يندەر اۋدانىنىڭ كوكتوعاي اۋىلى تۇرعىندارىنىڭ ايتۋىنشا, جىلقى مەن سيىر ءجيى ۇرلانادى, دەپ جازادى Egemen.kz.
جاقىندا اۋىل تۇرعىندارىنىڭ ورىستەگى جىلقىلارى ۇرلانعان. ماسەلەن, 24 اقپانعا قاراعان تۇندە كاماز كولىگى ماحامبەت اۋدانىنىڭ اۋماعىندا توقتاتىلىپ, ودان 15 جىلقى تۇسىرىلگەن.
«اتىراۋ قالاسىنىڭ ماڭىنداعى مال بازارىنان مەنىڭ يەلىگىمدەگى 6 جىلقىنىڭ تەرىسى تابىلدى. تەرىدەگى تاڭبادان ءوزىمنىڭ جىلقىلارىم ەكەنىن تانىدىم», دەيدى تۇرعىننىڭ ءبىرى.
تاعى ءبىر تۇرعىننىڭ 19 سيىرى 2019 جىلى ۇرلانعان. سودان ءالى تابىلماعان. اتىراۋ وبلىستىق پوليتسيا دەپارتامەنتى كريمينالدىق پوليتسيا باسقارماسى باستىعىنىڭ ورىنباسارى, پوليتسيا پودكولكوۆنيگى اباي جۇماباەۆتىڭ ايتۋىنا قاراعاندا, 28 جىلقىنى ۇرلاعان كۇدىكتى ۇستالعان.
«پوليتسيا دەپارتامەنتىنىڭ قىزمەتكەرلەرى جەدەل-ىزدەستىرۋ شارالارى كەزىندە ماحامبەت اۋدانىنىڭ اۋماعىندا 28 باس جىلقىنى ۇرلادى دەگەن كۇدىكپەن 45 جاستاعى ەر ادامدى ۇستادى. قازىر كۇدىكتى قاماۋعا الىندى. ءىرى كولەمدە مال ۇرلىعى دەرەگىمەن قىلمىستىق ءىس تىركەلدى. كەشەندى تەرگەۋ امالدارى باستالدى. قىلمىسقا قاتىستى بارلىق دەرەك پەن ءمان-جاي تەكسەرىلىپ جاتىر. ايعاق زاتتار تاركىلەندى. وزگە اقپارات تەرگەۋ مۇددەسىنە سايكەس جاريالاۋعا جاتپايدى», دەپ مالىمدەدى اباي جۇماباەۆ.