ەلوردادا «قازاقستان حالقى اسسامبلەياسى: بىرلىك پەن دامۋدىڭ ءۇش ونجىلدىعى» اتتى حالىقارالىق دوڭگەلەك ۇستەل ءوتتى. باسقوسۋ اسسامبلەيانىڭ 30 جىلدىعىنا وراي ۇيىمداستىرىلدى. جيىندا مادەنيەتارالىق ديالوگتى نىعايتۋ جولىنداعى بىرەگەي ينستيتۋتتىڭ ءرولى, ەتنوسارالىق قارىم-قاتىناس ماسەلەسى ءسوز بولدى.
ءىس-شاراعا حالىقارالىق ۇيىمداردىڭ وكىلدەرى, ەلدەگى ەتنومادەني جانە جاستار بىرلەستىكتەرىنىڭ باسشىلارى مەن مۇشەلەرى, مەملەكەت, قوعام قايراتكەرلەرى, بارلىعى 60-قا جۋىق ادام قاتىستى. دوڭگەلەك ۇستەلدە قازاقستان حالقى اسسامبلەياسى توراعاسىنىڭ ورىنباسارى – قحا حاتشىلىعىنىڭ مەڭگەرۋشىسى مارات ءازىلحانوۆ وسىناۋ بالاماسىز ۇيىمنىڭ ەلدىڭ ەتنوستىق جانە مادەني توپتارى اراسىندا بەيبىتشىلىك پەن ءوزارا تۇسىنىستىكتى ساقتاۋدا, الەۋمەتتىك-ساياسي تۇراقتىلىقتى ىلگەرىلەتۋدەگى وزىندىك ۇلەسىنە توقتالدى.
– ەلىمىز – ميلليونداعان ازاماتتىڭ تاعدىرىن ءبىر ارناعا توعىستىرعان قۇتتى مەكەن. تاۋەلسىزدىك جىلدارىنىڭ العاشقى كەزەڭىندە قۇرىلعان اسسامبلەيا وسى ءۇش ونجىلدىقتا مەملەكەتتىڭ دامۋى مەن تۇراقتىلىعىنا ۇلكەن ۇلەس قوستى. ماڭىزدى ميسسيانى قابىلداپ, اشىق ديالوگ, بىرلىك, تەڭدىك قاعيداتىنىڭ ورىندالۋىنا ارەكەتتەندى. جانە بۇل تاجىريبە جاھان جۇرتىنا ۇلگى بولدى, – دەدى م.ءازىلحانوۆ.
بۇگىندە اسسامبلەيا قۇرامىندا رەسپۋبليكالىق جانە وڭىرلىك ەتنومادەني بىرلەستىكتەردىڭ باسشىلارى مەن بەلسەندىلەرى, بەلگىلى قوعام قايراتكەرلەرى, ساياساتكەرلەر, پارلامەنت پەن وڭىرلىك ءماسليحاتتاردىڭ دەپۋتاتتارى, بيزنەسمەندەر, جۋرناليستەر, شىعارماشىلىق جانە عىلىمي زيالى قاۋىم وكىلدەرى, اقساقالدار, جاستار قاتارىنان 2 مىڭعا تارتا ادام بار.
– اسسامبلەيانىڭ 30 جىلدىق جولى – بۇل ۇيىمنىڭ تاريحى عانا ەمەس, ەلىمىزدىڭ مەملەكەتتىك باعىتىنىڭ ماڭىزدى قۇرامداس بولىگى. بۇل جولدىڭ نەگىزىندە تاۋەلسىزدىكتىڭ العاشقى جىلدارىندا قالىپتاسقان ۇلتتىق بىرلىك, ءوزارا قۇرمەت جانە جاسامپاز ديالوگ يدەياسى جاتىر. وتانداستارىمىز «الۋان تۇرلىلىكتەگى بىرلىك» قاعيداتىن بەرىك ۇستانادى. بۇل ورايدا قازاقستان حالقى اسسامبلەياسىنىڭ مەرەيتويى تەك قورىتىندى شىعارۋ ءۇشىن عانا ەمەس, سونداي-اق ورىن الىپ وتىرعان پروبلەمالاردى, ولاردى شەشۋ جولدارىن جانە ەتنوسارالىق قاتىناستار سالاسىن ودان ءارى دامىتۋ كەلەشەگىن كەڭىنەن جانە اشىق تالقىلاۋ ءۇشىن دە ماڭىزدى, – دەدى ءپىب پرەزيدەنتتىك ورتالىعىنىڭ ديرەكتورى باقىتجان تەمىربولات.
اسسامبلەيانىڭ مەرەيىن اسىرىپ وتىرعان تۇشىمدى جوبالارى كوپ-اق. مادەنيەت جانە اقپارات مينيسترلىگى ەتنوسارالىق قاتىناستاردى دامىتۋ كوميتەتىنىڭ «قوعامدىق كەلىسىم» رمم ديرەكتورىنىڭ ورىنباسارى رۋفينا ۋسانوۆا بىرەگەي ۇيىم تەك ەتنوستاردىڭ مادەنيەتىن دامىتاتىن ينستيتۋت ەمەس ەكەنىن ايتتى.
– نەگىزى اسسامبلەيادا ءتۇرلى جوبالار بار. ونىڭ ىشىندە قايىرىمدىلىققا, مەملەكەتتىك ءتىلدىڭ قولدانۋ اياسىن كەڭەيتۋ باعىتىندا, قوعامداعى وتكىر ماسەلەلەردىڭ ءتۇيىنىن تارقاتۋعا سەپتەسىن باستامالارى بار. سوندىقتان قحا – جالپى وتاندىق بىرلىك مودەلىن ناسيحاتتايتىن ينستيتۋت, – دەدى ول.