بيىلعى ناۋرىز مەرەكەسى قارساڭىندا اقتوبەدە ەرەكشە كۇنتىزبە جارىققا شىقتى. ونىڭ شەبەر كوركەمدەلگەن باستاپقى بەت-مۇقاباسىنا «اقتوبە. 2025 جىل. جۇمىسشى ماماندىقتار جىلى» دەپ جازىلعان. كۇنتىزبە ادەتتەگىدەي قاڭتار ايىنان ەمەس, شىعىستىڭ جىل باسى سانالاتىن 22 ناۋرىزدان باستالادى. ياعني بيىلعى ناۋرىزدان كەلەسى جىلعى ناۋرىزعا دەيىنگى ۋاقىت ارالىعىن قامتيدى.
العاشقى پاراق «جىل باسى. 22 ناۋرىز. سەنبى» دەگەن جازۋمەن اشىلادى. اسەم بەزەندىرىلگەن پاراقتىڭ ورتا تۇسى پاراقشانى قولدانۋشىنىڭ ءوز جوسپارلارىن, ويلارىن جازىپ وتىرۋى ماقساتىندا داپتەردىڭ جولاق جولدارى سىندى بوس قالدىرىلعان.
ال قازاقى ورنەك سالىنىپ, كوك تۋىمىزدىڭ تۇسىمەن بويالعان كورنەكى تۇستان «جىل باسى ۇلىستىڭ ۇلى كۇنى ناۋرىز — ءبىزدىڭ ءداستۇرىمىزدىڭ قايتالانباس بەلگىسى. بۇل مەيرام حالقىمىزدىڭ مادەنيەتى مەن تاريحىن, سول سياقتى ءبىزدىڭ بىرلىگىمىز بەن ىنتىماعىمىزدى ايقىندايدى. ق.توقاەۆ» دەگەن قاناتتى ءسوزدى وقيمىز.
كۇنپاراقتىڭ ءبىرىنشى ەرەكشەلىگى — ناۋرىزدان-ناۋرىزعا دەيىنگى ۋاقىتتى قامتىسا, ەكىنشى ەرەكشەلىگى — وسىلاي ءار پاراق سايىن پرەزيدەنتىمىز قاسىم-جومارت توقاەۆتىڭ ءار كەزەڭدە, ءار تۇستا ايتقان, باعدارىمىزعا اينالعان ۇستانىمىنىڭ بەرىلۋى. پاراساتتى پايىمداۋلار پاراقتان-پاراققا جاي جالعاسپايدى, ەلىمىزدىڭ مەرەيلى, داتالى كۇندەرمەن, بەلگىلى قايراتكەرلەرىمىزدىڭ, اقىن-جازۋشىلارىمىزدىڭ, باسقا دا ارداقتىلارىمىزدىڭ مەرەيتويلىق تۋعان كۇندەرىمەن مازمۇنداس كەلىپ, قادىر-قاسيەتىن اشا تۇسەدى.
ماسەلەن, بيىلعى 24 ناۋرىزدا بەلگىلى عالىم ەبىنەي بوكەتوۆتىڭ تۋعانىنا 100 جىل تولادى. ايتۋلى عالىمنىڭ مەرەيتويىن ەسكە سالعان پاراقتا پرەزيدەنتىمىزدىڭ ء«بىز عىلىمدى دامىتپاساق, ەشقاشان وزىق مەملەكەت بولا المايمىز. عالىمدارىمىزدىڭ ەڭبەگى — ءبىزدىڭ بولاشاعىمىزدىڭ ىرگەتاسى» دەگەن تۇجىرىمى بەرىلگەن.
ءارى قاراي جالعاستىرساق, 25 ناۋرىزدا ايگىلى «قىز جىبەك» فيلمىندە تولەگەن رولىندە ويناپ, حالقىمىزدىڭ ماقتانىشىنا اينالعان داڭقتى اكتەر قۇمان تاستانبەكوۆتىڭ تۋعانىنا 80 جىل تولادى ەكەن. مەملەكەت باسشىسىنىڭ وسى بەتتەگى «مادەنيەت دەگەنىمىز — ۇلتتىق سانا-سەزىمدى جاھاندىق اۋقىمدا نىعايتا تۇسەتىن مىقتى تۇعىر» دەگەن تۇجىرىمى ساحنا ساڭلاعىنىڭ ۇلت مادەنيەتىنە قوسقان ۇلەسىمەن ۇندەسىپ تۇر.
