قحا جانىنداعى انالار كەڭەسى – قوعامعا پايدالى ۇيىمنىڭ ءبىرى

انالار ۇيىم بولىپ ۇيىستى

2014 جىلى ءبىر-ەكى اي ىشىندە عانا قۇرىلعان كونسۋلتاتيۆتىك-كەڭەسۋ ورگانى سانالاتىن «انالار كەڭەسى» – وبلىستىق, قالالىق, اۋداندىق, اۋىلدىق جەرلەردە بار جانە كاسىپورىندار مەن ەتنومادەني بىرلەستىكتەر جانىنان دا قۇرىلعان. ولاردىڭ بارلىعى بەلسەندى جۇمىس ىستەپ جاتىر.

كەڭەستىڭ قۇرامىندا كوپ بالالى انالار, پاترونات انالار, مەملەكەتتىك قۇرىلىمداردىڭ, ۇكىمەتتىك ەمەس ۇيىمداردىڭ قىزمەتكەرلەرى, پسيحولوگيالىق-مەديتسينالىق مەكەمەلەردىڭ جانە داعدارىس ورتالىقتارىنىڭ ماماندارى, ەتنومادەني بىرلەستىكتەر مەن عىلىمي ءارى شىعارماشىلىق زيالى قاۋىمنىڭ وكىلدەرى, ايەلدەردىڭ قوعامدىق ۇيىمدارىنىڭ بەلسەندىلەرى, مەدياتورلار, جاستار بار.

باستى باعىتتىڭ ءبىرى – تولەرانتتىلىق

قۇرامىندا انالار بولاتىن بارلىق قوعامدىق بىرلەستىكتەردىڭ جۇمىسى ۇقساس ەكەنى بەلگىلى. ەڭ باستىسى – جاس ۇرپاقتى, بولاشاقتا ەلىمىزدىڭ تىزگىنىن ۇستار بۋىندى تاربيەلەۋ ماسەلەسى.

«انالار كەڭەسىنىڭ» باستى ماقساتتارىنىڭ ءبىرى – وتباسىندا تولەرانتتىلىقتى تاربيەلەۋ. كوپەتنوستى مەملەكەتتە ءومىر ءسۇرىپ جاتقانىمىزدى ەسكەرەتىن بولساق, بۇل – ۇلكەن ماڭىزعا يە ماسەلە. بالا بويىنا باسقا ۇلت وكىلدەرىنە دەگەن دوستىق پەيىل مەن مادەنيەتتى قارىم-قاتىناستىڭ نەگىزدەرى قالانا وتىرىپ, تولەرانتتى تۇلعا قالىپتاستاساتىنى ءسوزسىز.

سان-سالالى جۇمىس

اسسامبلەيا جانىنان قۇرىلعان ءتۇرلى دەڭگەيدەگى «انالار كەڭەسى» جۇمىسىنىڭ نەگىزگى باعىتتارى – ەلىمىزدە جۇرگىزىلىپ جاتقان وتباسىلىق-دەموگرافيالىق ساياساتقا قولداۋ كورسەتۋ, وتباسى ينستيتۋتىن ساقتاپ-نىعايتۋعا ىقپال ەتۋ, جاسوسپىرىمدەر اراسىندا قۇقىق بۇزۋشىلىقتىڭ الدىن الۋعا ۇلەس قوسۋ جانە وسكەلەڭ ۇرپاقتى تاربيەلەۋ.

«انالار كەڭەسى» ايەلدەردىڭ قۇقىقتىق ساۋاتتىلىعىن ارتتىرۋعا, اتا-اناسىنىڭ قامقورلىعىنسىز قالعان بالالاردىڭ ماسەلەلەرىن شەشۋگە, ۇلتتىق قۇندىلىقتار مەن داستۇرلەردى جاڭعىرتۋعا اتسالىسىپ كەلەدى.

كەڭەس ءتۇرلى ءىس-شارالار ارقىلى بەرەكەلى وتباسىلاردى ناسيحاتتايدى. ەلىمىزدە جۇرگىزىلىپ جاتقان الەۋمەتتىك-ەكونوميكالىق رەفورمالاردى ءتۇسىندىرۋ بويىنشا جۇمىستارى ءوز الدىنا ءبىر توبە.

قايىرىمدىلىقتان تىس قالماعان

«انالار كەڭەسى» قاشاندا ەلىمىزدەگى جاعدايلارعا بەي-جاي قاراي الماعان. ماسەلەن, بىلتىر كوكتەمگى سۋ تاسقىنىنان زارداپ شەككەن ايماقتارداعى كوپ بالالى وتباسىلارىنا قول ۇشىن سوزىپ,  پاتەر جالداپ, كيىم-كەشەك, ازىق-ت ۇلىكپەن كومەك جاسادى. وعان دەيىن دە مۇنداي شارالاردان قالىس قالماعان. العىس ايتۋ كۇنى جانە «ناۋرىزاما» ونكۇندىگىن مەرەكەلەۋ اياسىندا قايىرىمدىلىق اكتسيا, ت.ب. وتكىزدى. سۋ تاسقىنىمەن كۇرەسكە ەتنومادەني بىرلەستىكتەردىڭ وكىلدەرى قوسىلىپ, ولار قايىرىمدىلىق جانە گۋمانيتارلىق كومەك جيناۋعا جۇمىلدى. جالپى قاي جاعىنان بولسا دا انالار كەڭەسىنىڭ قوعامعا بەرەرى مول!

