وتاندىق ستارتاپ الەمدىك نارىققا شىقتى

قوسىمشانىڭ نەگىزگى ەرەك­شەلىگى – وقۋ, ءبىلىم, ويىن-ساۋىق سالاسىندا پايدالانۋشىلارعا قولايلى مۇمكىندىكتەر ۇسىنۋ. مىسالى, قولدانۋشىلار تاريحي تۇلعالاردىڭ تسيفرلىق ەگىزدەرىن جاساپ, ۆيرتۋالدى سۇحبات قۇرا الادى. ەينشتەينمەن فيزيكا جونىندە پىكىر الماسىپ, بەلگىلى جازۋشى نەمەسە عالىممەن اڭگىمە-دۇكەن قۇرۋ مۇمكىندىگى بار. سونىمەن قاتار سۋرەتتەر گەنەراتسيالاۋ, ءماتىن جازۋ, ەسسە قۇراستىرۋ سياقتى فۋنكتسيالارمەن جابدىقتالعان. «GoatChat.AI» قوسىمشاسىندا اقىلى جانە تەگىن قىزمەت تۇرلەرى قاراستىرىلعان. تەگىن نۇسقادا شەكتەۋلى مۇمكىندىكتەر ۇسىنىلسا, اقىلى نۇسقادا پايدالانۋشىلار قوسىمشانىڭ بارلىق فۋنكتسياسىن تولىق ءارى شەكتەۋسىز قولدانا الادى. ماسەلەن, اقش-تا اپتالىق جازىلىم – 9,99 دوللار, ايلىق جازىلىم – 24,99 دوللار, ال جىلدىق جازىلىم قۇنى – 99,99 دوللار.

جاقىندا «GoatChat.AI» جوباسىن يسپانيانىڭ ءىرى مەدياحولدينگى «Newry Global Media» ساتىپ الدى. بۇل تۋرالى «GoatChat.AI» ستار­تابىنىڭ نەگىزىن قالاۋشىلاردىڭ ءبىرى ءارى باس ديرەكتورى باقىتجان دوس «Facebook» الەۋمەتتىك جەلىسىندە حابارلادى.

«بۇگىن ءبىزدىڭ كومپانيا تانىمال «AI» قوسىمشاسى «GoatChat.AI» ستارتابىن يسپاندىق «Newry Global Media» مەدياحولدينگىنە ساتقانىن رەسمي تۇردە حابارلايدى. قوسىمشا 52 اپتا بويى ەۋروپالىق «App Store» چارتتارىندا ۇزدىك ۇشتىكتە تۇراقتاپ, 9 ميلليون رەت جۇكتەلگەن», دەپ جازدى باقىتجان دوس.

سونداي-اق بۇل مامىلە تۋرالى «MOST Ventures» قورىنىڭ باسقارۋشى سەرىكتەسى ءالىم حاميتوۆ تۇسىنىكتەمە بەردى. قور بۇعان دەيىن «Adaptive Plus» كومپانياسىنا ينۆەستيتسيا سالعان بولاتىن.

«Adaptive Plus» كومپانياسى ءوزىنىڭ تانىمال «AI»-قوسىمشاسى «GoatChat.AI»-دى يسپاندىق «Newry Global Media» مەدياحولدينگىنە ساتتى. 2021 جىلى قۇرىلعان «Goat­Chat.AI» قوسىمشاسى ستۋدەنتتەرگە وقۋ بارىسىندا تاپسىرمالار مەن ەمتيحاندارعا دايىندالۋعا كومەكتەسەتىن ۇلكەن تىلدىك مودەلدەر نەگىزىندە جۇمىس ىستەيدى. سونىمەن قاتار قوسىمشا تسيفرلىق ەگىزدەردى («AI Twin») جاساۋ, ارنايى تۇسقاعازداردى گەنەراتسيالاۋ, جاساندى ينتەللەكت پەن تاريحي تۇلعالارمەن توپتىق چاتتار سەكىلدى ويىن-ساۋىق قىزمەتتەرىن ۇسىنادى. بۇل قىزمەتتەر ار­قىلى قوسىمشا 9 ميلليون رەت جۇكتەلىپ, 52 اپتا بويى ەۋروپا «App Store» چارتتارىنىڭ ۇزدىك بەستىگىنەن تۇسپەدى. «TechCrunch» باسىلىمىنىڭ دەرەكتەرى بويىنشا الەمدەگى ەڭ كوپ جۇكتەلەتىن ءارى تابىستى «AI»-قوسىمشالاردىڭ ۇزدىك وندىعىنا كىردى», – دەيدى ءالىم حاميتوۆ.

