ۇلىتاۋ وبلىسىندا العاش رەت مىندەتتى الەۋمەتتىك مەديتسينالىق ساقتاندىرۋ شەڭبەرىندە تىزە, جامباس بۋىنىن ەندوپروتەزدەۋ وپەراتسياسى جاسالدى. بۇل – زاقىمدانعان بۋىندى جاساندىسىنا ايىرباستايتىن وتە كۇردەلى وپەراتسيا. ەندوپروتەزدەردى پايدالانۋ مەرزىمى – 20 جىل. جوعارى تەحنولوگيالىق مەديتسينالىق كومەك بۋىنى قاتتى زاقىمدانعان ەمدەلۋشىلەرگە كورسەتىلەدى.
كۇنى بۇگىنگە دەيىن ۇلىتاۋ وبلىسىنداعى ناۋقاستار كۇردەلى وپەراتسيا جاساتۋعا قاراعاندى, استانا قالالارىنا سابىلاتىن. وبلىس قايتا اشىلعاننان بەرى دارىگەرلەر جەرگىلىكتى حالىقتى وزدەرى ەمدەۋگە ارەكەت ەتىپ جاتىر. بۇرىن-سوڭدى مۇنداي وپەراتسيا ەلىمىزدىڭ ءىرى قالالارىندا جاسالاتىن, ناۋقاستار كەزەگىن ۇزاق كۇتەتىن. ەندى ەندوپروتەزدەۋ ۇلىتاۋلىقتارعا الىسقا بارماي-اق, جەزقازعان قالاسىنداعى الەۋمەتتىك مەديتسينالىق ساقتاندىرۋ قورىنا قاراستى «جەزقازعان مەديتسينالىق ورتالىعى» جشس بازاسىندا قولجەتىمدى.
بۇرىن مۇنداي وپەراتسيا كوممەرتسيالىق نەگىزدە جاسالاتىن. جەزقازعان مەديتسينالىق ورتالىعىنىڭ تراۆماتولوگيا بولىمشەسىنىڭ تراۆماتولوگ-ورتوپەدى ەرعانات شاحاتوۆ ءمامس شەڭبەرىندە جاسالعان العاشقى وپەراتسيانىڭ قالاي وتكەنى تۋرالى: «بىزگە وپەراتسيا جاساۋدا تاجىريبەسىن بولىسۋگە ەلورداداعى «Alanda» كلينيكاسىنان جوعارى دارەجەلى تراۆماتولوگ-ورتوپەد, استانا مەديتسينا ۋنيۆەرسيتەتىنىڭ عالىمى ءبىرجان قايىربەك ۇلى ارنايى كەلدى. سونىمەن قاتار وپەراتسياعا ەكىنشى دارەجەلى تراۆماتولوگ-ورتوپەد جاسۇلان شالاباەۆ قاتىستى. ەكى كۇننىڭ ىشىندە 3 جامباس, 3 تىزە بۋىنىن اۋىستىردىق. دالىرەك ايتقاندا, التى ادامعا وپەراتسيا جاسالدى. كۇردەلى وپەراتسيانى ءوزىمىز بىردەن جاساپ كەتەمىز دەپ ايتا المايمىن. ازىرگە تاجىريبەسى مول تالىمگەردىڭ كومەگى قاجەت. الداعى ۋاقىتتا ءبىلىمىمىزدى تەرەڭدەتىپ, العان تاجىريبەمىزدى جەتىلدىرە بەرەمىز», دەپ مالىمدەدى.
جالپى, وپەراتسيالاردىڭ قۇنى 2 ملن تەڭگەدەن اسادى. وپەراتسياعا دەيىن ناۋقاستار تۇگەلدەي تەكسەرىستەن وتەدى. اسقازاندا جارا, جۇرەكتە اقاۋ بولماۋى كەرەك.
كەڭ ءارى جارىق بولمەدە جاتقان ەمدەلۋشىلەردىڭ قاباعى اشىق. اياعىن باسا الماي, اۋرۋى جانىنا باتقان راۋشان مۇراتقىزى قاراعاندىعا بارىپ, ەمدەلمەك بولعان ەكەن. ساتباەۆ قالاسىنداعى ەمحانادان تراۆماتولوگتىڭ جولداماسىن الىپ, وپەراتسياعا دەيىنگى بۇكىل مەديتسينالىق تەكسەرۋدەن تەگىن وتكەن. قاراجال قالاسىنىڭ تۇرعىنى لەيلا شۋباەۆا دا ءمامس قاراجاتى نەگىزىندە وپەراتسيانى تەگىن جاساتىپ, اياعىن باسىپ جۇرە الاتىن جاعدايعا جەتتى. وپەراتسيا جاساتقان جاندار 7-8 كۇن ەمدەلىپ بولعان سوڭ وزدەرى تۇراتىن جەرگىلىكتى ەمحانا دارىگەرىنىڭ باقىلاۋىنا كوشەدى. مازالاعان سۇراقتارى بولسا كەز كەلگەن ۋاقىتتا وزدەرىنە وپەراتسيا جاساعان دارىگەرگە كەلىپ, كەڭەس الا الادى.
ۇلىتاۋ وبلىسى