پرەمەر-مينيستر مەملەكەت باسشىسىنىڭ ەلىمىزدىڭ ەكونوميكاسىنا ينۆەستيتسيالار تارتۋ جونىندەگى تاپسىرمالارىنىڭ ورىندالۋ بارىسىن قاراۋ جونىندە كەڭەس وتكىزدى. باستى ماقسات – ءىرى ينۆەستيتسيالىق جوبالاردى ىسكە اسىرۋدى جەدەلدەتۋ جانە ەلىمىزدەگى ينۆەستيتسيالىق احۋالدى جاقسارتۋعا كەدەرگى كەلتىرەتىن جۇيەلى ماسەلەلەردى شەشۋ, سونداي-اق ينۆەستيتسيالىق ساياساتتىڭ تيىمدىلىگىن ارتتىرۋ, ينۆەستورلار ءۇشىن قولايلى جاعداي جاساۋ جانە كاپيتال تارتۋ جۇمىستارىن جانداندىرۋ ءۇشىن ىقتيمال شارالاردى قاراستىرۋ, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
كەڭەس وتىرىسىندا سىرتقى ىستەر مينيسترلىگى, Kazakh Invest كومپانياسى باسشىلىعىنىڭ جۇمىس قارقىنى جانە ينۆەستيتسيالىق قىزمەت ديناميكاسىنا اسەر ەتكەن فاكتورلاردى تالداۋ بويىنشا اقپاراتى تىڭدالدى. 2024 جىلى قازاقستاندا 1,85 ترلن تەڭگەگە 230 ينۆەستيتسيالىق جوبا پايدالانۋعا بەرىلگەن. ينۆەستيتسيالىق شتابتىڭ جۇمىسى ءبىر جىل ىشىندە جالپى قۇنى $50 ملرد-تان اساتىن جوبالار بويىنشا ينۆەستورلاردىڭ 115 پروبلەمالىق ماسەلەسىن جويۋعا مۇمكىندىك بەرگەن.
ايتا كەتەيىك, ەلىمىزدىڭ نەعۇرلىم جوعارى قايتا وڭدەۋ جانە ەكسپورتتىق مۇمكىندىكتەر ءۇشىن الەۋەتى بار باسەكەلەستىك ارتىقشىلىعى باسىم تاۋارلارعا ينۆەستورلاردى ماقساتتى تارتۋ ءتاسىلى ەنگىزىلىپ جاتىر.
«ىنتىماقتاستىق پەن بەلسەندى ينۆەستيتسيالاۋ كەزەڭىنە ءوتۋدىڭ ناقتى پەرسپەكتيۆالارى بويىنشا كەلىسسوزدەر جۇرگىزۋ ءۇشىن سالا كوشباسشىسى رەتىندە ۇزدىك 10 كومپانيا انىقتالدى. وسىلايشا, جۇمىس ەكونوميكانىڭ قاجەتتىلىكتەرىن, وڭىرلەردىڭ باسەكەلەستىك ارتىقشىلىقتارىن جانە باسقا فاكتورلاردى ەسكەرە وتىرىپ, «ينۆەستيتسيالارعا تاپسىرىس بەرۋ» قاعيداتى ارقىلى قايتا قۇرىلادى. مىسالى, قىتايدىڭ ءىرى اگروونەركاسىپتىك كومپانيالارىمەن ناتيجەلى جۇمىس جۇرگىزىلدى. Fufeng Group جاقىن ارادا جامبىل وبلىسىندا $350 ملن-عا جۇگەرىنى تەرەڭ وڭدەۋ ارقىلى ناتري گلۋتاماتىن وندىرەتىن زاۋىت قۇرىلىسىن باستاۋدى جوسپارلاپ وتىر. Dalian Hesheng Holding Group بيىل جازدا اقمولا وبلىسىندا بيدايدى تەرەڭ وڭدەۋ كەشەنى شەڭبەرىندە $650 ملن-عا قۇرىلىس-مونتاجداۋ جۇمىستارىنا كىرىسەدى. بارلىق كومپانيالارمەن جوبالاردى «جايلاستىرۋ» بويىنشا بەلسەندى جۇمىس جالعاسۋدا, ياعني ينفراقۇرىلىمعا قول جەتكىزۋ جانە اكىمشىلىك ماسەلەلەردى جەدەل شەشۋدى قوسقاندا, قولايلى جاعدايلار جاساۋ», دەلىنگەن حابارلامادا.
بۇدان باسقا, اگروونەركاسىپتىك كەشەندى, ەنەرگەتيكانى, ونەركاسىپتى, قۇرىلىس ماتەريالدارىن ءوندىرۋدى جانە باسقالارىن قوسا العاندا, ەكونوميكانىڭ نەگىزگى سالالارىن قامتيتىن $12 ملرد ينۆەستيتسيالاردىڭ جالپى كولەمى بار 20 ستراتەگيالىق جوبا ايقىندالعان. ۇسىنىلعان جوبالاردىڭ ىشىنەن بيىل 14 جوبا بويىنشا ينۆەستيتسيالار تۋرالى كەلىسىمدەر جاساسۋ قاراستىرىلىپ جاتىر, ال 13 جوبا بويىنشا – قۇرىلىس-مونتاجداۋ جۇمىستارىنىڭ باستالۋى, تاعى 16 جوبا بويىنشا جوبالاۋ-سمەتالىق قۇجاتتامانى ازىرلەۋدى باستاۋ جوسپارلانعان.
