سەمەي قالاسىنىڭ جەدەل مەديتسينالىق جاردەم اۋرۋحاناسىندا 72 جاستاعى ناۋقاستىڭ جۇرەك قاقپاقشالارىن اۋىستىرۋ كۇردەلى وپەراتسياسى ءساتتى جاسالدى. بۇگىندە جۇرەك قاعىسى, اياق الىسى وڭالعان ەمدەلۋشى دارىگەرلەرگە ءدان ريزا.
ء«بىز اورتا, ميترالدى قاقپاقشالاردى بيولوگيالىق پروتەزدەرمەن الماستىرۋ وپەراتسياسىن جاسادىق. بۇل – جۇرەك قاقپاقشالارىنىڭ اقاۋلارىن ەمدەۋدىڭ زاماناۋي ءارى ءتيىمدى ادىستەرىنىڭ ءبىرى. وپەراتسيادان كەيىن ەمدەلۋشى ءوزىن جاقسى سەزىنەدى, وڭالتۋ كەزەڭىنەن ءوتىپ جاتىر», دەدى جمجا كارديوحيرۋرگيالىق قىزمەتىنىڭ جەتەكشىسى دوس امانوۆ.
مامانداردىڭ ايتۋىنشا, بيولوگيالىق, مەحانيكالىق پروتەزدەردى تاڭداۋ ناۋقاستىڭ جاسىنا, ءومىر سالتىنا, انتيكواگۋليانتتارعا قارسى كورسەتىلىمدەردىڭ بولۋىنا بايلانىستى جۇرگىزىلەدى. دۇرىس كۇتىم مەن دارىگەرلەردىڭ ۇسىنىمدارىن ساقتاۋ ارقىلى بيولوگيالىق قاقپاقشا ورناتىلعان ناۋقاستار تولىققاندى ءومىر سۇرە الادى.
«بۇعان دەيىن ناۋقاس ەنتىگۋ, قان قىسىمىنىڭ جوعارىلاۋى, جالپى السىزدىك سياقتى بەلگىلەردەن زارداپ شەككەن. تەكسەرۋ بارىسىندا جۇرەك قاقپاقشالارىندا ايتارلىقتاي وزگەرىستەر بارى انىقتالدى. ەگەر ناۋقاس دەر كەزىندە كەلىپ ەمدەلمەسە, مۇنداي ناۋقاستاردىڭ ءومىر ءسۇرۋ ۇزاقتىعى بەس جىلدان اسپايدى», دەيدى دارىگەرلەر.
قازىر ەلىمىزدە جۇرەك-قان تامىرلارى اۋرۋلارىنىڭ سالدارىنان جىل سايىن مىڭداعان ادام كوز جۇمادى. ستاتيستيكاعا سۇيەنسەك, جۇرەك قاقپاقشالارىنىڭ اقاۋى ءار 100 000 ادامنىڭ 7-ىندە كەزدەسەدى. ماسەلەن, 2024 جىلى سەمەي قالاسىنىڭ جەدەل مەديتسينالىق جاردەم اۋرۋحاناسىندا 100 كارديوحيرۋرگيالىق وپەراتسيا جاسالعان, ونىڭ ونىندا جۇرەك قاقپاقشالارى اۋىستىرىلعان. مۇنداي جوعارى تەحنولوگيالىق وپەراتسيالاردىڭ قۇنى 3 ميلليون تەڭگەدەن اسادى. مىندەتتى الەۋمەتتىك مەديتسينالىق ساقتاندىرۋ جۇيەسىندە ساقتاندىرىلعان ازاماتتارعا وپەراتسيا تەگىن جاسالادى.
جۇرەك – ادام ءومىرىنىڭ باستى قوزعاۋشى كۇشى. سوندىقتان ونىڭ ساۋلىعى ۋاقتىلى تەكسەرىلىپ, قاجەتتى ەم-شارالار جۇرگىزىلىپ وتىرۋعا ءتيىس. سەمەيلىك دارىگەرلەردىڭ تاجىريبەسى جۇرەك اۋرۋلارىمەن كۇرەستە مەديتسينانىڭ جاڭا دەڭگەيگە كوتەرىلگەنىن كورسەتىپ وتىر.
اباي وبلىسى