قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ راباتقا ەكىجاقتى قارىم-قاتىناستار تاريحىنداعى العاشقى رەسمي ساپارمەن باردى. ءىسساپار ماروككو كورولدىگىنىڭ سىرتقى ىستەر, افريكا ىنتىماقتاستىعى جانە شەتەلدە تۇراتىن ماروككولىقتار ىستەرى ءمينيسترى ناسەر بۋريتانىڭ شاقىرۋىمەن ۇيىمداستىرىلدى.
كەزدەسۋدە ساياسي ديالوگتى جانداندىرۋ, ساۋدا-ەكونوميكالىق جانە ينۆەستيتسيالىق بايلانىستاردى نىعايتۋ, مادەني-گۋمانيتارلىق سالاداعى ەكىجاقتى ءىس-قيمىلدى دامىتۋ پەرسپەكتيۆالارى تالقىلاندى. اڭگىمەلەسۋ بارىسىندا ەنەرگەتيكا, كولىك, اۋىل شارۋاشىلىعى, تسيفرلىق تەحنولوگيالار, يننوۆاتسيالار, ءبىلىم بەرۋ جانە تۋريزم سياقتى سالالاردا سەرىكتەستىكتى تەرەڭدەتۋ ماسەلەلەرى دە ايتىلدى. وسىعان وراي تاراپتار شارتتىق-قۇقىقتىق بازانى ودان ءارى جەتىلدىرۋگە جانە ءارتۇرلى دەڭگەيدەگى ساپارلارمەن الماسۋ تاجىريبەسىن جالعاستىرۋعا ءوزارا دايىندىعىن ءبىلدىردى.
«قازاقستان ماروككونى تاياۋ شىعىس پەن سولتۇستىك افريكا وڭىرىندە ماڭىزدى جانە جاقىن سەرىكتەس رەتىندە تانيدى. 30 جىلدان اسا ديپلوماتيالىق قارىم-قاتىناستار بارىسىندا ءبىز ورتاق قۇندىلىقتارعا نەگىزدەلگەن مازمۇندى ساياسي ديالوگ قۇرا الدىق جانە سىندارلى پارلامەنتارالىق ءوزارا ءىس-قيمىلدى جولعا قويدىق», دەدى مۇرات نۇرتىلەۋ.
ءوز كەزەگىندە ناسەر بۋريتا قازاقستاننىڭ ورتالىق ازيا وڭىرىندەگى كوشباسشىلىق ءرولىن ەرەكشە اتاپ ءوتىپ, ءوزارا ءىس-قيمىلدى ساپالى نىعايتۋعا مۇددەلى ەكەنىن جەتكىزدى. ءارى ول ەكى ەلدى سولتۇستىك افريكا مەن ورتالىق ازياعا قاقپا رەتىندە قاراستىراتىنىن ايتتى.
بىلتىر ەكى ەل اراسىنداعى تاۋار اينالىمى 70%-عا ءوسىپ, 274 ملن دوللارعا جەتكەن. وسىنى ەسكەرگەن قر ءسىم باسشىسى ەلىمىز دايىن مۇناي-حيميا جانە مەتاللۋرگيا ونىمدەرىن, ازىق-ت ۇلىك تاۋارلارىن قوسا العاندا, 130 ملن دوللار سوماسىنا 25 نەگىزگى تاۋار پوزيتسياسى بويىنشا ەكسپورتتى كەڭەيتۋگە نيەتىن ءبىلدىردى. وعان قوسا م.نۇرتىلەۋ ماروككوعا ازىق-ت ۇلىك قاۋىپسىزدىگى جونىندەگى يسلام ۇيىمىنىڭ (اقيۇ) قىزمەتىنە قىزىعۋشىلىق تانىتقانى ءۇشىن ريزاشىلىعىن ءبىلدىرىپ, ونىڭ جارعىسىن جاقىن ارادا راتيفيكاتسيالاۋدىڭ ماڭىزدىلىعىن تىلگە تيەك ەتتى. جيىن بارىسىندا بيىل استانادا وتەتىن اقيۇ-نىڭ جەتىنشى باس اسسامبلەياسىنا قاتىسۋعا شاقىردى.
سونداي-اق تاراپتار مامىر ايىندا وتەتىن استانا حالىقارالىق فورۋمىن جانە بيىلعا جوسپارلانعان الەمدىك جانە ءداستۇرلى دىندەر ليدەرلەرىنىڭ 8-سەزى توڭىرەگىندە اڭگىمە ءوربىتتى. تالقىلاۋدا تسيفرلاندىرۋ تاقىرىبى دا نازاردان تىس قالمادى. قازاقستان تاراپى تسيفرلىق ەكونوميكانى دامىتۋعا باعىتتالعان «Digital Morocco 2030» باعدارلاماسى شەڭبەرىندە ماروككومەن ىنتىماقتاستىققا مۇددەلىلىگىن ءبىلدىردى جانە قازاقستاندىق IT-كومپانيالاردىڭ ەلەكتروندىق ۇكىمەت, يننوۆاتسيالىق IT-شەشىمدەر جانە كيبەرقاۋىپسىزدىك سالاسىنداعى قاناتقاقتى جوبالاردى ۇسىنۋعا دايىندىعى تۋرالى حاباردار ەتتى.