سونداي-اق جۇمىس ساپارلارى, كەزدەسۋلەر مەن باسقا دا ءىس-شارالار اياسىندا جۇزەگە اسىرۋ تۋرالى ۋاعدالاستىقتار جاسالعان جوبالارعا نازار اۋدارىلدى. پرەمەر-مينيستر ىسكە اسىرۋ مەرزىمدەرى شەگەرىلگەن ينۆەستيتسيالىق جوبالارعا ەگجەي-تەگجەيلى توقتالدى. الماتى, اقتوبە, اتىراۋ, جامبىل وبلىستارى مەن استانا, شىمكەنت قالالارىنىڭ اكىمدەرى جانە دەنساۋلىق ساقتاۋ, ساۋدا مينيسترلەرى بايانداما جاسادى.
«بۇگىندە اكىمدىكتەر تاراپىنان ينۆەستيتسيا تارتۋ بويىنشا قابىلدانىپ جاتقان شارالارى وڭىرلەردىڭ الەۋەتىن اشىپ كورسەتپەيدى, ەكونوميكالىق الەۋەت جەتكىلىكتى پايدالانىلماي وتىر. بۇل باعىتتاعى جۇمىستار جەرگىلىكتى ءوزىن-ءوزى باسقارۋ ۆەرتيكالىنىڭ بارلىق دەڭگەيىندە, ونىڭ ىشىندە اۋدان اكىمدەرى دەڭگەيىندە دە جۇرگىزىلۋى ءتيىس», دەپ تاپسىردى ولجاس بەكتەنوۆ.
ءوڭىر اكىمدىكتەرى, مينيسترلىكتەر جۇمىسىنىڭ جوسپارلى كورسەتكىشتەرىن ەنگىزۋ بويىنشا تاسىلدەر ماقۇلداندى.
جوبالاردى ىسكە اسىرۋدى مونيتورينگىلەۋ مەن باقىلاۋدى كۇشەيتۋدىڭ پارمەندى تەتىگى بۇگىندە 1159 جوبا تۋرالى دەرەكتەر بار جاڭا ۇلتتىق تسيفرلىق ينۆەستيتسيالىق پلاتفورما بولادى. دەرەكتەر «اتامەكەن» ۇكپ-مەن بىرلەسە تولتىرىلىپ, جەرگىلىكتى جەرلەردە اكىمدىكتەر تەكسەرەدى.
سونىمەن قاتار كەڭەس بارىسىندا مەملەكەتتىك ورگاندار جۇمىسىنىڭ تيىمدىلىگىنە اسەر ەتەتىن جانە شارا قولدانۋدى تالاپ ەتەتىن بىرقاتار تۇيتكىلدى ماسەلە اتاپ ءوتىلدى. ولاردىڭ قاتارىندا ينفراقۇرىلىمنىڭ تاپشىلىعى مەن جەدەل قامتاماسىز ەتىلمەۋى, كۇردەلى اكىمشىلىك راسىمدەر مەن رۇقسات بەرۋدەگى كىدىرىستەر, جەر تەلىمدەرىن بەرۋدىڭ ۇزاق مەرزىمدەرى بار. اتالعان ماسەلەلەر بويىنشا ءتيىستى شەشىمدەر قابىلداندى..
«پرەزيدەنت ۇكىمەتتىڭ كەڭەيتىلگەن وتىرىسىندا ينۆەستيتسيا تارتۋ باسى ارتىق بيۋروكراتيادان ارىلىپ, جەدەل ۆەدومستۆوارالىق ۇيلەستىرۋدى تالاپ ەتەتىن اسا ماڭىزدى جۇمىس ەكەنىن ايتتى. مەملەكەتتىك ورگاندار, اسىرەسە اكىمدىكتەر جوبانىڭ ىسكە اسىرىلۋ بارىسىن «تىكەلەي» باقىلاۋى كەرەك. اكىمدەر مەن مينيسترلەر ينۆەستيتسيا تارتۋمەن كۇندەلىكتى اينالىسىپ, بۇگىنگى كۇننىڭ باستى مىندەتى – ينۆەستورلاردىڭ ماسەلەلەرىن جەدەل شەشۋى قاجەت», دەپ اتاپ ءوتتى ولجاس بەكتەنوۆ.
ايتا كەتەيىك, بۇل باعىتتاعى جۇمىستار پرەمەر-ءمينيستردىڭ ەرەكشە باقىلاۋىنا الىنعان.