اتاۋلى كۇندەرگە اتسالىسىپ كەلەدى

«انالار كەڭەسى» قوعامىمىزداعى ءتۇرلى اتاۋلى كۇندەردى نازاردان تىس قالدىرماي, ءىس-شارالار وتكىزىپ كەلەدى. ەسىرتكى زاتتارى, الكوگول تۇتىنۋ, ت.ب. زيانكەستىكتەردەن جاستاردى اۋلاق بولىپ, سالاۋاتتى ءومىر سالتىن ۇستانۋعا شاقىرادى ءارى سپورتتىق شارالاردى دا وتكىزىپ تۇرادى.

انالارمەن وتكىزىلگەن جيىنداردا قازىرگى قوعامداعى وتباسى ماسەلەلەرى قوزعالىپ, كوپ بالالى جانداردىڭ ءال-اۋقاتى, وتباسىنداعى زورلىق-زومبىلىقتىڭ الدىن الۋدىڭ ماڭىزدىلىعى, بالالاردىڭ قاۋىپسىزدىگى جانە ت.ب. تۋرالى ايتىلىپ, پسيحولوگپەن اڭگىمە دە جۇرگىزىلەدى.

ءتۇرلى كەزدەسۋلەردە انالار وزدەرىنىڭ تاجىريبەلەرى مەن كاسىپتەرى جانە بيزنەس پەن قوعامدىق قىزمەتتى ۇشتاستىرۋ تاسىلدەرى, ت.ب. تۋرالى ايتىپ, جاستاردى قيىندىقتاردان ءوتىپ, العا ۇمتىلۋعا شاقىرادى. ءبىر سوزبەن ايتقاندا موتيۆاتسيالىق شارالار  ۇيىمداستىرىپ كەلەدى.

فورۋمدار

2014 جىلى 13-14 قاراشادا «انالار كەڭەسىنىڭ» I رەسپۋبليكالىق فورۋمى, 2015 جىلعى 26 قازاندا II رەسپۋبليكالىق كەڭەس, 2016 جىلعى 28-29 تامىزدا ءىىى كەڭەس  ءوتتى. بۇل العاشقى I, II, III, فورۋمدار ەلوردا تورىندە وتكىزىلدى. ال IV رەسپۋبليكالىق انالار كەڭەسى 2017 جىلعى 6 قازاندا شىمكەنتتە وتسە, V كەڭەيتىلگەن وتىرىس 2018 جىلعى 29-30 قازاندا تالدىقورعاندا ءوتىپ, كەڭەستىڭ VI كەڭەيتىلگەن وتىرىسى 2019 جىلى 29-30 قازاندا قوستاناي قالاسىندا ءوتتى.

ايتا كەتسەك, 2024 جىلى قاراشا ايىنىڭ 7-8 كۇندەرى استاناداعى دوستىق ۇيىندە قازاقستان حالقى اسسامبلەياسى انالار كەڭەسىنىڭ 10 جىلدىعىنا ارنالعان مەرەيتويلىق فورۋم ءوتتى.

جالپى ايتقاندا, اتالعان رەسپۋبليكالىق فورۋمدارعا انالار كەڭەستەرىنىڭ دەلەگاتسيالارى, مينيسترلىكتەردىڭ وكىلدەرى, دەپۋتاتتار ت.ب. قاتىستى.  باياندامالار جاسالىپ, ماسەلەلەر قارالدى. قازاقستان مەن كورشىلەس ەلدەردىڭ الەۋمەتتىك كەپىلدىكتەرىنە سالىستىرمالى تالداۋ جاسالدى. ەتنوستاردىڭ مەملەكەتتىك ءتىلدى ۇلتارالىق قارىم-قاتىناس ءتىلى رەتىندە مەڭگەرۋ ماسەلەسى دە قارالدى. اتالعان وتىرىستاردا الەۋمەتتىك سالانى دامىتۋ بويىنشا كەڭ اۋقىمدى تالقىلاۋلار جانە تاجىريبە الماسۋلار بولدى.

ءتۇيىن

بۇگىندە قۇرامىندا پارلامەنت مۇشەلەرى, دەنساۋلىق ساقتاۋ, ءبىلىم بەرۋ جانە باسقا دا ءتۇرلى سالا ماماندارىنان قۇرالعان زور الەۋەتكە يە «انالار كەڭەسىنىڭ» قىزمەتى بارلىق سالانى قامتيدى: ءبىلىم بەرۋ, دەنساۋلىق ساقتاۋ, قۇقىقتىق تاربيە, ت.ب. كەز كەلگەن ادام كومەك الۋ ءۇشىن كەڭەسكە جۇگىنە الادى. 

كەڭەستەر قىز-كەلىنشەكتەردىڭ قۇقىقتىق ساۋاتىن ارتتىرۋ, اتا-انا قامقورلىعىنسىز قالعان بالالار ماسەلەسىن شەشۋ بويىنشا وراسان زور جۇمىس جۇرگىزىپ كەلەدى. جىل وتكەن سايىن انالاردىڭ وتباسىلىق, رۋحاني تاربيە, مەدياتسيا, ت.ب. ماسەلەلەرگە ات سالىسۋى ارتىپ كەلەدى. 

الەۋمەتتىك ماڭىزدى جوبالاردى دامىتۋ, وتباسىلاردى قولداۋ جəنە تۇراقتى مəدەني قۇندىلىقتاردى قالىپتاستىرۋ تۇرعىسىندا «انالار كەڭەسىنىڭ» ءرولى ەرەكشە. تۇيىندەي ايتقاندا «انالار كەڭەسىنىڭ» قوعامعا بەرەرى مول!