سۋرەتشى ءارى ديزاينەر تالعات رۇستەم ۇلىنىڭ ارمانى – وتاندىق كولىك شىعارۋ. ايتۋىنشا, ەلىمىزدە ينجەنەرلىك جاعىنان ءبىلىمدى دە تالانتتى ازاماتتار از ەمەس. تەك قولداۋ كەرەك. ول ءوزى جۋىقتا جول تالعامايتىن كولىك قۇراستىرا باستاپتى. كولىكتىڭ قاڭقاسى شەتەلدىك بولعانىمەن, ۇساق-تۇيەك ءار دەتالدى قولدان جونىپ, قيالىنا قاراي ديزاينىن جاساپ جاتىر.
بالا جاستان ونەرگە, تەحنيكاعا جۋىق تالعات رۇستەم ۇلى تۇركىستان قالاسىندا بەينەلەۋ ونەرى جانە ديزاين فاكۋلتەتىندە ءبىلىم العان. قىزىلوردا ءوڭىرىنىڭ تۋماسى بولعانىمەن, قايبىر جىلدارى شىعىستىڭ شەمونايحا قالاسىنا كوشىپ كەلىپتى. مۇندا قازىر كولىكتىڭ ءجۇرۋ بولىگىن جوندەيدى, كىشىگىرىم تەحنيكالار قۇراستىرادى. تەمىردەن ءتۇيىن ءتۇيىپ, تاس قاشايتىن ونەرى جانە بار.
– وتاندىق كولىگىمىز بولسا دەگەن ارمانىم – اسپانداعى اي ەمەس. كىرىسسەك, قولىمىزدان كەلەتىن ءىس. قازىر كەرەك-جاراقتىڭ ءبارى بار. بۇرىنعى سۋرەتشىلەر سەكىلدى بوياۋدى شوپتەن جاساپ, شەدەۆر تۋعىزۋدىڭ كەرەگى جوق. تەك ەڭبەك ەتۋىمىز كەرەك. ايگىلى «رولس رويس» كومپانياسىنىڭ ىرگەسىن قالاعان چارلز روللس تا قاراپايىم شارۋانىڭ بالاسى ەدى. كەدەيلىكتىڭ كەبىن كيىپ ءجۇرىپ, الەمگە ايگىلى ماشينا جاسادى, – دەپ ءوز-ءوزىن جىگەرلەندىرىپ قويدى ونەرتاپقىش تالعات رۇستەم ۇلى.
كەيىپكەرىمىز قۇراستىرىپ جاتقان كولىگىنىڭ ديزاينىن دا ءوزى سىزىپ, جاساپ جاتىر. تەحنيكاسىنىڭ پوشىمىنا عانا ەمەس, ساپاسىنا دا ءمان بەرگەن. ءجۇرىس بولىگىندەگى كەيبىر تەمىرلەردىڭ اراسىنا سۋ جينالىپ, شىرىتپەۋى ءۇشىن دە ساڭىلاۋلار جاساعان. وندايدى الپاۋىت كولىك قۇراستىرۋ زاۋىتتارى ويلاي بەرمەيدى دەيدى. قىل اياعى جارىق شامدارىنا دەيىن قولدان جاساۋعا بەكىنگەن. اسا ۇقىپپەن قولعا العان ماشيناسىن كۇزگە قاراي اياقتاپ, ءوزى تىزگىندەيدى. قۇجاتتارىن دا زاڭداستىرىپ الاتىنىن ايتادى.
– قۇراۋدىڭ ءجونى وسى دەپ, تەمىرلەردى دانەكەرلەي بەرمەيمىن. ءار دەتالدىڭ ەسەبى بار. ەڭ اۋەلى قاۋىپسىزدىكتى العا قويدىم. ودان سوڭ جايلىلىق. ديزاين جاعى دا ۇيلەسىپ تۇرۋى كەرەك. قوزعالتقىشتىڭ كولەمى – 3,9. دەمەك جولسىز جەرلەرمەن دە جۇرۋگە قۋاتتى. ءجۇرۋ بولىگىنىڭ دەتالدارىن تۇگەلدەي دەرلىك قولدان جاسادىم, – دەيدى شەبەر.
ايتىپ وتكەنىمىزدەي, تالعات شەبەر كولىكتەن باسقا دا تەحنيكالاردى قولدان قۇراپ الادى. تاپسىرىسپەن اۋىلداستارىنا قۇراپ تا بەرەدى. قازىر شەبەرحاناسىندا كولىكتەن بولەك بەتون ەزەتىن قۇرىلعىنى دا قالقايتىپ قويعان. بىراق ۇلى ارمانى – قازاقتىڭ كولىگى. ەگەر وتاندىق ماشينا شىعىپ جاتسا, ۇلتتىق ورنەك قوسىپ, الەمدىك نارىققا شىقساق دەپ قيالىنا ەرىك بەرگەن. بالكىم, ەرتەڭ-اق ورىندالاتىن ارمان.
شىعىس قازاقستان وبلىسى,
شەمونايحا قالاسى