وسكەمەندە حالىقارالىق ايەلدەر كۇنى قارساڭىندا «عاسىرلىق داستۇرلەر» اتتى كىلەم توقۋشى شەبەرلەردىڭ اراسىندا رەسپۋبليكالىق بايقاۋ باستالىپ جاتىر. كىلەم توقۋ – قازاق حالقىنىڭ ەڭ كونە قولونەرىنىڭ ءبىرى. وسىناۋ اتا ءداستۇردى جاڭعىرتۋ ماقساتىنداعى شاراعا ەلىمىزدىڭ كىل مىقتى قولونەر شەبەرلەرى جينالادى.
بۇل ءىس-شارانى وتكىزۋ جولىندا وبلىستىڭ بۇرىنعى اكىمى, بۇگىندە پرەمەر-ءمينيستردىڭ ورىنباسارى ەرمەك كوشەرباەۆ ۇلكەن ءرول اتقاردى دەيدى ۇيىمداستىرۋشىلار. ايتا كەتسەك, شىعىس قازاقستان ساۋلەت-ەتنوگرافيالىق جانە تابيعي-لاندشافتتىق مۋزەي-قورىعىندا 352 بىرەگەي كىلەم بۇيىمدارى ساقتالعان. بۇل جادىگەرلەر مۋزەي زەرتتەۋشىلەرى ۇيىمداستىرعان كوپجىلدىق ەتنوگرافيالىق ەكسپەديتسيالار كەزىندە جينالعان. كىلەم توقۋ ءداستۇرى اسىرەسە, كاتونقاراعاي, تارباعاتاي جانە ۇلان اۋداندارىندا دامىعان.
– فەستيۆال حالىقتىق كىلەم توقۋ داستۇرلەرىن ناسيحاتتاۋ جانە ساندىك-قولدانبالى ونەر شەبەرلەرىن قولداۋ ماقساتىندا وتكىزىلەدى. شىعارماشىلىق يدەيالاردى تالقىلاۋ جانە تاجىريبە الماسۋ ءۇشىن ارت-الاڭ قۇرىلادى. بىلايشا ايتقاندا, ۇلتتىق ونەرىمىزدى زامانعا ساي ىڭعايلاپ, ساۋداعا شىعارۋدى دا كوزدەپ وتىرمىز. ونىڭ تۇپكى ماقساتى شىعىستاعى تۋريزم الەۋەتىن نىعايتۋ, – دەيدى شىعىس قازاقستان قولونەرشىلەر رەسۋرستىق ورتالىعىنىڭ جەتەكشىسى رايسا مۇحامەدجانوۆا.
سالتىمىزدى كورسەتەتىن بۇل بايقاۋدا كورەرمەندەردىڭ نازارىنا عاجايىپ كىلەمدەر, كيىزدەن جاسالعان بۇيىمدار, گوبەلەندەر جانە ساندىك-قولدانبالى ونەردىڭ باسقا دا ۇلگىلەرى ۇسىنىلادى. سونىمەن قاتار قولونەرشىلەر ءوز بۇيىمدارىن, جابدىقتارى مەن ماتەريالدارىن كورسەتىپ, وقىتۋ شەبەرلىك دارىستەرىن وتكىزەدى. «عاسىرلىق داستۇرلەر» فەستيۆالى – جاي عانا فەستيۆال ەمەس, بولاشاق ۇرپاققا باعا جەتپەس مادەني مۇرانى اماناتتاۋ مۇمكىندىگى.
شىعىس قازاقستان وبلىسى