قوعام ۇلتتىق قۇرىلتايدىڭ ناتيجەلەرىنەن زور ءۇمىت كۇتەدى. سەبەبى بۇعان دەيىن ءۇش مارتە وتكەن قۇرىلتايدىڭ ءبارى بۇل مىنبەردىڭ شىن مانىندە مەملەكەت پەن قوعام اراسىنداعى التىن كوپىرگە اينالىپ, ءتيىمدى دانەكەر بولعانىن دالەلدەدى.
بۇعان دەيىنگى قۇرىلتايلاردا كوتەرىلگەن ماسەلەلەر مەن باستامالارعا قاتىستى ءتيىستى شەشىمدەر, زاڭدار قابىلدانىپ, ءتۇرلى تىڭ جوبالاردىڭ دۇنيەگە كەلگەنىن كوزبەن كوردىك. سوندىقتان دا بۇقارا مەملەكەتتىك دەڭگەيدەگى بۇل جيىنعا ۇلكەن ءۇمىت ارتىپ, قانداي ەلدىك ماسەلەلەر تالقىعا تۇسەرىن ءجىتى قاداعالاپ وتىر.
ماسەلەن, ءبىزدىڭ حالىقارالىق «قازاق ءتىلى» قوعامىنىڭ مۇشەلەرى وتكەن اپتادا ارنايى جيىن وتكىزىپ, قۇرىلتاي مۇشەسى رەتىندە بىزگە بىرنەشە باستامانى اماناتتاپ, وزدەرىنىڭ ۇسىنىس-پىكىرلەرىن قۇرىلتاي مىنبەرىنەن جەتكىزۋدى سۇرادى. بىرىنشىدەن, مۇنىڭ بارلىعى – قۇرىلتايعا دەگەن ۇلكەن سەنىمنىڭ ناتيجەسى. ەكىنشىدەن, قۇرىلتاي ءوزىنىڭ مىندەتىن وتە ءتيىمدى اتقارىپ جاتقانىنىڭ ايعاعى. سول سەبەپتى بۋرابايدىڭ تورىندە وتكەن بۇگىنگى قۇرىلتاي دا ءبىلىم, عىلىم, مادەنيەت, الەۋمەت سالالارىنىڭ دامۋىنا, اۋىلدىڭ كوركەيۋىنە, ءتۇرلى باعىتتاعى ماقسات-مىندەتتەرىمىزدىڭ دەر ۋاعىندا ىسكە اسۋىنا ءوز سەپتىگىن تيگىزەرى ءسوزسىز.
قۇرىلتاي مۇشەلەرى ەل-جۇرتتى الاڭداتقان باستى پروبلەمالاردى كوتەرىپ, حالىقتىڭ كوكەيىندەگى ۇسىنىستاردى كۇن تارتىبىنە ەنگىزۋى كەرەك. ماسەلەن, «قازاق ءتىلى» قوعامى وكىلدەرى قازاق ءتىلىن عىلىم تىلىنە اينالدىرۋ ۇسىنىسىن جەتكىزۋدى سۇرادى. مەملەكەتتىك ءتىل عىلىم تىلىنە اينالماي, ونىڭ قولدانىس اياسى كەڭىمەيدى. ءتىلدىڭ بولاشاعىن ويلايتىن بولساق, عىلىمي جۇمىستار مەملەكەتتىك تىلدە قورعالۋى كەرەك. قازىر تەحنيكالىق عىلىمدار سالاسىندا مەملەكەتتىك تىلدەگى وقۋلىقتاردىڭ جەتىسپەۋشىلىگىن كورىپ وتىرمىز. دەمەك ناقتى قادامدار جاساپ, عىلىمي ەڭبەكتەردىڭ قازاق تىلىندە جازىلىپ, قورعالۋىنا باستاماشى بولۋعا ءتيىسپىز.
جوعارى وقۋ ورىندارىندا ءبىلىم الىپ جاتقان بولاشاق ماماندارعا ارنالعان قاجەتتى وقۋلىقتاردى, وقۋ-ادىستەمەلىك قۇرالداردى مەملەكەتتىك تىلدە شىعارۋ ۇسىنىسى ۇلتتىق قۇرىلتاي تاراپىنان قولداۋ تابارىنا سەنگىم كەلەدى.
راۋان كەنجەحان ۇلى,
«قازاق ءتىلى» قوعامىنىڭ پرەزيدەنتى