كوكشەتاۋداعى پوليمەرلىك قاپتاما وندىرۋمەن اينالىساتىن «نوۆوپەك كاسىپورنى 1 200-دەن اسا ادامدى تۇراقتى جۇمىسپەن قامتىپ وتىر. وندىرىستە باستاپقى پوليمەرلىك شيكىزات جانە ساپالى شەتەلدىك قوسپالار پايدالانىلادى. تولىق تسيكلدى ءوندىرىس وشاعى رەتىندە كەز كەلگەن سۋسىمالى جۇككە ارنالعان قاپتاردىڭ بىرنەشە ءتۇرىن وندىرەدى.
ءدال قازىر جۇمىس قايناپ جاتىر. اۋماعى اتشاپتىرىم ءوندىرىس تسەحتارىندا ۇزىن-ىرعاسى 500-دەن اسا زاماناۋي قۇرال-جابدىق ورنالاستىرىلعان. تسەح باسشىلارىنىڭ ايتۋىنا قاراعاندا, دايىن ءونىم كولەمى دە كۇننەن-كۇنگە كوبەيە تۇسۋدە. ايىنا 1 500 توننا ءونىم شىعارادى. وندىرىلگەن ساپالى ونىمگە سۇرانىس تا مول. ازىرگە ءونىم وتكىزۋدەن كەدەرگى بولعان ەمەس.
تۇتىنۋشىلار سانى 700-گە جۋىق. كادىمگى قاپتىڭ الدەنەشە ءتۇرىن وندىرەتىن كومپانيا قۇرامىندا «اسىل ارنا», «كوكشە سيتي», «كوكشە ۋپاكوۆكا», «ازيا پوليمەر», «نيترو پروداكت» ءتارىزدى 6 جاۋاپكەرشىلىگى شەكتەۋلى سەرىكتەستىك بار. ءبىر عاجابى كاسىپورىن جۇمىسشىلارىنىڭ 65 پايىزى قىز-كەلىنشەكتەر.
مىنە, الدىمىزدا توقىما تسەحى. كۇندەلىكتى شارۋاسىنان باس كوتەرە الماي جاتقان جۇمىسشىلاردىڭ بەيۋاقىتتا كەلگەن بوگدە ادامدارعا بۇرىلىپ قاراۋعا مۇرشاسى جوق. بىرەۋىمەن ءجون سۇراستىق. توقىماشى-نۇسقاۋشى ريزاگۇل يسماعۇلوۆا وسىدان 22 جىل بۇرىن فابريكا ىسكە قوسىلعاندا جۇمىسقا ورنالاسقان العاشقى مامانداردىڭ ءبىرى ەكەن.
ء«بىزدىڭ وڭىردە پوليمەرلىك قاپتاما وندىرەتىن ءوندىرىس ورنىندا جۇمىس ىستەيتىن توقىماشىلار مەن تىگىنشىلەردى دايارلايتىن وقۋ ورىندارى جوق. ءبىر قيىندىق وسى تاراپتا. تىعىرىقتان شىعار جول ىزدەگەن كومپانيا باسشىلارى جۇمىس ىستەۋگە ىنتالى ادامداردى وزدەرى وقىتىپ الادى. وسى جەردە جۇمىس تاجىريبەسىنەن وتكىزەدى. بولاشاق جۇمىسشىلاردى دايارلايتىن ەكى نۇسقاۋشى بار. جۇمىسشىلاردىڭ ىنتاسى جاقسى, ءوز ىستەرىنە جاۋاپكەرشىلىكپەن قارايدى. بارلىعى ءبىر ماقساتتا جۇمىس ىستەگەندىكتەن, ىرىس ءۇيىرىلىپ تۇر. ءبىزدىڭ كومپانيا كادىمگى كىشىگىرىم قاپتاردان باستاپ سىيىمدىلىعى 10-20 توننالىق بيگ-بەگتەرگە دەيىن شىعارادى», دەيدى ول.
فابريكا جاڭا اشىلعان كەزدە جۇمىسشىلار سانى از بولىپتى. العاشقى بەتتە ءتورت اۋىسىممەن جۇمىس ىستەۋگە تۋرا كەلگەن. نەبارى 20 توقىماشى ەڭبەك ەتسە كەرەك. ستانوكتار دا از. كۇن وتكەن سايىن جۇمىس اۋقىمى دا كوبەيگەن. قازىر ەكى تسەحتى قوسقاندا 120-دان استام توقىماشى جۇمىس ىستەيدى, تىگىنشىلەردىڭ سانى جۇزگە جۋىق. ريزاگۇل م ۇلىكقىزىنىڭ ءوزى وتىزعا جۋىق توقىماشىنى ۇيرەتىپ, تاجىريبەسىمەن بولىسكەن.
