اتىراۋ قالاسىنىڭ پروكۋراتۋراسى جىل باسىنان بەرى 200-دەن استام بالانىڭ قۇقىعىن قورعادى. جەرگىلىكتى اتقارۋشى ورگاندار مەن پوليتسيانىڭ 24 قىزمەتكەرى تارتىپتىك جاۋاپقا تارتىلدى, دەپ حابارلايدى Egemen.kz.
«پوليتسيا قىزمەتكەرلەرى كامەلەت جاسىنا تولماعاندارعا قاتىستى قورعاۋشىنىڭ قاتىسۋىنسىز اكىمشىلىك حاتتامالار تولتىرعان. پروكۋراتۋرانىڭ نارازىلىعىمەن وسىنداي 197 حاتتامانىڭ كۇشى جويىلدى. ۇيدەن وقيتىن مۇگەدەك بالالارعا جاردەماقى تولەنبەگەنى, زاڭمەن بەلگىلەنگەن نورمالارعا سايكەس جەتىم بالالاردى مەملەكەتتىك تۇرعىن ءۇي قورىنان بەرىلەتىن ءۇي كەزەگىنە قويماعانى تۋرالى دەرەكتەر انىقتالدى», دەپ حابارلادى وبلىستىق پروكۋراتۋرادان.
پروكۋرورلىق قاداعالاۋ اكتىلەرى نەگىزىندە 3 جەتىم بالا تۇرعىن ءۇي الۋ كەزەگىنە تۇرعىزىلدى. ال ۇيدەن ءبىلىم الاتىن 7 مۇگەدەك بالالارعا جاردەماقى تولەندى.
«وسىلايشا پروكۋراتۋرانىڭ ارالاسۋىمەن جەتىم جانە مۇگەدەك بالالاردىڭ كونستيتۋتسيالىق قۇقىعى قورعالدى. پروكۋراتۋرا قىزمەتكەرلەرى تەرىس مازمۇندى جانە ءوز-وزىنە قول جۇمساۋدى, ەسىرتكى قۇرالدارىن ناسيحاتتايتىن 85-تەن استام ينتەرنەت-سايتتى, چاتتار مەن الەۋمەتتىك جەلىدەگى پاراقشالاردى بۇعاتتادى», -دەپ مالىمدەدى پروكۋراتۋرادان.