت كەتتى, اسىرەسە كومپيۋتەرلىك گرافيكا كوپ ۋاقىت الدى, بىراق سونىڭ ارقاسىندا فيلم كوركەم ءارى اسەرلى شىقتى», – دەدى رەجيسسەر سەرىكبول وتەپبەرگەنوۆ.
كينو كۇندەرىنىڭ اشىلۋ راسىمىنە سقو اكىمىنىڭ اپپاراتى جەتەكشىسى رۋسلان اليشەۆ قاتىسىپ, قاتىسۋشىلاردى وبلىس اكىمىنىڭ اتىنان قۇتتىقتاپ, وتاندىق كينونى ناسيحاتتاۋدىڭ ماڭىزدىلىعىن اتاپ ءوتتى.
«بۇل – وسكەلەڭ ۇرپاقتى تاربيەلەۋ مەن قوعامدىق سانانى قالىپتاستىرۋ ءۇشىن اسا ماڭىزدى جۇمىس. مەملەكەت قارجىسىمەن تۇسىرىلگەن فيلمدەردى وڭىرلەردە كورسەتۋ – وتە ورىندى باستاما. ءبىزدىڭ كينوكومپانيالار ساپالى كونتەنت جاساپ وتىر, ول الەمدىك نارىقتا دا ءوز ورنىن تابۋدا. وسىعان ساي جاڭا كرەاتيۆتى ورتالىعىمىز اشىلىپ, كينو سالاسىنا بار جاعداي جاسالعان. بىزدە ۇلكەن جوسپارلار, تىڭ يدەيالار مەن كاسىبي ماماندار بار», – دەدى رۋسلان اليشەۆ.
كورسەتىلىمگە ۇسىنىلعان فيلمدەر ءارتۇرلى جانردى قامتيدى:
«جامبىل. جاڭا ءداۋىر» جانە «دوس-مۇقاسان» – اتاقتى تۇلعالاردىڭ ءومىرى جايلى.
«باۋىرىنا سالۋ» – قازاق حالقىنىڭ سالت-ءداستۇرىن ناسيحاتتايدى.
بالالار ءۇشىن – «تايقازان» انيماتسيالىق ءفيلمى كورسەتىلدى.
جالپى, كينونى قولداۋ ورتالىعىنىڭ كومەگىمەن 117 فيلم تۇسىرىلگەن: - 72 – كوركەم فيلم, - 37 – دەرەكتى, - 8 – انيماتسيالىق.