قاي جەردە بولماسىن, ءىس تەتىگى كادرعا بايلانىستى. كاسىپورىننىڭ العاشقى جۇمىسشىلارى رەسەيدە وقىپ, ۇيرەنگەن. كەيىن وقىپ كەلگەندەر قاپ توقۋ, تىگۋ جۇمىستارىن وزگەلەرگە ۇيرەتكەن. العاشقى بەتتە ءبىر ستانوكپەن 700–800 قاپ تىگىپ شىعارسا, بۇگىندە بۇل كورسەتكىش الدەنەشە ەسە وسكەن.
«قازىر دە ءتورت اۋىسىممەن كەزەكتەسىپ جۇمىس ىستەيمىز. وسى كەستە بويىنشا جۇمىس ىستەيتىندەر ايىنا 200 مىڭ تەڭگەدەن ارتىق ەڭبەكاقى الادى. جۇمىسشىلار ءۇشىن الەۋمەتتىك كومەك ايرىقشا ماڭىزدى. ال بىزدە الەۋمەتتىك پاكەت تولىق قاراستىرىلعان. جازعى ماۋسىمدا دەمالىس ورىندارىنا جولدامامەن جىبەرەدى. 2022 جىلى قوستاناي وبلىسىنداعى «سوسنوۆىي بور» شيپاجايىنا بارىپ دەمالىپ قايتتىم. ارينە, وڭاي جۇمىس بولمايدى عوي. بارىنە ءتوزۋ كەرەك. ايتسە دە كوڭىل اۋداراتىن ءبىر ماسەلە بار, قازىر جاستار جاعى «اۋىردىڭ ۇستىمەن, جەڭىلدىڭ استىمەن» جۇرگىسى كەلەدى. ءبارى بىردەي بولماعانىمەن كوپشىلىگى سولاي. دەمەك «بالانى جاستان» دەمەكشى, ەڭبەككە ەرتە ارالاستىرىپ, تاربيەلەۋ ماڭىزدى», دەيدى.
كەيىپكەرىمىزدىڭ ايتۋىنشا, كاسىپورىندا جۇمىس ىستەيتىندەردىڭ باسىم كوپشىلىگى اعا بۋىن وكىلدەرى. جاستار جاعى جۇمىسقا ورنالاسقانىمەن, ءبىر-ەكى كۇننەن كەيىن اينىپ قالادى ەكەن. توقىماشىلار تاپشىلىعى بار ەكەنى دە راس. سوندىقتان بولار, شالعايدان كەلىپ جۇمىس ىستەپ جاتقاندار دا كەزىگەدى. ماسەلەن, ريزاگۇل م ۇلىكقىزىنىڭ قاراماعىندا ماڭعىستاۋدان توعىز, قاراعاندىدان ەكى ادام كەلىپ جۇمىس ىستەپ جاتىر ەكەن. وزگە وڭىرلەردەن كەلگەندەرگە جاقسى جاعداي جاسالعان. كاسىپورىن جاتاقحاناسىنان ورىن بولىنگەن. اسحانادان تۇسكى استى تەگىن ىشەدى, جول شىعىنى دا كومپانيانىڭ موينىندا.
«نوۆوپەكتە» جىلىجايعا ارنالعان پوليەتيلەندى جامىلعى شىعارىلادى. مۇنداي جامىلعىلاردى جىلىجايدا قولدانۋعا ابدەن بولادى. اۋا رايى قولايسىز سولتۇستىك وڭىردە باقشا ونىمدەرىن وندىرگىسى كەلەتىندەر ءۇشىن تاپتىرمايتىن زات. جامىلعىنىڭ ءبىر ەرەكشەلىگى, جىلىجايداعى جىلۋ ۇزاق ۋاقىتقا ساقتالادى. مۇنداي جامىلعىلاردى جالعىز جىلىجايدا عانا ەمەس, اۋىل شارۋاشىلىعىنىڭ كەز كەلگەن سالاسىندا پايدالانۋعا بولادى. ماسەلەن, مال ازىعى ۇرالارىن قاپتاسا, ىلعال وتكىزبەي, سۋىق كىرگىزبەي, ساقتاۋعا مۇمكىندىك تۋعىزباق. سونداي-اق ازىق-ت ۇلىك قويمالارى ءۇشىن دە اسا قاجەت. ءتىپتى قۇرىلىستا دا پايدالانۋعا بولادى.
زاۋىت اۋقىمى 45 مىڭ شارشى مەتردى الىپ جاتىر. ايىنا 8 ملن دانا دايىن ءونىم شىعارادى. بارلىق جۇمىس وسى جەردە اتقارىلادى. شەتتەن كەلەتىنى ازىن-اۋلاق شيكىزات قانا. ءونىم وڭىردەگى بارلىق ءوندىرىس ورىندارى ءۇشىن قاجەتتى دۇنيە شىعارىپ وتىر. ماسەلەن, ازىق-ت ۇلىك ونىمدەرىنەن باستاپ, قۇرىلىسقا قاجەتتى زاتتاردى قاپتايتىن ءونىم وسى جەردە.
كوكشەتاۋ