بالىقشىلار باسەكەسى

بۇل كۇنى كۇرشىم كوپىرىنىڭ تۇسىندا بالىقشىلار بەل­گىلەنگەن جەرگە ورنالا­سىپ,­ قارماق سالۋعا كىرىسكەن. قاتى­سۋ­شى­لاردىڭ ىشىندەگى ەڭ كىشىسى 16 جاستا بولسا, ۇلكەنى سەكسەننىڭ سەڭگىرىنە تاياعان ەدى. ولار بالىققا كىرىسكەندە, جاعالاۋعا قاز-قاتار تىگىلگەن كيىز ۇيلەردىڭ تۇسىندا قازان كوتەرىلىپ جاتقان. ساحنا تورىندە ەلىمىزدىڭ ەسترادا جۇلدىزدارى ءان سالعان, ونەر سۇيەر ەل تامسانعان. سپورتشىلار قوي كوتەرىپ, مىقتىلىقتارىن سىناسا, مەرگەندەر ساداق اتىپ سايىستى.

– ارنايى وسى فەستيۆال ءۇشىن الماتىدان كەلىپ تۇرمىن. نەمە­رە­لەرىمدى ەرتە كەلدىم. بۇعان دەيىن شىعىس­تىڭ جازىن عانا كورگەنمىن. ەندى, مىنە, قىسىن دا كورىپ جاتىرمىن. قىسى دا كەرەمەت ەكەن. كونتسەرت كورىپ, يت جەككەن شاناعا وتىرىپ, ءماز بولدىق, – دەيدى فەس­تيۆال قوناعى گۇلجان اقىل­بەكقىزى.

يت شانا سەرۋەنىنەن بولەك اۋە شارلارىمەن ۇشۋعا دا مۇمكىندىك جاسالعان. بۇل ۋاقىتتا بالىقشىلار ورىندارىنان تاپجىلماي قارماعىن قابۋدى تىلەگەن. ولاردىڭ ىشىندە ايەلدەر دە بار.

– جەتپىستەن استىم. وسكەمەننەن جارىسقا قاتىسۋ ءۇشىن كەلدىم. بالىق اۋلاۋمەن زەينەتكە شىققاننان باستاپ اينالىسىپ كەلەمىن. قازىر سۇيىكتى ءىسىم. ادام قارتايعان شاعىندا اينالىساتىن جۇمىسى بولماسا, اۋىرىپ-سىرقاي بە­رەدى. سول ءۇشىن ەرمەگى بولۋى كەرەك, – دەيدى ۆەرا دميتريەۆنا.

ەكى ساعاتتان سوڭ قازىلار القاسى اۋلان­عان بالىقتاردى نومىرلەپ, سال­ماقتارىن ولشەدى. بۇل جارىستىڭ باس جۇلدەسى دە ەرەكشە ەدى. گران-پري – ەكى ادامعا ارنالعان مالديۆ ارالدارىندا بالىق اۋلاۋ تۋرى. قالعان ءۇش ورىنعا الاكولدە بالىق اۋلاۋ باقىتى بۇيىرعان.

– مۇنداي جارىس ەلىمىزدە ءبىرىن­شى رەت وتكىزىلىپ تۇر. فەستيۆالعا 450-دەن استام ادام قاتىستى. ونىڭ ىشىندە بالا دا, ايەلدەر دە بار. اۋلانعان بالىق­تاردىڭ ىشىندەگى ەڭ ۇلكەنى ءارى سالماقتىسى 680 گرامدىق بۇقتىرما تابانى بولدى. ەندى تەك قىسقى فەستيۆال عانا ەمەس, جازدا دا ۇيىمداستىرۋدى جوسپارلاپ وتىرمىز, – دەدى شقو سپورت­تىق بالىق اۋلاۋ فەدەراتسياسىنىڭ پرەزيدەنتى الەكساندر گۋلياەۆ.

شىعىس قازاقستان وبلىسى,

سامار اۋدانى