ناۋرىزدىڭ سوڭعى ەكى كۇنى پرەزيدەنتتىڭ «كوپشىلىكتىڭ كوڭىلىنەن شىعامىن دەپ تۋرا سوزدەن جاڭىلۋعا بولمايدى» جانە ء«بىز ءتول تاريحىمىزعا كوكجيەگى كەڭ, تامىرى تەرەڭ وركەنيەتتىك كوزقاراسپەن قاراۋىمىز كەرەك» دەگەن اقيقاتتى العا تارتقان تۇجىرىمىمەن اياقتالادى.
الداعى ءساۋىر ايىنىڭ بىرىندە ارقالى كومپوزيتور, قازاقتىڭ ءبىرتۋار ۇلى نۇرعيسا تىلەنديەۆتىڭ تۋعانىنا 100 جىل تولادى. وسى بەتتەن مەملەكەت باسشىسىنىڭ «نۇرعيسا تىلەنديەۆ — قازاق مۋزىكاسىنىڭ ۇلكەن شەبەرى, ونىڭ شىعارمالارى ۇلتتىق مادەنيەتىمىزدىڭ التىن قورىنا قوسىلادى. ونىڭ مۋزىكاسى حالىقتىڭ جۇرەگىنە تەرەڭ جول تاپتى» دەگەن جوعارى باعاسىن وقيمىز.
مامىر ايى — وتان قورعاۋ, جەڭىس مەرەكەسىمەن بايلانىستى. مۇنى پرەزيدەنت «وتانعا قىزمەت ەتۋ — ءاربىر ازاماتتىڭ پارىزى» دەپ اسقاق لەبىزبەن بىلدىرەدى.
كۇنپاراقتىڭ تاعى ءبىر بەتىندەگى ء«بىز كوشكە ىلەسەتىن ەمەس, كوشتى باستايتىن ەلدەردىڭ قاتارىندا بولۋىمىز كەرەك» دەگەن مەملەكەت باسشىسىنىڭ پايىمداماسى ءار ادامعا وي سالسا كەرەك.
قىركۇيەك ايىنىڭ سوڭعى كۇندەرىندەگى پاراقتان «دامىعان ەلدەردىڭ تۇرعىندارى ءار نارسەنىڭ قادىرىن بىلەدى. ۇنەمشىلدىك ولاردىڭ ءومىر سالتىنا اينالعان» دەگەن جولداردى وقۋعا بولادى.
شىعۋ تاريحى گرەك ەلىنە بارىپ تىرەلەتىن كۇنتىزبەنىڭ باستاپقى مىندەتى, اتقاراتىن قىزمەتى — تاۋلىكتىڭ ءار كۇنىن ەستە ۇستاۋ, ءتيىمدى پايدالانۋ بولسا, بۇگىنگى سان الۋان, تۇرلىشە كەسكىندەگى شىعىپ جاتقان كۇنپاراقتار دا نەگىزىنەن وسى ماقساتتى كوزدەيدى.
اقتوبەدە جارىققا شىققان كۇنتىزبە اۋدارمالى, جۇمىس ۇستەلى ۇستىندە پايدالانۋعا ارنالعان. بيىلعى جىلدىڭ 22 ناۋرىزىنان كەلەسى جىلدىڭ ناۋرىزىنا جالعاساتىن 365 كۇندى قامتيتىن كۇنپاراققا ەل پرەزيدەنتىنىڭ وسىنشاما قاناتتى ءسوزى بەرىلگەن.
بۇل كۇنپاراق قاي-قايسىمىزعا دا, بىلايىنشا ايتقاندا, جالپى جۇرتشىلىققا, سونداي-اق ەلمەن ەتەنە قىزمەت اتقارىپ وتىرعان مەملەكەتتىك قىزمەتشىلەرگە دە پايدالى ءارى ىڭعايلى. جالپى, قوعامىمىزدىڭ ءار مۇشەسىنە كومەگى تيەتىن جاقسى كورنەكى قۇرال دەسەك, ارتىق ەمەس.
كۇنتىزبەنى وبلىس اكىمى اسحات شاحاروۆتىڭ يدەياسىمەن, تىكەلەي ۇيىمداستىرۋىمەن قۇرىلعان شىعارماشىلىق توپ جۇزەگە اسىردى.
امانقوس ورىنعالي ۇلى,
قازاقستاننىڭ قۇرمەتتى ءجۋرناليسى
اقتوبە