مەملەكەت باسشىسىنىڭ باستاماسىمەن قولعا الىنعان «جۇمىسشى ماماندىقتارى جىلى» اياسىندا ۇكىمەت تەحنيكالىق مامانداردى قولداۋ شارالارىن مەملەكەتتىك دەڭگەيدە جۇرگىزە باستادى.
پرەمەر-مينيستر ولجاس بەكتەنوۆتىڭ تاپسىرماسىمەن «وتباسى بانك» «ناۋرىز» باعدارلاماسىنىڭ جاڭا باعىتى – «ناۋرىز جۇمىسكەردىڭ» ىسكە قوسىلعانىن جاريالاپ, جۇمىسشى مامانداردى باسپانامەن قامتۋ ماسەلەسىن تياناقتى تۇردە قولعا الماق. باعدارلاما ونەركاسىپ, ەنەرگەتيكا, كولىك, اۋىل شارۋاشىلىعى, قۇرىلىس جانە سۋ رەسۋرستارى سالاسى قىزمەتكەرلەرىن قامتيدى. بيىل «ناۋرىز جۇمىسكەر» اياسىندا جۇمىسشى ماماندارعا 72 ملرد تەڭگە كولەمىندە 2 440 نەسيە بەرۋ جوسپارلانىپ وتىر.
مەملەكەتتىك دەڭگەيدەگى باستامانىڭ تاعدىرى ىشكى نارىقتان قولداۋ تاپقاندا عانا باياندى بولماق. العاشقىلاردىڭ ءبىرى بولىپ قىتايلىق ءىرى تەمىرجول حولدينگى «GK Railways»-پەن بىرلەسىپ قۇرىلعان بەنت كومپانيالار توبى جاڭا باعدارلاما اياسىندا قىزمەتكەرلەرىن تۇرعىن ۇيمەن قامتۋعا كىرىستى. كومپانيا جوعارى جىلدامدىقتى جۇردەك پويىزداردىڭ تەمىرجولى ءۇشىن جاسالاتىن جول قۇرىلىمىنىڭ ماتەريالدارىن دايىنداۋمەن جانە جەتكىزۋمەن اينالىسادى. ولار ونىمدەرىن الەمنىڭ 15-تەن استام ەلىنە, ونىڭ ىشىندە اقش, يسپانيا, يتاليا, انگليا, وڭتۇستىك امەريكا جانە قازاقستانعا ەكسپورتتايدى.
بەنت پەن «وتباسى بانك» مەمورۋندۋمعا قول قويدى. تاراپتاردىڭ كەلىسىمى شەڭبەرىندە بەنت 8 جۇمىسشىسىنا 24 ملن تەڭگەنىڭ سەرتيفيكاتىن «ناۋرىز جۇمىسكەر» جاڭا باعدارلاماسى بويىنشا قايتارىمسىز العاشقى جارنا رەتىندە ۇسىندى. قارجىنىڭ قالعان بولىگىن «وتباسى بانك» الەۋمەتتىك وسال توپتار ءۇشىن جىلدىق 7% (جتسم 7,1%-دان 9,6%-عا دەيىن) جانە بارلىق باسقا ساناتتار ءۇشىن جىلدىق 9%-بەن (جتسم 9,4%-دان 13%-عا دەيىن) قارجىلاندىرادى. «وتباسى بانك» اق باسقارما توراعاسىنىڭ ورىنباسارى نۇرلان اقشانوۆ بەنت-ءتىڭ مەملەكەتتىك باعدارلامانى ءىس جۇزىندە قولداپ وتىرعان ەڭ العاشقى كومپانيا ەكەنىن ايتتى.
ء«بىز 17 ناۋرىزدان باستاپ وسى باعدارلامانى ىسكە قوسامىز. باعدارلاما ءتۇرلى دەڭگەيدەگى جۇمىسكەرلەرگە ارنالعان. شارتى وتە جەڭىل. باستاپقى جارنا – 10%, نەسيە مولشەرلەمەسى دە تومەن», دەيدى نۇرلان اقشانوۆ.
ونىڭ ايتۋىنشا, نەسيە مەرزىمى – 19 جىل. سەگىز جىلدان كەيىن پايىزدىق مولشەرلەمە 3,5%-دان (جتسم 3,6%-دان 4,4%-عا دەيىن) باستاپ 5%-عا (جتسم 5,1%-دان 6,9%-عا دەيىن) دەيىن تومەندەيدى. باعدارلاماعا قاتىسۋ ءۇشىن بانككە كەلىپ, قۇجاتتاردى تولتىرسا بولدى. الماتى, استانا, شىمكەنت قالالارى ءۇشىن نەسيەنىڭ ماكسيمالدى مولشەرى – 36 ملن تەڭگە, باسقا قالالاردا – 30 ملن تەڭگە.
«مونو قالالار نەمەسە قالانىڭ شەت ايماعى ءۇشىن ەكىنشى نارىقتاعى ۇيلەردى ساتىپ الۋعا مۇمكىندىك قاراستىرىلعان. بيىلعا بولىنگەن 72 ملرد تەڭگە 500-دەن اسا ءوتىنىش يەسىن قاناعاتتاندىرادى», دەيدى نۇرلان اقشانوۆ.
