قازاقستاندىق قارجىگەر راسۋل رىسمامبەتوۆ ەلىمىزگە اقش-تىڭ جاڭا تاريفتىك ساياساتى ايتارلىقتاي اسەر ەتپەيتىنىن ايتتى. ونىڭ پىكىرىنشە, ساۋدا سوعىستارىنىڭ ەپيتسەنترىندە بولماعاندىقتان بۇل وزگەرىستەر ەل ەكونوميكاسىنا تىكەلەي سوققى بەرمەيدى, دەپ حابارلايدى Egemen.kz.
«بۇل – قازاقستاننىڭ داعدارىستاردان تىس قالۋىنىڭ تاعى ءبىر دالەلى. ءيا, ترامپتىڭ تاريفتىك سوققىسى الەمدىك ساۋدادا وزگەرىستەرگە اكەلۋى مۇمكىن, بىراق بىزگە تەك ونىڭ جاناما اسەرلەرى عانا سەزىلۋى ىقتيمال», دەدى ول.
رىسمامبەتوۆتىڭ ايتۋىنشا, قازاقستان اقش-پەن ساۋدا پروفيتسيتىنە يە. 2024 جىلى ەل اقش-قا 2 ملرد دوللاردان استام تاۋار ەكسپورتتاسا, يمپورت كولەمى 1 ملرد دوللاردى قۇراعان.
«قازاقستانعا 27%-دىق باج سالىعى ەنگىزىلگەنىمەن, بۇل ءبىزدىڭ نەگىزگى ەكسپورتقا اسەر ەتپەيدى. سەبەبى قازاقستاننان اقش-قا ەكسپورتتالاتىن تاۋارلاردىڭ كوبى ستراتەگيالىق شيكىزاتقا جاتادى, ال ولارعا پرەزيدەنتتىك ەرەكشەلىك بەرىلگەن», دەپ ءتۇسىندىردى راسۋل رىسمامبەتوۆ.
قارجىگەر قازاقستان ءۇشىن اقش-تىڭ ساۋدا ساياساتىنىڭ كەيبىر وڭ اسەرلەرى بولۋى مۇمكىن ەكەنىن اتاپ ءوتتى.
«جاڭا تاريفتەرگە بايلانىستى اقش-پەن ساۋداسى قيىنداعان ەلدەر ءوز ونىمدەرىن جاڭا نارىقتارعا باعىتتاۋعا تىرىسادى. بۇل ءبىز ءۇشىن تەحنيكا, مەتالل, كولىك جانە قۇرىلىس ماتەريالدارىن تيىمدىرەك باعامەن ساتىپ الۋ مۇمكىندىگىن تۋدىرادى», دەدى ول.
سونىمەن قاتار, ەگەر تاريفتەر اقش-تا ينفلياتسيانى كۇشەيتسە, بۇل دوللاردىڭ السىرەۋىنە اكەلۋى مۇمكىن. مۇنداي جاعدايدا, قازاقستان ءۇشىن دوللار ايماعىنان يمپورتتاۋ ارزاندايدى, ال تەنگەنىڭ دوللارعا شاققانداعى باعامى نىعايۋى ىقتيمال.
رىسمامبەتوۆ بۇل وزگەرىستەر قازاقستاننىڭ وتاندىق ءوندىرىسىن قولداۋىنا جاقسى مۇمكىندىك ەكەنىن ايتادى.
ء«بىز ءوز وندىرۋشىمىزگە باسىمدىق بەرۋىمىز كەرەك. اۋىل شارۋاشىلىعى, وڭدەۋ ونەركاسىبى جانە ماشينا جاساۋ سالالارىن كۇشەيتۋ قاجەت. قازىر ءتيىمدى نەسيە تارتىپ, زاماناۋي جابدىقتار الۋ مۇمكىندىگى بار. وسى ءساتتى پايدالانىپ, جىلدام ارەكەت ەتۋ ماڭىزدى», دەپ قورىتىندىلادى ول.