بىرىككەن اراب امىرلىگىنىڭ فۋدجەيرا قالاسىندا كاراتەدەن جاستار اراسىندا حالىقارالىق تۋرنير ءوتتى. ا سەرياسىنداعى ءباسى جوعارى دودادان سپورتشىلارىمىز 4 التىن, 7 قولا جۇلدە ەنشىلەدى, دەپ حابارلايدى Egemen.kz قازاقستان كاراتە فەدەراتسياسىنىڭ ءباسپاسوز قىزمەتىنە سىلتەمە جاساپ.
جالپى كوماندالىق ەسەپتە رەسەي سپورتشىلارى توپ باستاسا, يران مەن مىسىر قۇرامالارى ۇشتىكتى تۇيىندەدى.
قانجىعامىزعا العاشقى التىن مەدالدى كۋميتە باعدارلاماسى بويىنشا كۇشىن سىناعان دىنمۇحاممەد ايداربەك (U16-17) ەنشىلەدى. ول 55 كگ سالماقتا بارلىق قارسىلاسىن ايقىن ۇتتى. دىنمۇحاممەد 2023 جىلى وسى فۋدجەيراداعى سايىستىڭ قولا جۇلدەگەرى اتانعان بولاتىن.
14-15 جاس ساناتىندا نۇراسىل نۇرسەيىت (52 كگ) پەن سۇڭقار قانيبەك (70 كگ) چەمپيون اتاندى. نۇراسىل فينالدىق سىندا ۋكراين سپورتشىسىن جەڭسە, سۇڭقار حورۆات قارسىلاسىنان باسىم ءتۇستى.
قىزدار اراسىندا اياۋلىم تىلەكتەس (47 كگ) 6 جەكپە-جەكتە قارسىلاسىن ايقىن ۇتتى. حالىقارالىق ءتۋرنيردىڭ قولا مەدالىن U21 جاس ساناتىندا اقنيەت شەريزات (55 كگ), U16-17 جاس ساناتىندا گۇلنۇر قويشىباي (59 كگ), 14-15 جاس ارالىعىنداعى جاسوسپىرىمدەر دوداسىندا ءامىر كەڭەسباي (52 كگ), رۋسلان ەركىن (57 كگ), باتىر ءادىل (57 كگ), 12-13 جاس ارالىعىنداعى جەتكىنشەكتەر سايىسىندا ارنۇر مۇرات (45 كگ) پەن ينسار احماديەۆ (50 كگ) ولجالادى.
فۋدجەيراداعى تۋرنيرگە 87 ەلدەن 2400-گە تارتا سپورتشى قاتىستى. ەلىمىزدەن 140 كاراتە شەبەرى باعىن سىنادى. جاستار ليگاسىنىڭ ا سەرياسىنداعى كەلەسى دودا يسپانيانىڭ گۆادالاحارا قالاسىندا وتەدى.