ءماجىلىس دەپۋتاتى جاناربەك ءاشىمجانوۆ ۇكىمەتكە ارنايى دەپۋتاتتىق ساۋال جولداپ, ەلدەگى ۇلتتىق قۇندىلىقتارعا قارسى ارەكەت ەتەتىن ۇيىمداردىڭ جۇمىسىنا تىيىم سالۋدى تالاپ ەتتى. دەپۋتات لگبت ناسيحاتىنىڭ كەڭىنەن تارالىپ, كامەلەتكە تولماعان جاسوسپىرىمدەرگە باعىتتالۋى قازاقستاننىڭ ءداستۇرلى مورالدىق قۇندىلىقتارىنا قاۋىپ توندىرەتىنىن مالىمدەدى, دەپ جازادى Egemen.kz.
جاناربەك ءاشىمجانوۆ ءوز ساۋالىندا مەملەكەت باسشىسى قاسىم-جومارت توقاەۆتىڭ بۋرابايدا وتكەن ۇلتتىق قۇرىلتايدا لگبت يدەولوگياسىنىڭ كوپتەگەن ەلدەرگە كۇشتەپ تاڭىلىپ كەلگەنىن جانە حالىقارالىق ۇكىمەتتىك ەمەس ۇيىمداردىڭ مەملەكەتتەردىڭ ىشكى ىسىنە ارالاسقانىن اشىق ايتقانىن ەسكە سالدى.
«جاستاردى ازدىرىپ, وتباسىن ويران ەتۋدى كوزدەيتىن بۇل ۇيىمداردىڭ جىمىسقى ارەكەتتەرى سىرتتان, ياعني شەتەلدەردەن قارجىلاندىرىلۋدا. ولار بۇل باعىتتا جۇمىس ىستەيتىن ۇكىمەتتىك ەمەس ۇيىمدارعا ءتۇرلى گرانتتار بەرۋ ارقىلى ەلىمىزدىڭ ىشكى ىسىنە ارالاسىپ, ۇلتتىق بولمىسىمىزعا جات دۇنيەلەردى تاراتۋدا. وسىلايشا, قوعامدى ىشتەن ءىرىتىپ, مەملەكەتىمىزگە قاۋىپ توندىرۋدە», دەدى دەپۋتات.
دەپۋتات ەلدە بەلسەندىلىك تانىتىپ جۇرگەن بىرقاتار ۇيىمداردىڭ قىزمەتىن سىنعا الدى. ول «فەمينيتا» ۇيىمىنىڭ مەكتەپ وقۋشىلارى اراسىندا لگبت-نى ناسيحاتتاپ, «قالاي گوموسەكسۋاليست, لەسبيانكا بولۋ جولدارىن ۇيرەتەتىن» ءىس-شارالارعا شاقىرۋلار تاراتقانىن مالىمدەدى.
«راسىندا دا, سوڭعى جىلدارى الەۋمەتتىك جەلىلەردە ۇلتتىق قۇندىلىقتارىمىزعا جات قۇبىلىستاردى, لگبت-نى ناسيحاتتايتىن ۇيىمداردىڭ بەلسەندى ارەكەتى يمانىمىزدى ءۇيىرىپ, جانىمىزدى شۇبەرەككە تۇيۋدە. اسىرەسە, ولار TikTok, وزگە دە پلاتفورمالار ارقىلى وسكەلەڭ ۇرپاقتى ازعىندىققا ۇگىتتەۋدە. اسا جوعارى تەحنولوگيالىق ءادىس-ايلامەن قارۋلانعان مۇنداي قيتۇرقى ۇگىت-ناسيحاتقا ءالى كامەلەتتىك جاسقا تولماعان, جاقسى مەن جاماندى ايىرا بىلمەيتىن, بۇعاناسى بەكىمەگەن, رۋحاني دىڭگەگى قاتپاعان بالالار مەن جاسوسپىرىمدەرىمىز تەز بوي الدىراتىنى انىق. بۇل ارەكەت بۇۇ-نىڭ بالالار قۇقىعى جونىندەگى كونۆەنتسياسىنا دا قايشى كەلەدى. ياعني ولار حالىقارالىق نورمالاردىڭ ءوزىن بەلدەن باسىپ, ادامدىقتان دا, اردان دا اتتاۋدا», دەدى ول.