ونىڭ ايتۋىنشا, مادريد قا­لا­سىندا ورنالاسقان «Newry Global Media» كومپانياسى تسيفر­لىق كونتەنتتى قۇرۋعا, مونە­تي­زاتسيالاۋعا جانە تاراتۋعا مامان­دانعان. كەيىنگى ەكى جىل ىشىندە بۇل حولدينگتىڭ قوسىمشالارى 520 ميلليون رەت جۇكتەلىپ, 5 ميل­ليون جازىلۋشى جيناعان. كوم­پانيا افريكا, ازيا, لاتىن امە­ريكاسى ەلدەرىندە ءوز قىزمەتىن ۇسىنادى. «GoatChat.AI» ستارتابىن ساتىپ الۋ – مەدياحولدينگتىڭ جاھاندىق نا­رىقتاعى ۇستانىمىن كۇشەيتۋگە ارنالعان ستراتەگيالىق قادام.

«GoatChat.AI» ستارتابىنىڭ نەگىزىن قالاۋشىلاردىڭ ءبىرى ەربول كوپجاسار ستارتاپتىڭ قالاي پايدا بولعانىن ايتىپ بەردى.

«16 جاسىمدا ۇلىبريتانيا­داعى نيۋكاسل ۋنيۆەرسيتەتىنە وقۋ­عا ءتۇستىم. وقۋىمدى جوعارى ۇل­گە­رىممەن تەگىن جالعاستىر­دىم. ۋني­­ۆەرسيتەتتى اياقتايتىن كەز­دە مەس­سەند­جەرلەردىڭ بىرىندە باع­دار­­لا­ماشى بولىپ جۇمىس ىستەپ ءجۇر­­دىم. كەيىن قازاقستانعا ورالدىم. «nFactorial»-دا مەنتور بولىپ جۇمىس ىستەپ, مەملەكەتتىك سەك­تور­دىڭ قالاي جۇمىس ىستەيتىنىن كو­رۋ ماق­ساتىندا «استانا» حالىق­ارا­لىق قارجى ورتالىعىنا ورنالاس­تىم. سونىمەن قاتار ءتۇرلى تاپسىرىس­تار الىپ وتىردىم, الايدا ءوزىم باع­دار­لامالاۋدان شارشاپ, مەنەدجەر­لىككە بەت بۇردىم», دەيدى ەربول.

باقىتجان دوسپەن تانىسىپ, ونىمەن ءبىر جىل ماسكەۋدە ليۋكس كولىكتەردى جالعا بەرەتىن قوسىمشا جاساۋ جوباسىندا جۇمىس ىستەگەننەن كەيىن, ەلگە ورالىپ, ءوز جوبالارىن قولعا العان.

«GoatChat.AI» جوباسى كەزەكتى اڭگىمە بارىسىندا دۇنيەگە كەلگەن. «Goat» اتاۋىن تاڭداپ, ادام جاساندى ينتەللەكتپەن اڭگىمەلەسە السا, ايگىلى تاريحي تۇلعالارمەن دە سويلەسە الۋى كەرەك دەگەن يدەيانى جۇزەگە اسىرعان. كەيىنىرەك جوبانىڭ فۋنكتسيونالى كەڭەيتىلىپ, تسيفرلىق ەگىزدەردى جاساۋ قىزمەتى قوسىلادى.

ەربول كوپجاساردىڭ ايتۋىنشا, قولدانۋشى چات-بوتقا قاجەتتى اقپاراتتى ەنگىزىپ, ونىڭ كەز كەلگەن سۇراققا جاۋاپ بەرۋىن قامتاماسىز ەتە الادى. «مىسالى, قارجىلىق ساۋات­تىلىق بويىنشا سۇراقتارعا جاۋاپ بەرەتىن تسيفرلىق ەگىزدەردى جاساۋعا بولادى. ءبىر قىزىعى, پايدالانۋشىلار قاراپايىم ونلاين-اسسيستەنتكە قاراعاندا, تسيفرلىق ەگىزدەرمەن سويلەسكەندە ءجيى سالەم­دەسىپ, العىس ايتادى», دەيدى ول.

قازىرگى ۋاقىتتا مامىلەنىڭ قار­جى­لىق جاعى جاريالانعان جوق. دەگەن­مەن بۇعان دەيىن «GoatChat.AI» ستارتابى 1,2 ميلليون دوللار ينۆەستيتسيا تارتىپ ۇلگەرگەن. قار­جىلاندىرۋعا 500 «Startups», «MOST Ventures» جانە مۇرات ءابدىراح­مانوۆ قاتىسقان. بۇعان دە­يىنگى سۇحباتىندا ەربول كوپجاسار ستار­تاپتىڭ كەلەسى ينۆەستيتسيالىق راۋندتا 30 ميلليون دوللار تارتۋدى كوزدەيتىنىن ايتقان ەدى.