بۇگىن, 1 ساۋىردە اتىراۋ, ماڭعىستاۋ جانە باتىس قازاقستان وبلىسىنداعى سۋ ايدىندارىندا «بەكىرە – 2025» بالىق قورىن قورعاۋ اكتسياسى باستالدى, دەپ حابارلايدى Egemen.kz.
بالىق شارۋاشىلىعى كوميتەتىنىڭ توراعاسى سەرىك سەرماعامبەتوۆتىڭ ايتۋىنشا, بالىق قورعاۋ اكتسياسى 31 مامىرعا دەيىن جالعاسادى. كەڭاۋقىمدى اكتسيانى وتكىزۋگە 1466 قىزمەتكەر قاتىسادى. ونىڭ ىشىندە اتىراۋ وبلىسىندا 604, باتىس قازاقستاندا – 222, ال ماڭعىستاۋ وڭىرىندە 640 قىزمەتكەر سۋ ايدىندارىن قاداعالالايدى. سونداي-اق 298 اۆتوكولىك, 84 قايىق پەن شاعىن كولەمدى كەمە, 6 ۇشۋ اپپاراتىن تارتۋ كوزدەلگەن.
«اكتسيا كەزىندە تابيعات جانە قۇقىق قورعاۋ ورگاندارىنىڭ قىزمەتكەرلەرى باعالى بەكىرە تۇقىمداست بالىق تۇرلەرىن براكونەرلەردەن قورعاپ, ۋىلدىرىق شاشۋىن قامتاماسىز ەتەدى. ويتكەنى جىل سايىن بەكىرە تۇقىمداس بالىقتاردىڭ سانى ازايىپ بارادى. وسىعان بايلانىستى اۋىل شارۋاشىلىعى, ىشكى ىستەر مينيسترلەرى مەن ۇلتتىق قاۋىپسىزدىك كوميتەتى توراعاسىنىڭ «بەكىرە» بالىق قورعاۋ اكتسياسىن وتكىزۋ تۋرالى بىرلەسكەن بۇيرىعىنا قول قويىلدى. سوعان سايكەس بالىق قورعاۋ اكتسياسىن ۇيلەستىرۋ شتابى قۇرىلىپ, وعان جەتەكشىلىك ەتۋ بالىق شارۋاشىلىعى كوميتەتىنە جۇكتەلدى», دەدى سەرىك سەرماعامبەتوۆ.
شەكارا قىزمەتىنىڭ اتىراۋ وبلىسى بويىنشا دەپارتامەنتى باستىعىنىڭ ءبىرىنشى ورىنباسارى ايدوس قيقاباەۆتىڭ مالىمەتىنشە, براكونەرلەر ءجيى بوي كورسەتەتىن اۋماقتاردا ستاتسيونارلىق جانە جىلجىمالى بەكەتتەر, ءموبيلدى توپتار ۇيىمداستىرىلادى.
«كاسپي تەڭىزىنىڭ جاعالاۋى مەن اكۆاتورياسىندا, جايىق پەن قيعاش وزەندەرىنىڭ ساعاسىندا باقىلاۋ كۇشەيتىلەدى. اۋەجايلار, ۆوكزالدار مەن اۆتوجولداردا بالىق پەن بالىق ونىمدەرىن زاڭسىز تاسىمالداۋعا قارسى ءىس-شارالار جۇرگىزىلەدى. ءبىزدىڭ باستى مىندەتىمىز – مەملەكەتتىك شەكارا ماڭىندا براكونەرلىك ارەكەتتەردى دەر كەزىندە انىقتاۋ. باقىلاۋ بەكەتتەرىنىڭ جۇمىسىن كۇشەيتىپ, جايىق-كاسپي سۋ باسسەينىندە, وزەن-كولدەردە پاترۋلدەۋ جۇمىسىن جالعاستىرامىز», دەپ مالىمدەدى ول.