مينيسترلەر ماروككو جۇرتشىلىعىنىڭ ۇلكەن قىزىعۋشىلىعىن تۋدىرعان استانا اكادەميالىق فيلارمونياسى مەن راباتتىڭ باس وركەسترى كونتسەرتىنىڭ ءساتتى وتۋىنە, مادەني-گۋمانيتارلىق بايلانىستاردى نىعايتۋدىڭ ماڭىزدىلىعىنا باسا ءمان بەردى.
ايتا كەتەرلىگى, جاقىن ارادا ەكىجاقتى ۆيزاسىز رەجىم تۋرالى كەلىسىم كۇشىنە ەنەدى. بۇل ىسكەرلىك بايلانىستاردى دامىتۋ جانە ازاماتتار اراسىنداعى بايلانىستاردى كەڭەيتۋ ءۇشىن جاسالعان. ەرەكشەلىگى سول, ماروككو – وسى تيپتەگى بايلانىس ورناتقان افريكاداعى العاشقى ەلىمىز. سوندىقتان كەزدەسۋدە تاراپتار بيىل اۋە قاتىناسى تۋرالى كەلىسىم بويىنشا جۇمىستى اياقتاۋعا جانە تىكەلەي اۋە رەيستەرىن ىسكە قوسۋ مۇمكىندىگىن قاراستىرۋعا كەلىستى.
كەلىسسوزدەر قورىتىندىسىندا ەكى ەل ساياسي, ەكونوميكالىق جانە گۋمانيتارلىق سالالارداعى قازاقستان-ماروككو قارىم-قاتىناسىن ودان ءارى نىعايتۋعا دەگەن ءوزارا ۇمتىلىسىن كورسەتتى.
ساپار اياسىندا قازاق دەلەگاتسياسى سۇلتان مەن تۇڭعىش كورول V مۇحاممەد (1909–1961) كەسەنەسىنە باردى. راباتتىڭ ورتالىعىندا مونارح پەن ونىڭ ەكى ۇلىنىڭ قابىرى بار كەرەمەت عيمارات ايگىلى حاسان مۇناراسىنىڭ جانىندا ورنالاسقان. قر ءسىم باسشىسى گۇل شوقتارىن قويىپ, قۇرمەتتى قوناقتار كىتابىنا جازبا قالدىردى.
بۇعان قوسا م.نۇرتىلەۋ ەكونوميكانىڭ ءتۇرلى سەكتورلارىندا جۇمىس ىستەيتىن جەتەكشى ماروككولىق كومپانيالار وكىلدەرىمەن بىرقاتار كەزدەسۋ وتكىزدى. اتاپ ايتساق, «Zine Capital Invest» حولدينگىنىڭ پرەزيدەنتى نۋرەددين زينمەن جۇزدەسۋ بارىسىندا اۋىل شارۋاشىلىعى, ازىق-ت ۇلىك ءوندىرىسى جانە لوگيستيكا سالاسىنداعى ىنتىماقتاستىق مۇمكىندىكتەرى تالقىلاندى. ال «Alomra Group International» باس ديرەكتورى دريسس بەنومارمەن سۇحبات قاۋىپسىزدىك سالاسىندا يننوۆاتسيالىق شەشىمدەردى ەنگىزۋ پەرسپەكتيۆالارىنا باعىتتالدى.
«Cadex Group» كومپانياسىنىڭ پرەزيدەنتى دجاۆاد يۋسسەفيمەن كەزدەسۋ بارىسىندا تاۋ-كەن مەتاللۋرگيا كاسىپورىندارىنا تەحنيكالىق قىزمەت كورسەتۋ سالاسىنداعى ىنتىماقتاستىق ماسەلەلەرى قارالدى. «Anfa Realities» كومپانياسىنىڭ نەگىزىن قالاۋشى يۋنەس ەسساسيمەن جۇزدەسۋدە قۇرىلىس سالاسىنداعى بىرلەسكەن جوبالار ءسوز بولدى. تالقىلاۋلار بارىسىندا قازاقستان ۇكىمەتى ماروككومەن ەكونوميكالىق جانە ينۆەستيتسيالىق بايلانىستاردى نىعايتۋعا ىقپال ەتەتىن باستامالار مەن جوبالاردى تابىستى ىسكە اسىرۋ ءۇشىن جان-جاقتى قولداۋ كورسەتەتىنىن جەتكىزدى.