دەپۋتاتتىڭ ايتۋىنشا, بۇعان دەيىن اقش-تىڭ USAID (اقش-تىڭ حالىقارالىق دامۋ اگەنتتىگى) قورى ارقىلى قازاقستانعا بولىنگەن قارجىنىڭ توقتاعانىنا قاراماستان, باتىستان قارجىلاندىرىلاتىن ۇيىمدار ءالى دە جۇمىسىن جالعاستىرىپ جاتىر.جاناربەك ءاشىمجانوۆ ۇكىمەتكە بىرقاتار ناقتى تالاپتار قويىپ, قوعامدى ۇلتتىق قۇندىلىقتارعا جات يدەولوگيالاردان قورعاۋ ءۇشىن شۇعىل شارالار قابىلداۋدى سۇرادى.
«بۇكىل الەۋمەتتىك جەلىلەردى قاتاڭ سۇزگىدەن وتكىزىپ, كامەلەتتىك جاسقا تولماعاندار اراسىندا ۇلتتىق ءداستۇرىمىز بەن دۇنيەتانىمىزعا جات قۇبىلىستاردى ناسيحاتتايتىن ازعىن اقپاراتتارعا توسقاۋىل قويۋ. مادەنيەت جانە اقپارات مينيسترلىگىنىڭ لگبت قوزعالىسىنىڭ كامەلەتتىك جاسقا تولماعاندارعا اسەرى تۋرالى زەرتتەۋىن اياقتاپ, جاريالاۋ. ەل پرەزيدەنتىنىڭ تاپسىرماسىنا سايكەس ءداستۇرلى مورالدىق قۇندىلىقتارىمىزدى نىعايتۋ جونىندە ارنايى تۇجىرىمداما ازىرلەۋ. سىرتتان قارجىلاندىرىلاتىن, ءتۇرلى گرانتتار الاتىن, ۇلتتىق سالت-ءداستۇرىمىزدى مانسۇق ەتەتىن ۇكىمەتتىك ەمەس ۇيىمداردى تەكسەرىپ, ولاردىڭ كامەلەتتىك جاسقا تولماعان بالالارمەن جۇمىس ىستەۋىنە توسقاۋىل قويۋ», دەدى ج.ءاشىمجانوۆ.
دەپۋتات بۇعان دەيىن بۇل ماسەلەنىڭ ماجىلىس مىنبەرىنەن بىرنەشە رەت كوتەرىلگەنىن, الايدا ۇكىمەتتەن ناقتى قولداۋ تاپپاي كەلە جاتقانىن ايتتى.
«بىلتىر باستاماشىل ازاماتتار لگبت-عا قارسى جاريالاعان پەتيتسياعا ەكى اپتانىڭ ىشىندە 50 مىڭنان استام ادامنىڭ قولداپ داۋىس بەرۋى قوعامنىڭ دا بۇعان بارىنشا قارسى ەكەنىن بىلدىرەدى. دەگەنمەن, قوعامنىڭ بۇل ورىندى تالابى مادەنيەت جانە اقپارات مينيسترلىگى تاراپىنان ءىشىنارا عانا قولداۋ تاۋىپ, زەرتتەيمىز دەگەنمەن عانا شەكتەلدى. ۇرپاعىڭدى ازدىراتىن, ءداستۇرىڭدى توزدىراتىن, الاۋىزدىقتى قوزدىراتىن, رۋحىڭدى سىندىراتىن, ءسويتىپ ەلدىگىڭدى تىندىراتىن «دەموكارتيالىق ۇردىستەردىڭ» اتاسىنا نالەت! اۋزىمەن قۇس تىستەگەن الىس-جاقىنداعى ەلدەردىڭ ءوزى ەتەكتەرىن قىمتاپ, ەسىكتەرىنە قاراۋىل قويا باستادى. ال, ءبىز كوڭىلىمىزدى كۇپتى قىلىپ, جاراتىلىسىمىزدى بايقاپ, شارانامىزدى شايقاپ تۇرعان قۇبىلىستاردى كوزىمىزبەن كورىپ تۇرىپ قام-قارەكەتسىز وتىرمىز. جانىمىز شىرىلداپ, ءتانىمىز كۇيىپ بارادى», دەدى ول.