ەلىمىز بويىنشا الماتىداعى ZAMAN مەكتەبى حالىقارالىق باكالاۆريات (IB) باعدارلاماسىنىڭ باستاۋىش ءبىلىم بەرۋ دەڭگەيىندەگى Primary Years Programme (PYP) اككرەديتتەۋىنەن ءساتتى ءوتتى. سايكەسىنشە, قازاق بالالارى ءۇشىن الەمنىڭ ۇزدىك ۋنيۆەرسيتەتتەرىندە ءبىلىم الۋعا جول اشىلدى, دەپ حابارلايدى Egemen.kz.
بۇل جەتىستىك – قازاقستانداعى قازاق تىلىندە ءبىلىم بەرەتىن مەكتەپتەردىڭ حالىقارالىق ستاندارتتارعا سايكەستىگىن راستايتىن ماڭىزدى قادام. 1968 جىلى جەنەۆادا نەگىزى قالانعان بۇل باعدارلاما قازىرگى تاڭدا 150-دەن استام ەلدەگى 5 مىڭنان اسا مەكتەپتە ەنگىزىلگەن.
ايتا كەتەيىك, IB – بۇل جاي عانا اكادەميالىق باعدارلاما ەمەس. ول وقۋشىلاردى ءبىلىم الۋعا, الەمدەگى جانە ەلىمىزدەگى اۋقىمدى ماسەلەلەردى انىقتاپ, ولاردى شەشۋگە ۇيرەتەدى. IB باعدارلاماسى ارقىلى 3 جاستان 19 جاسقا دەيىنگى وقۋشىلار بىلىمدەرىن حالىقارالىق دەڭگەيدە كورسەتە الادى. مەكتەپتە وقۋشىلار تەك ساپالى ءبىلىم الىپ قانا قويماي, سونىمەن قاتار ءوز بەتىنشە تالداۋ جاسايتىن, كرەاتيۆتى ويلايتىن جانە كوپۇلتتى ءارى كوپمادەنيەتتى ورتادا ءتيىمدى قارىم-قاتىناس جاساي الاتىن كوشباسشى, جوبالىق مەنەدجەر رەتىندە قالىپتاسادى.
IB باعدارلاماسى 162 ەلدە 5800 مەكتەپتە وقىتىلادى. ونىڭ ماقساتى – زياتكەرلىك ءارى جاھاندىق كوشباسشىلاردى دايارلاۋ, ولاردى قازىرگى زاماننىڭ قارقىندى وزگەرىستەرىنە بەيىمدەلۋگە ۇيرەتۋ.
«IB باعدارلاماسى مۇعالىمدەردىڭ كاسىبي دەڭگەيىن ارتتىرۋعا ۇلكەن سەرپىن بەرەدى. پەداگوگتەر ۇنەمى تاجىريبە الماسىپ, كاسىبي تۇرعىدان دامۋعا ىنتالاندىرىلادى. وقۋشىلار ءۇشىن بۇل باعدارلاما – تەڭدەسى جوق مۇمكىندىك, سەبەبى IB ديپلومى الەمنىڭ ۇزدىك ۋنيۆەرسيتەتتەرىندە ءبىلىم الۋعا جول اشادى. ZAMAN مەكتەبىندە IB باعدارلاماسى قازاقستاندىق جانە حالىقارالىق ءبىلىم بەرۋ ادىستەمەلەرىن بىرىكتىرىپ, جان-جاقتى وقىتۋدى قامتاماسىز ەتەدى. ساباقتار قازاق جانە اعىلشىن تىلدەرىندە جۇرگىزىلەدى, بۇل وقۋشىلارعا جاھاندىق ءبىلىم كەڭىستىگىندە باسەكەگە قابىلەتتى بولۋعا كومەكتەسەدى. مەكتەپتە IB باعدارلاماسى بويىنشا وقىتۋ تاجىريبەسى بار جوعارى بىلىكتى مۇعالىمدەر جۇمىس ىستەيدى», دەپ اتاپ ءوتتى مەكتەپتىڭ نەگىزىن قالاۋشى گاۋحار نۋروۆا.
2025 جىلدىڭ قاڭتار ايىندا مەكتەپ Middle Years Programme (MYP) باعدارلاماسى بويىنشا اۆتوريزاتسيا العان, ال ءساۋىر-مامىر ايلارىندا جوعارى دەڭگەيدەگى Diploma Programme (DP) باعدارلاماسىنىڭ اۆتوريزاتسياسىن الۋعا نيەتتى. IB باعدارلاماسىنىڭ بارلىق دەڭگەيلەرىن الۋ – مەكتەپتىڭ دامۋى مەن وتاندىق ءبىلىم بەرۋ ساپاسىن ارتتىرۋ جولىنداعى ماڭىزدى قادامداردىڭ ءبىرى بولماق.
قازاقستاندا IB باعدارلاماسىمەن وقىتاتىن مەكتەپتەردىڭ سانى ءالى دە از, ال ZAMAN مەكتەبى – حالىقارالىق ستاندارتتاردى ەنگىزىپ, وقۋشىلارىنا جاڭا مۇمكىندىكتەر اشقان العاشقى ءبىلىم وردالارىنىڭ ءبىرى. مەكتەپتىڭ حالىقارالىق جەتىستىكتەرى – قازاق تىلىندە ءبىلىم بەرەتىن مەكتەپتەردىڭ زاماناۋي ءبىلىم بەرۋ جۇيەسىنە بەيىمدەلۋىنىڭ جانە جاھاندىق ءبىلىم بەرۋ قاۋىمداستىعىنا ينتەگراتسيالانۋىنىڭ ايقىن دالەلى.