بەنت پرەزيدەنتى, ىلە اۋداندىق ءماسليحاتىنىڭ دەپۋتاتى دىنمۇحامەد كۋزيەۆ جەڭىلدىكتى نەسيەمەن ءۇي ساتىپ الۋعا مۇمكىندىك بەرەتىن سەرتيفيكاتقا يە بولعان 8 جۇمىسشىنى تاڭداۋ قاتاڭ ىرىكتەۋ ارقىلى وتكەنىن ايتىپ بەردى.
«قازاقستاندا العاش رەت مەملەكەتتىك باعدارلاماعا قولداۋ ءبىلدىرۋ – ءبىز ءۇشىن ماقتانىش. العاشقى كەزەڭدە 8 جۇمىسشى قاتىسادى. جىلدىڭ ەكىنشى جارتىسىندا باعدارلاما اياسىن ءارتاراپتاندىرۋدى جوسپارلاپ وتىرمىز. مۇنداي باستاما جۇمىسشىلاردى قولداپ قانا قويمايدى, جاستار اراسىندا جۇمىسشى مارتەبەسىن دە كوتەرەدى. جۇمىسشى, تەحنيكالىق باعىتتاعى ماماندارعا وڭ كوزقاراس ءوندىرىستى دامىتادى, ەكونوميكانى ءارتاراپتاندىرادى. مەن زاۋىت باسشىسى رەتىندە ەلىمىزدەگى بارلىق كاسىپورىنداردى «وتباسى بانكپەن» بىرگە ءبىزدىڭ باستامامىزدى قولداۋعا شاقىرامىن», دەيدى دىنمۇحامەد كۋزيەۆ.
ءبىز ءىس-شارا باسىندا «جۇلدىزدى سەگىزدىكتەن» ورىن العانداردىڭ العاشقىسىمەن تانىسىپ, اڭگىمەلەستىك. «بەنت» جشس-نىڭ تەحنيكالىق مامانى ارمان جاقىپبەكوۆتىڭ وسىندا جۇمىس ىستەگەنىنە بيىل 20 جىل.
«بۇل مەن ءۇشىن جۇلدىزدى ءسات بولدى. مەملەكەت باسشىسى 2025 جىلدى «جۇمىسشى ماماندىقتارى جىلى» دەپ جاريالادى. «وتباسى بانكتىڭ» وسى باعىتتاعى باعدارلاماسىنا بولىنگەن سەرتيفيكات ماعان بۇيىرىپتى. بۇل ءۇشىن بانك باسشىلارىنا, «بەنت» جشس باسشىلارىنا العىس ايتامىن», دەيدى ول.
5 بالانىڭ اكەسى ارمان جاقىپبەكوۆتىڭ سوزىنشە, ۇيدەگى كىشكەنتايلارىنىڭ قۋانىشىندا شەك جوق. ولار ەڭ ءبىرىنشى الماتى ءتارىزدى اسەم قالادان وزدەرىنە ءۇي بۇيىرعانىنا شىن قۋانىشتى. سەبەبى وسىعان دەيىن وتباسى ءبىراز ۋاقىت بويى 5 بالامەن جالدامالى پاتەردە تۇرعان. بۇگىندە ارمان پاتەرىنە كەرەك-جاراعىن تۇگەلدەۋگە كىرىسىپ كەتىپتى.
ەكىنشى كەيىپكەرىمىز تيمۋر سانۋروۆ زاۋىتقا جوعارى وقۋ ورنىن بىتىرە سالىپ, بىردەن كەلگەن ەكەن. از عانا جىل ىشىندە ءوز سالاسىنىڭ قىر-سىرىن زەردەلەپ ۇلگەرىپتى.
«قازىر مەنىڭ قۇرداستارىمنىڭ ءبىرى – بازاردا, ەكىنشىسى – كۋرەر بولىپ ءجۇر. ءسوز رەتى كەلىپ تۇرعاندا زاۋىت, كاسىپورىندارعا بارىپ, تەحنيكالىق ماماندىقتىڭ قىر-سىرىن مەڭگەرىڭدەر دەگىم كەلەدى. بۇل رەتتە ەڭ باستىسى ءتوزىم كەرەك. تازا ەڭبەگىمنىڭ ارقاسىندا ەلەنىپ, جۇمىس بەرۋشىلەر تاراپىنان قولداۋ تاپتىم. بۇل مەن سياقتى جاس ماماندار ءۇشىن ۇلكەن مۇمكىندىك», دەيدى ول.
«ناۋرىز جۇمىسكەر» باعىتىنا وتىنىشتەردى قابىلداۋ 17 ناۋرىزدان باستالدى. باعدارلاما اياسىندا 2 440-قا جۋىق جۇمىسشى كاسىپتەرىنىڭ وكىلدەرىن قولجەتىمدى زاەمدارمەن قامتاماسىز ەتۋ جوسپارلانىپ وتىر.